Okushaba kwa Mukama Waitu shi Nikwo Kurikukirayo Oburungi?
Eki Baibuli erikugarukamu
Okushaba kwa Mukama Waitu kurimu obuhabuzi oburikworeka oku tushemereire kushaba n’ebi twine kushaba. Yesu akakoresa okushaba oku arikugarukamu abeegi be obu baamugira bati: “Mukama waitu, twegyese okushaba.” (Luka 11:1) Kwonka, okushaba kwa Mukama Waitu nari okwa Tataitwe, tikwo kushaba kwonka oku Ruhanga arikusiima.a Kureka, Yesu akakukoresa nk’eky’okureeberaho kworeka okushaba oku Ruhanga arikuhurira.
Omu kicweka eki
Okushaba kwa Mukama Waitu kurimu ki?
Okushaba kwa Mukama Waitu, kuhandiikirwe omu miringo etarikushushana omuri Matayo 6:9-13, omu nvunuura za Baibuli ezitarikushushana. Eki n’eky’okureeberaho.
Envunuura eya New World: “Tataitwe ow’omu iguru, eiziina ryawe ka ryezibwe. Obukama bwawe ka bwije. Ebi orikukunda ka bikorwe omu nsi nk’oku birikukorwa omu iguru. Otuhe hati omugaati gw’eizooba eri, otusaasire amabanja gaitu, nk’oku naitwe turikusaasira abarikutubanja. Otatutwara omu kwohibwa, kureka otujune omubi.”
Envunuura eya King James: “Tataitwe ow’omu iguru, eiziina ryawe ryezibwe. Obukama bwawe bwije; ebi okunda bikorwe omu nsi nk’oku bikorwa omu iguru. Otuhe hati eby’okurya ebi otuha obutoosha. Otusaasire amabanja gaitu, nkaitwe oku tusaasira abu turikwihuza. Otatutwara omu kwohibwa kureka otujune Omubi.”b
Okushaba kwa Mukama Waitu kwine makuru ki?
Enyegyesa za Yesu niziikirizana n’Ebyahandiikirwe ebindi, n’ahabw’ekyo nibibaasa kutuhwera kwetegyereza okushaba kwa Mukama Waitu.
“Tataitwe ow’omu iguru”
Kihikire kweta Ruhanga “Tataitwe” ahakuba niwe yaatuhangire, kandi akatuha amagara.—Isaaya 64:8.
“Eiziina ryawe ka ryezibwe”
Eiziina rya Ruhanga, Yehova riine kuheebwa ekitiinisa, kandi rikatwarwa nk’eririkwera, nari erishemeire. Abantu nibeejumba omu kweza eiziina rya Ruhanga baaba nibagamba aha mitwarize ye, kandi barikumanyisa abandi ebigyendererwa bye.—Zaaburi 83:18; Isaaya 6:3.
“Obukama bwawe ka bwije”
Obukama bwa Ruhanga ni gavumenti eri omu iguru ei Yesu ari Omugabe waayo. Yesu akatwegyesa ngu tushabe, gavumenti egi eije etegyeke ensi yoona.—Danieli 2:44; Okushuuruurwa 11:15.
“Ebi orikukunda ka bikorwe omu nsi nk’oku birikukorwa omu iguru”
Nk’oku omu iguru hatariyo kibi nari okufa, ekigyendererwa kya Ruhanga ahabw’ensi n’okwenda ngu abantu bagituuremu ebiro byona baine obusingye n’oburinzi.—Zaaburi 37:11, 29.
“Otuhe hati omugaati gw’eizooba eri”
Omu bwire bwa Yesu, eby’okurya ebyabaire nibikira kuriibwa n’omugaati. Twine kwijuka ngu Omuhangi waitu niwe aine kutuha eby’okutubaisaho kubaasa kugumaho tuhuriire.—Ebyakozirwe 17:24, 25.
“Otusaasire amabanja gaitu, nk’oku naitwe turikusaasira abarikutubanja”
Ekigambo amabanja aha nikikoresibwa kumanyisa eby’okushiisha. (Luka 11:4) Abantu boona nibashiisha kandi baine kusaasirwa. Kwonka twaba nitwenda ngu Ruhanga atusaasire, twine kuba tweteekateekire kusaasira abandi ebi barikutushaagiza.—Matayo 6:14, 15.
