Oku Orikubaasa Kutunga Obusingye n’obu Haraabe Hariho Entaro n’Obutabanguko
Gary owaabaire ari omu mahe naagira ati: Ntakeegire Baibuli, nkaba ntarikumanya ahabw’enki hariho obushaarizi bwingi, obutari buringaaniza, n’oburemeezi omu nsi. Kwonka hati nyine obusingye bw’omu biteekateeko. Niimanya ngu Yehova Ruhanga naija kuhindura ensi egi omwanya gw’obuteeka.”
Amazima gari ngu, Gary tiwe wenka orikwehurira atyo. Yetegyereze oku Baibuli ehweraire abandi.
BAIBULI NEEGIRA ETI: “Iwe, [Yehova] ori murungi, orahuka kusaasira.”—Zaaburi 86:5.
EKI NIKITUGASIRA KITA? “Ekyahandiikirwe eki nikimpamiza ngu Yehova n’omunyambabazi. Niimanya ngu naayenda kunsaasira byona ebi naakozire ndikurwana omu rutaro.”—Wilmar, Colombia.
BAIBULI NEEGIRA ETI: “Nimpanga eiguru risya n’ensi nsya, ebya ira tibiriijukwa, n’obu kwakuba okuteebwaho omutima.”—Isaaya 65:17.
EKI NIKITUGASIRA KITA? “Ebyabaireho omu rutaro nibindeetera ebirooto bibi, kuburwa oturo, okutiina munonga, enaku n’obusaasi bw’omu mutima. Kwonka ekyahandiikirwe eki nikinyijutsya ngu juba Yehova naija kwihiraho kimwe ebiteekateeko bibi otwariremu n’ebirooto bibi ebindikutunga hati. Tibirigaruka kwija omu biteekateeko byangye n’omu mutima. Buzima ekyo ka n’ekihembo kirungi!”—Zafirah, United States.
BAIBULI NEEGIRA ETI: “Omu biro bye abahikiriire baryagogyeera, bagire obusingye bwingi okuhitsya obu okwezi kuriburira kimwe.”—Zaaburi 72:7.
EKI NIKITUGASIRA KITA? “Ninkira kuteekateeka aha bigambo ebyo. Juba, entaro n’oburemeezi obu zirikuretaho nibiija kuhweraho kimwe, kandi titurigaruka kwerarikirira aha burinzi bw’abakundwa baitu.”—Oleksandra, Ukraine.
BAIBULI NEEGIRA ETI: “Abantu baawe abaafiire baryaba abahuriire. . . . Imwe abatuura omu mucuucu, musisiimukye, mweshongore ahabw’okushemererwa!”—Isaaya 26:19.
EKI NIKITUGASIRA KITA? “Baingi aha b’eka yangye bakaitirwa omu kiita bantu ky’aba Tutsi. Kwonka ekyahandiikirwe eki nikimpamiza kimwe ngu ninyija kugaruka mbareebe. Nyine ekihika ky’okuhurira amaraka gaabo g’okushemererwa baaheza kuzooka!”—Marie, Rwanda.
BAIBULI NEEGIRA ETI: “Bwanyima y’akaanya kakye omubi aryaba atakiriho . . . Kwonka abacureezi baryahungura ensi, beesiime ahabw’okugira obusingye bwingi.”—Zaaburi 37:10, 11.
EKI NIKITUGASIRA KITA? “N’obu orutaro ruraabe rwahendeire, hakiriho abantu babi n’obutari buringaaniza. Ebyahandiikirwe ebi bimpweraire munonga. Yehova naareeba buri kimwe kandi naayetegyereza embeera yangye. Naaraganisa ngu juba okubonabona kwona nikwija kuhwaho kandi kwebere kimwe.”—Daler, Tajikistan.
Abantu abaagambwaho omu magaziini egi ni bamwe aha Abajurizi ba Yehova baingi abu Baibuli ehweraire kutunga obusingye. Beegire kusingura okushoroora omu rangi, omu mahanga, omu nganda, kandi tibarikubiika enziika. (Abaefeso 4:31, 32) Abajurizi ba Yehova tibarikugwera rubaju omu by’obutegyeki, kandi tibarikwejumba omu bikorwa by’obushaarizi.—Yohaana 18:36.
Kandi, nibahwera bataahi baabo omu nsi yoona nk’eka emwe. (Yohaana 13:35) Nk’eky’okureeberaho, Oleksandra, owaaba yaagambirweho, we na munyaanya bakahungira omu ihanga erindi ahabw’orutaro. Naagira ati: “Ku twarabire aha mwatano, ahonaaho tukareeba Abajurizi ba Yehova ab’omu kicweka ekyo abaabaire baizire kutwakiira. Obuhwezi obu baatuhaire bukatuhwera kumanyiira embeera n’okutuura omu ihanga eritwahungiiremu.”
Nitukweta na rukundo mpango kutwegaitaho omu nteerane zaitu ahu turikwegyera obutumwa bwa Baibuli obw’obusingye n’oku turikubaasa kubugyenderaho. Za aha jw.org kumanya omwanya gw’enteerane ogukuri haihi, nari oshabe okwegyesibwa Baibuli n’omwe aha Bajurizi ba Yehova ahabwa busha, murikukoresa ekitabo Yesiimire Amagara Ebiro Byona