EKICWEKA EKY’OKWEGA 40
EKYESHONGORO 111 Ebirikutureetera Kushemererwa
Yehova Niwe ‘Okushemererwa Kwaitu Okwingi Munonga’
“ [Ninyija kuza] . . . ahari Ruhanga okushemererwa kwangye okwingi munonga.”—ZAB. 43:4.
ENTIMA
Okumanya ebirikubaasa kuturemesa kugira okushemererwa n’oku turikubaasa kugaruka kukugira.
1-2. (a) Abantu baingi bari mu mbeera ki obunaku obu? (b) Nituza kugamba ahari ki omu kicweka eki?
ABANTU omu nsi bataire omutima aha kusherura ebintu ebirikubaasa kubareetera okushemererwa. Kwonka nabwo, baremirwe kutunga okushemererwa okwabuzima. Eki kireetaire abantu baingi kwehurira nk’abataine mugasho n’okugira obusaasi. Abaheereza ba Yehova nabo nibabaasa kwehurira batyo. Ahabw’okugira ngu turi omu “biro by’aha mperu,” nitumanya ngu nitubaasa kuhikwaho embeera ezigumire kwemera.—2 Tim. 3:1.
2 Omu kicweka eki, nituza kugamba aha birikubaasa kuturemesa kugira okushemererwa n’oku turikubaasa kugaruka kukugira. Kwonka, twine kubanza kumanya Obukomooko bw’okushemererwa okwabuzima.
OBUKOMOOKO BW’OKUSHEMERERWA OKWABUZIMA
3. Ebyahangirwe nibitwegyesa ki ahari Yehova? (Reeba n’ebishushani.)
3 Yehova atwire ashemereirwe, kandi naayenda ngu naitwe tugire okushemererwa. Niyo nshonga ahabw’enki okushemererwa kwe nikureebekyera omu bi yaahangire nk’ensi yaitu enungi, erangi zitari zimwe, oku enyamaishwa zirikuzaana, n’eby’okurya by’emiringo mingi. Buzima, eki nikyoreka ngu naatukunda, kandi ngu naayenda twesiimire amagara!
Baby elephant: Image © Romi Gamit/Shutterstock; penguin chicks: Vladimir Seliverstov/500px via Getty Images; baby goats: Rita Kochmarjova/stock.adobe.com; two dolphins: georgeclerk/E+ via Getty Images
Oku enyamaishwa zirikuzaana nikyoreka okushemererwa kwa Yehova (Reeba akacweka 3)
4. (a) Ahabw’enki Yehova naaguma ashemereirwe n’obu araabe naareeba okubonabona okuri omu nsi? (b) Yehova atuhaire kiconco ki? (Zaaburi 16:11)
4 N’obu Yehova araabe ari Ruhanga w’okushemererwa, naamanya gye obusaasi n’okubonabona okuri omu nsi. (1 Tim. 1:11) Kwonka, tarikwikiriza embeera ezo kumuremesa kugira okushemererwa. Naamanya ngu okubonabona okuriho hati n’okwa kaanya bwanya, kandi ataireho eizooba obu araije kukumariraho kimwe. Kwonka ekyo kitakabaireho, naagumizamu arikutuhwera ahakuba naayetegyereza embeera yaitu. Ekyo naakikora ata? Arikutuha ekiconco ky’okushemererwa. (Shoma Zaaburi 16:11.) Yetegyereze oku yaahaire Yesu ekiconco ekyo.
5-6. Ahabw’enki Yesu ashemereirwe?
5 Yesu niwe arikukirayo kushemererwa omu bihangirwe bya Yehova byona. Ahabw’enki? Teekateeka aha nshonga ibiri ezi. (1) “Niwe kishushani kya Ruhanga otarikureebwa,” kandi naatooreza gye emitwarize ya Ishe omu miringo yoona. (Kol. 1:15) (2) Yesu akamara obwire bwingi na Ishe, Obukomooko bw’okushemerererwa.
6 Yesu akaba atwire aine okushemererwa ahabw’okukora ebi Ishe arikumushaba kukora. (Enf. 8:30, 31; Yoh. 8:29) N’ahabw’ekyo, naasiimwa Yehova ahabw’okuguma ari omwesigwa.—Mat. 3:17.