“Otatutwara omu kwohibwa, kureka otujune omubi”
Yehova tarikubaasa kutureetera kwohibwa kukora ebigwire. (Yakobo 1:13) Kwonka omubi Sitaane Omuregi, kandi orikwetwa “Omwohi” niwe arikutureetera kwohibwa. (1 Yohaana 5:19; Matayo 4:1-4) Nituba nitushaba Yehova ngu atatwikiriza kukora ekigwire twayohibwa kutamworobera.
Okugarukagarukamu okushaba oku nigwo muringo gwonka ogw’okushaba?
Yesu akatuha okushaba kwa Mukama Waitu kutubeera eky’okureeberaho. Tikushemereire kuba nitukugarukagarukamu turikukoresa ebigambo nibyo bimwe. Yesu atakagambire okushaba oku, akabanza yaarabura ati: “Ku muraabe nimushaba, murekye kushaba nimugarukagaruka omu bigambo bya busha.” (Matayo 6:7) Eizooba erindi nabwo obu yaaha okushaba kw’eky’okureeberaho, akakoresa ebigambo by’omutaano.—Luka 11:2-4.
Omuringo murungi gw’okushaba n’okukoresa ebigambo ebyawe kuruga aha mutima.—Zaaburi 62:8.
Tushemereire kushaba tuta?
Okushaba kwa Mukama Waitu n’eky’okureeberaho kirungi eky’okushaba oku Ruhanga arikugarukamu. Yetegyereze oku kurikuhikaana n’Ebyahandiikirwe ebindi ebirikukwata aha kushaba.
Okushaba Ruhanga wenka
Ekyahandiikirwe: “Omuri byona mumanyise Ruhanga ebi murikwetenga omu kushaba n’okweshengyereza, kandi musiime.”—Abafilipi 4:6.
Amakuru: Tushemereire kushaba Ruhanga, beitu atari Yesu, Mariamu, nari abarikwera. “Tataitwe,” ekigambo ekirikubanza omu kushaba oku, nikitwegyesa ngu twine kushaba Yehova Ruhanga wenka.
Okushaba Ebirikuhikaana n’ebi Ruhanga arikukunda
Ekyahandiikirwe: ‘Twashaba ekintu kyona nk’oku arikukunda, naatuhurira.’—1 Yohaana 5:14.
Amakuru: Nitubaasa kushaba ekintu kyona ekirikuhikaana n’ebi Ruhanga arikukunda. Yesu akatwegyesa oku ebi Ruhanga arikukunda biri bikuru arikubita omu kushaba kwe ngu “ebi orikukunda ka bikorwe.” Nitubaasa kumanya ekigyendererwa kya Ruhanga ahabw’ensi n’abantu turikwega Baibuli.
Shaba aha bikwatiraine n’ebirikukwerarikiriza
Ekyahandiikirwe: ‘Yegyekyerera [Yehova oburemeezi bwawe], nawe naija kuguma naakukwatirira.’—Zaaburi 55:22.
Amakuru: Ruhanga naafayo aha birikutwerarikiriza. Nk’oku Yesu yaagambire aha nshonga nyingi eza butoosha kushaba kwa Mukama Waitu, nitubaasa kushaba aha bikwatiraine n’ebi tukyenire, obuhabuzi omu kucwamu aha nshonga nkuru, okutunga obuhwezi twaba twine oburemeezi, n’okusaasirwa eby’okushiisha byaitu.c
a Nk’eky’okureeberaho, Yesu n’abeegi be bakashaba emirundi endiijo batarikukoresa ebigambo ebiri omu kushaba kw’eky’okureeberaho.—Luka 23:34; Abafilipi 1:9.
b Envunuura ya Baibuli eya King James omu kushaba kwa Mukama Waitu neeyongyeramu ebigambo ebi: “Ahabw’obukama, n’amaani, n’ekitiinisa, ebiro byona. Amiina.” Ebigambo by’okuhimbisa Ruhanga ebi, ebirikushangwa omu Baibuli ezimwe nibyetwa okutendereza. Kwonka, Envunuura ya Jerome Biblical Commentary neegira eti: “Okutendereza . . . Tikurikushangwa omu [bihandiiko bya Baibuli] ebingi ebirikwesigwa.”
c Abarikwenda ngu Ruhanga abasaasire nibabaasa kuba nibeeshinja baaza kushaba. Kwonka Yehova abari nk’abo naabahiga ati: “Nimwije tuhanuure hamwe.” (Isaaya 1:18) Tarikwehuzya muntu weena orikweteisa ayihire aha mutima.