Gasirwa omu Kitambo kya Yesu
Omurundi gumwe buri mwaka, Abajurizi ba Yehova n’obukaikuru bw’abantu abandi abu barikuba beetsire, nibateeranira hamwe kwijuka okufa kwa Yesu, nk’oku yaaragiire. (Luka 22:19) Omukoro ogu nigutuhwera kwetegyereza obukuru bw’eki Yesu yaakozire obu yaahayo amagara ge ahabw’abantu. Kandi nigworeka n’oku ekitambo kye kirikutugasira hati n’omu biro by’omumaisho.—Yohaana 3:16.
Yaaba ogiire aha Kiijutsyo omwaka ogu nari otabaasize kuzayo, noobaasa kugasirwa ota omu kufa kwa Yesu okw’ekitambo? Yesu akeegyesa ngu twine kukora ebintu bibiri bikuru:
1. Yega ebirikukwata ahari Ruhanga na Yesu. Obu Yesu yaabaire naashaba Ishe ow’omu iguru, akagira ati: “Aga nigo magara agatahwaho, okumanya iwe Ruhanga omwe ow’amazima, n’ogwo ou waatumire Yesu Kristo.”—Yohaana 17:3.
2. Gyendera aha bi orikwega. Yesu akooreka ngu twine kugyendera aha nyegyesa ze. Nk’eky’okureeberaho, akahendera Orubazo rwe orw’aha Rushozi orurikumanywa gye arikusiima omuntu weena ‘orikuhurira ebigambo [bye akabikora].’ (Luka 6:46-48) Kandi, eizooba erindi akagira ati: “Ku muraabe nimumanya ebyo, [mushemereirwe] mwaba nimubikora.”—Yohaana 13:17.
Nooyenda kwega ebirikukiraho ebirikukwata ahari Ruhanga na Yesu? Nooyenda obuhabuzi kumanya oku orikubaasa kugyendera aha ebi orikwega? Aha hariho ebirikubaasa kukuhwera.
Omushomo gwa Baibuli
Omushomo gwaitu gwa Baibuli ogutari gw’okushashurira guhweraire abantu baingi kushwijuma Baibuli n’okugyendera aha nyegyesa zaayo.
Za aha Omushomo gwa Baibuli kumanya ebirikukiraho ebirikukwata aha ntebeekanisa egi.
Reeba vidiyo Nooyakiirwa Kwega Baibuli kureeba oku okwega Baibuli orikuhwerwa Abajurizi ba Yehova kurikushusha.
Enteerane z’Abajurizi ba Yehova
Abajurizi ba Yehova nibateeranira hamwe emirundi ebiri buri saabiiti omu myanya yaabo ey’okuramizamu erikwetwa Ebyombeko by’Obukama. Omu nteerane ezi nitushwijuma Baibuli n’oku turikubaasa kugyendera aha nyegyesa zaayo.
Enteerane ezi n’ez’abantu boona, tikirikukwetengyesa kuba ori Omujurizi wa Yehova kubaasa kuzizamu. Kurugiirira aha mbeera z’ekicweka kyanyu, noobaasa kucwamu kuzayo butunu nari kuhurizanira aha vidiyo.
Reeba vidiyo Niki Ekirikukorerwa aha Kyombeko ky’Obukama? kubaasa kumurikirwa ekirikuba omu nteerane ezi.
Sherura oruteerane oruri haihi omu kicweka kyanyu, orikuza aha Enteerane z’Ekibiina ez’Abajurizi ba Yehova.
Vidiyo z’aha mukura n’ebicweka
Vidiyo nyingi n’ebicweka ebiri aha mukura ogu nibibaasa kukuhwera kwega bingi ebirikukwata aha nyegyesa za Yesu n’obukuru bw’okufa kwe okw’ekitambo.
Nk’eky’okureeberaho, kubaasa kumanya oku okufa kw’omuntu omwe kurikubaasa kugasira obukaikuru bw’abantu, shoma ebicweka “Yesu n’Omujuni mu Muringo Ki?” na “Ahabw’enki Yesu Yaabonaboine Kandi Akafa?” nari reeba vidiyo Ahabw’enki Yesu Yaafiire?