7. Okushemererwa okwabuzima nitubaasa kukutunga tuta?
7 Naitwe nitubaasa kushemererwa twirira haihi Yehova Obukomooko bw’okushemererwa. Nitwija kwongyera kugira okushemererwa twayongyera kwega ahari Yehova n’okumutooreza. Kandi nitwija kushemererwa twakora ebi Ruhanga arikukunda n’okumanya ngu naatusiima.a (Zab. 33:12) Kwonka shi obumwe ku twakuba nitwehurira nk’abataine kushemererwa. Mbwenu shi ekyo nikimanyisa ngu Yehova tarikutusiima? Ngaaha buzima! Ahabw’okugira tituhikiriire, obumwe nitugira obusaasi, amaganya, n’enaku kandi ekyo Yehova naakimanya. (Zab. 103:14) Hati ka tureebe ebirikubaasa kuturemesa kushemererwa n’oku turikubaasa kugaruka kukugira.
EBIRIKUTUREMESA KUGIRA OKUSHEMERERWA
8. Embeera zigumire nizibaasa kutureetera kwehurira tuta?
8 Eky’okubanza: Embeera zigumire. Noobonabona ahabw’okuhiiganisibwa, ekigwererezi, obworo, endwara, nari emyaka ya bukuru? Embeera nk’ezo nizibaasa kutuubya okushemererwa kwaitu na munonga twaba tutarikubaasa kugira eki twakoraho. Baibuli neeyoreka ngu ‘omutima ogwine obusaasi gureeta okwehwa amatsiko.’ (Enf. 15:13) Babis, omureeberezi owaafeereirwe omurumuna n’abazaire be bombi omu myaka ena yonka naagira ati: “Nkagira eihamba, kandi naayereeba nk’otaine kihwera. Kandi obumwe, nkaba ngira amaganya ahabw’okugira ngu nkaba nyine bingi by’okukora ntarikubaasa kumara obwire burikumara n’abazaire bangye na murumuna wangye batakafiire.” Amazima gari ngu, embeera zigumire nizibaasa kutumaramu amaani omu nyehurira n’omu mubiri.
9. Niki ekirikubaasa kutuhwera kugaruka kugira okushemererwa? (Yeremia 29:4-7, 10)
9 Niki ekirikubaasa kutuhwera kugaruka kugira okushemererwa? Nitubaasa kugaruka kugira okushemererwa twareeba embeera nk’oku eri, kandi tukaba abarikusiima. Ensi neetureetera kuteekateeka ngu kubaasa kugira okushemererwa, twine kuba nitutuura omu mbeera nungi. Kwonka ekyo tikihikire. Nk’eky’okureeberaho, Yehova akagambira Abayudaaya enkwatwa omuri Babulooni ngu bakaba baine kwikiriza embeera zaabo ensya, kandi bakore eki barikubaasa kugira okushemererwa. (Shoma Yeremia 29:4-7, 10.) Eky’okwega? Teeraho kwikiriza embeera zaawe nk’oku ziri, kandi osiime ebintu birungi ebi otungire. Ijuka ngu Yehova naija kukuhwera. (Zab. 63:7; 146:5) Effie, owaahikirweho butandu eyaamureeteire kushanyarara naagira ati: “Nkatunga obuhwezi n’obushagiki kuruga ahari Yehova, ab’eka yangye n’ekibiina. N’ahabw’ekyo nkareeba ngu naahanika nimba naaba entasiima. Niinyenda kworeka okusiima kwangye ahari Yehova n’abanywani bangye ahabw’okumpwera.”
10. Ahabw’enki turikubaasa kuguma tushemereirwe n’obu twahikwaho oburemeezi?
10 Nitubaasa kugira okushemererwa n’obu twakuhikwaho embeera zigumire nari ab’omuka yaitu.b (Zab. 126:5) Ahabw’enki? Ahakuba okushemererwa kwaitu tikurikwegamira aha mbeera ezi turikurabamu. Payoniya orikwetwa Maria, naagira: “Okuguma oshemereirwe waaba oine oburemeezi tikirikumanyisa ngu nooyehuzya enyehurira zaawe. Kureka, nikimanyisa ngu toyebirwe ebiraganiso bya Yehova. Kandi Tataitwe naija kutuhwera kuguma tushemereirwe.” Ijuka ngu n’obu embeera zaakuguma zita omu bunaku obu, n’ez’akaanya bwanya. Juba Yehova naija kumariraho kimwe oburemeezi oshushe ngu tibwakabahoga.
