EMINYEETO NIBABUUZA
Baibuli Neebaasa Kumpwera Eta?—Ekicweka 3: Gasirwa omu Bwijwire omu Kushoma Baibuli
Waareeba omu Baibuli, nooreeba ngu erimu ebigambo bingi. Ekyo tikishemereire kukurenga! Kureka, reeba Baibuli nk’emeeza eriho eby’okurya bingi. Torikubaasa kurya buri kimwe ekiri aha meeza. Kwonka noobaasa kwihaho ebirikukwigutsa.
Kubaasa kugasirwa omu bwijwire omu kushoma Baibuli, oine kuta omutima aha bi orikushoma. Ekicweka eki nikiza kukuhwera kukura ekyo.
Ebiri omu kicweka eki
Ahabw’enki oine kuta omutima aha bi orikushoma omu Baibuli?
Oku orikuta amaani omu kushoma Baibuli, nikwo orikugigasirwamu. Teekateeka aha kugyeragyeranisa oku: Waajabika amajaani omu maizi okagaihamu ahonaaho nootunga akahooho kakye k’amajaani. Kwonka nootunga akahooho kaingi waagarekamu kumara obwire.
Nikyo kimwe n’okushoma Baibuli. Omu mwanya gw’okushoma noorahukiiriza, ebiteekateeko byawe n’omutima gwawe bite aha bi orikushoma. Eki nikyo eki omuhandiiki wa Zaaburi 119 yaakozire. Aha bikwatiraine n’ebiragiro bya Ruhanga, akagira ati: “Nibyo nsiiba ninteekateekaho eizooba ryona.”—Zaaburi 119:97.
Buzima, eki tikirikumanyisa ngu oine kumara eizooba ryona nooshoma Baibuli kandi noogiteekateekaho. Enshonga n’egi: Omuhandiiki wa Zaaburi akaba naagira obwire bw’okuteekateeka aha Kigambo kya Ruhanga. Okukora eki kikamuhwera kucwamu gye.—Zaaburi 119:98-100.
“Maawe eizooba rimwe akangira ati: ‘Oine ebiro mushanju omu saabiiti, kandi nookoreramu ebintu bingi ebyawe. Ahabw’enki obwire obumwe otarikubuha Yehova? Eki n’ekintu ekihikire kukorwa!’”—Melanie.
Waaba nooteekateeka aha misingye ya Baibuli, nikiija kukubaasisa kucwamu gye, nk’eky’okureeberaho waaba nootoorana abanywani, nari waayohibwa kukora ekigwire.
Noobaasa kugasirwa ota omu bwijwire omu kushoma Baibuli?
Taho entebeekanisa. “Kora entebeekanisa y’okushoma Baibuli,” omunyeeto orikwetwa Julia nikwo arikuhabura. “Manya ebi orikuza kushoma, obu oraashome, n’ahu oraashomere.”
Shomera omu mbeera nungi. “Tunga omwanya gucureire,” nikwo omwishiki orikwetwa Gianna arikugira. “Kandi, manyisa abandi omu ka yaawe aha bikwatiraine n’entebeekanisa yaawe ey’okushoma Baibuli, kugira ngu batakuteganisa.”
Waaba nookoresa ekyoma, ihaho ebirikubaasa kukuteganisa. Noobaasa n’okucwamu kukoresa Baibuli eteirwe. Nangwa, okucondooza nikworeka ngu okushoma orikukoresa ekitabo ekiteirwe, nikibaasa kukuhwera kwetegyereza ebi orikushoma. Kwonka, nikibaasa kuguma munonga waaba nooshomera aha kyoma.
“Nshangire ngu okushomera aha kyoma nikihuzya. Ekyoma kyangye kiriho ebirikuteganisa, nari obumwe eryanda nirihwaho omuriro, nari Intaneeti neerugaho. Kwonka naakoresa ekitabo ekiteirwe, nimba nyine kutunga ekyererezi kirikumara kyonka.”—Elena.
Banza oshabe. Shaba Yehova kukuhwera kwetegyereza, kwijuka, n’okugasirwa omu bi orikuza kushoma omu Baibuli.—Yakobo 1:5.
Kubaasa kukora ebirikuhikaana n’okushaba kwawe, condooza aha bi orikushoma. Eki noobaasa kukikora ota? Ku oraabe nookoresa JW Library app nari orikushomera Baibuli aha Intaneeti, noobaasa kukwata aha mushororongo kutunga eby’okucondoozamu ebirikugugambaho.
Buuza ebibuuzo. Nk’eky’okureeberaho: ‘Ekyahandiikirwe eki nikikwata kita ahari Yehova? Nikigamba aha mutwarize gwe ogu ndikubaasa kutooreza?’ (Abaefeso 5:1) ‘Ni ishomo ki eriri omu kyahandiikirwe eki eri ndikubaasa kugyenderaho?’ (Zaaburi 119:105) ‘Nimbaasa kukoresa ebi naashoma kuhwera abandi omu muringo gwona?’—Abarooma 1:11.
Kandi yebuuze oti: ‘Ebi naashoma nibihikaana bita n’omutwe mukuru gwa Baibuli?’ Ekibuuzo eki ni kikuru. Ahabw’enki? Ahakuba ebiri omu Baibuli kuruga aha Kutandika kuhika aha Kushuuruurwa haine oku biine akakwate n’omutwe mukuru gwa Baibuli ogu: Oku Yehova arikwija kweza eiziina rye arikukoresa Obukama bwe, akahamya ngu niwe ahikire kutegyeka byona, kandi ngu emitegyekyere ye niyo erikukirayo oburungi.