11. Eky’okureeberaho ky’entumwa Paulo nikikugumya kita?
11 Kwonka shi ku twakutandika kuteekateeka ngu nituhikwaho oburemeezi ahabw’okugira ngu titurikusiimwa Yehova? Twayehurira tutyo, ni kikuru kuteekateeka aha baheereza ba Yehova aba ira abahikirweho embeera zigumire. Teekateeka aha mbeera y’entumwa Paulo. Yesu niwe yaamwetooraniire kubuurira amazima omu ‘banyamahanga n’abagabe n’Abaisraeli.’ (Byak. 9:15) Ogwo gukaba guri omugisha gw’omutaano! Kwonka nabwo Paulo akahikwaho oburemeezi. (2 Kor. 11:23-27) Mbwenu shi ekyo kikaba nikimanyisa ngu Paulo tarikusiimwa Yehova? Ngaaha buzima! Omu mwanya gw’ekyo, okugumisiriza kwe kukaba nikworeka ngu aine obushagiki bwa Yehova. (Rom. 5:3-5) Teekateeka aha mbeera zaawe. N’obu oraabe oine oburemeezi, oriyo noogumisiriza. Ekyo nikibaasa kukuhwera kugira obwesigye ngu Yehova naakusiima.
12. Amatsiko gatahwaire nigabaasa kuturemesa gata kugira okushemererwa?
12 Ekya kabiri: Amatsiko gatahwaire. (Enf. 13:12) Rukundo ei twiniire Yehova neetuhiga kumusiima n’okutaho ebigyendererwa omu buheereza bwaitu. Kwonka twataho ebigyendererwa ebitarikuhikaana n’embeera zaitu, nitubaasa kuhwamu amaani. (Enf. 17:22) Payoniya orikwetwa Holly naagira ati: “Nkaba niinyenda kuza omu Ishomero ery’Ababuurizi b’Obukama, kuheereza omu ihanga erindi nari kuza kuhwera omu kwombeka Ramapo. Kwonka embeera zangye ku zaahindukire, nkaba ntakibaasa kuhika aha bigyendererwa ebyo. Ekyo kikaandeetera kwehurira kubi munonga. Nikimaramu amaani waaba oine ebi orikwenda kukora kwonka otarikubaasa kubihikiiriza.” Baingi nibeehurira batyo.
13. Embeera zaitu zaaba zitarikutubaasisa kugira ebi twakora, ni bigyendererwa ki ebiringaniire ebi turikubaasa kweteeraho?
13 Niki ekirikubaasa kutuhwera kugaruka kugira okushemererwa? Ijuka ngu Yehova tarikutushaba kukora bingi nari ebi tutarikubaasa. Kandi tarikututwara nk’ab’omuhendo arikwihirira aha bi turikubaasa kukora omu buheereza bwe. Yehova naayenda ngu tube abeesigwa kandi tumanye obugarukiro bwaitu. (Mik. 6:8; 1 Kor. 4:2) Naata omutima aha ki turi omunda beitu hatari aha bi turikubaasa kukora. Mbwenu shi kikaaba eky’obwengye kweteekateekaho munonga kukira oku Yehova arikututeekateekaho? Ngaaha buzima! N’ahabw’ekyo, embeera zaaba zitarikukubaasisa kukora bingi omu kuheereza Yehova, teeraho kukora eki orikubaasa. Nk’eky’okureeberaho, noobaasa kuta omutima aha kuhwera abato n’okugumya abakaikwire? Noobaasa kutaho ekigyendererwa ky’okugumya omuntu orikumutaayaayira, kumuteerera esimu nari kumwoherereza obutumwa? Yehova naija kukuhwera kugira okushemererwa waaba noohikiiriza ebigyendererwa nk’ebyo ebi orikubaasa. Kandi oijukye ngu omu bwire butari bwa hare nitwija kugira emigisha mingi ey’okuheereza Yehova omu nsi ensya omu miringo ei tutakateekateekahoga! Holly owaaba yaagambirweho akahendera arikugira ati: “Ku ndikuteekateeka aha bi ntarikubaasa kuhikiiriza, ningira nti, ‘niinyija kutuuraho ebiro byona.’ Ahabw’obuhwezi bwa Yehova, niinyija kuhikiiriza bimwe aha bigyendererwa byangye omu nsi ensya.”
14. Niki ekindi ekirikubaasa kuturemesa kugira okushemererwa?
14 Ekya kashatu: Okweshemeza ekirenga. Abamwe nibakoresa emikura y’empurizana kwenegyeza emiteekateekyere erikugira ngu okushemererwa okwabuzima n’okumarwa nibiruga omu kweshemeza. N’ahabw’ekyo abantu nibahigwa kwebembeza ebintu nk’eby’emizaano, okugura ebintu n’okurambura. Tikibi kushemerererwa ebintu ebyo. Yehova akatuhanga omu muringo ogurikutubaasisa kusiima ebintu birungi. Kwonka baingi bashangire ngu ebi baabaire nibateekateeka ngu nibiija kubareetera okushemererwa bikubaihireho. Payoniya orikwetwa Eva naagira ati: “Waaba otaire omutima aha by’okweshemeza, tihaine obu oriba omazirwe.” Okweshemeza ekirenga nikibaasa kutuubya okushemererwa kwaitu.
15. Niki eki turikubaasa kwegyera aha Mugabe Sulemaani?
15 Ebi Omugabe Sulemaani yaarabiremu nibibaasa kutwegyesa amashomo makuru aha birikubaasa kuruga omu kweshemeza ekirenga. Akateeraho kusherura okushemererwa kurabira omu kwigutsya ebyetengo bye nk’okurya eby’okurya birungi, ebyeshongoro birungi, n’ebintu byona ebi esente zaabaire nizibaasa kugura omu bwire bwe. Kwonka ebyo byona tibiramureetaire okushemererwa. Akagira ati: “Eriisho tirihaaga kureeba, n’okutu tikuhaaga kuhurira.” (Mub. 1:8; 2:1-11) Abantu abamwe nibateekateeka ngu baaba baine esente nyingi nibabaasa kukora kyona eki barikwenda, kandi bagire okushemererwa. Kwonka ekyo tikihikire ahabw’okuba esente tizirikubaasa kureeta okushemererwa okwabuzima.
16. Okuha abandi nikibaasa kukuhwera kita kugaruka kugira okushemererwa? (Reeba n’ebishushani.)
16 Niki ekirikubaasa kutuhwera kugaruka kugira okushemererwa? Yesu akatwegyesa ati: “Okugaba kuhaisa omugisha okukira okuheebwa.” (Byak. 20:35) Omureeberezi orikwetwa Alekos naagira ati: “Ninta omutima aha kukorera abandi obuntu bukye. Ku ndikugaba, ninta omutima aha bandi omu mwanya gw’okugwetaho, kandi ekyo nikindeetera okushemererwa.” Mbwenu shi noobaasa kukorera ki abandi kubaasa kushemererwa? Waareeba omuntu ori omu mbeera egumire, teeraho kumugumya. Noobaasa kutamaraho oburemeezi bwe, kwonka noobaasa kumuhuumuriza waamuhurikiza omu muringo gw’esaasi, okamugirira embabazi, kandi okamuhiga kwegyekyera Yehova oburemeezi bwe. (Zab. 55:22; 68:19) Kandi noobaasa n’okumuhwera kuhamya ngu Yehova tamutsigireho. (Zab. 37:28; Isa. 59:1) Noobaasa n’okugira eki waamukorera ekirikureebwa butunu nk’okumutekyera eby’okurya nari okugyenda gyenda nawe. Mwete kukwegaitaho omu kubuurira ekirikubaasa kumureetera kugaruka kugira okushemererwa. Ikiriza Yehova akukorese kugumya abandi. Okuta omutima aha bandi omu mwanya gw’okugwetaho, nikiija kukureetera kugira okushemererwa okwabuzima!—Enf. 11:25.
Omu mwanya gw’okuta omutima aha bi orikwenda, ta omutima aha byetengo by’abandi (Reeba akacweka 16)c
17. Okushemererwa kwine kakwate ki na Yehova? (Zaaburi 43:4)
17 Nitubaasa kugira okushemererwa okwabuzima twagumizamu nitwirira haihi Tataitwe ow’omu iguru. Baibuli neetuhamiza ngu Yehova niwe “kushemererwa [kwaitu] okwingi munonga.” (Shoma Zaaburi 43:4.) N’obu twakuba nituraba mu mbeera ki, nitubaasa kuhurira twine oburinzi. N’ahabw’ekyo ka tugumizemu tuhamiire ahari Yehova Obukomooko bw’okushemererwa kwaitu!—Zab. 144:15.
EKYESHONGORO 155 Okushemererwa Kwaitu Ebiro Byona
a Reeba akabokusi “Yesigye Yehova kubaasa kutunga okushemererwa.”
b Nk’eky’okureeberaho, reeba okubuuzibwa kwa Dennis na Irina Christensen aha jw.org omu Ripoota 5 ey’Akakiiko Akareeberezi 2023.
c ENSHOBOORORA Y’EKISHUSHANI: Munyaanyazi-itwe yaagura ebintu bingi, kwonka kubaasa kutunga okushemererwa, yaagurira munyaanyazi-itwe okuzire ebimuri orikwetenga kugarurwamu amaani.