Shagika Yesu Omureeberezi Waitu

1. Niki eki Yehova arikwenda hati?

HATI Ruhanga naayenda ngu amakuru marungi g’Obukama gabuurirwe omu nsi yoona. (Mak. 13:10; 1 Tim. 2:3, 4) Ogu n’omurimo gwa Yehova, kandi ni kikuru kureeba ngu atooraine Omwana we omukundwa kuba niwe yaagwebembera. Nitubaasa kuhamya ngu obu Yesu orikwebaasa niwe arikutwebembera, omurimo ogu nigwija kuhendera nk’oku Yehova arikwenda.—Mat. 24:14.

2. Nituza kushwijuma ki omu kicweka eki?

² Omu kicweka eki, nituza kureeba oku Yesu arikukoresa ‘omwambari omwesigwa kandi ow’obwengye,’ kutuha eby’okurya by’omwoyo n’okutebeekanisa abakuratsi be ahabw’ehururu mpango y’okubuurira erikukirayo omu byafaayo. (Mat. 24:45) Kandi nituza n’okureeba oku buri omwe ahariitwe arikubaasa kushagika Yesu n’omwambari omwesigwa.

YESU NAAREEBERERA OMURIMO GW’OKUBUURIRA

3. Yesu akaheebwa bushoboorozi ki?

³ Yesu niwe arikureeberera omurimo gw’okubuurira. Eki nitubaasa kukihamya tuta? Obwire bukye Yesu atakagiire omu iguru, akabugana bamwe aha bakuratsi be abeesigwa aha rushozi omuri Galilaaya. Akabagira ati: “Mpairwe obushoboorozi bwona omu iguru n’omu nsi.” Yetegyereze ebigambo ebi yaakuratsizeho: “N’ahabw’ekyo mugyende omu mahanga goona, muhindure abantu abeegi.” (Mat. 28:18, 19) N’ahabw’ekyo, oyihireho obujunaanizibwa obu Yesu aine, akaheebwa n’obushoboorozi bw’okwebembera omurimo gw’okubuurira.

4. Ahabw’enki turikubaasa kuhamya ngu Yesu na hati naakireeberera omurimo gw’okubuurira?

⁴ Yesu akagira ngu omurimo gw’okubuurira n’okuhindura abantu abeegi gukaba nigwija kukorwa “omu mahanga goona,” kandi akaba naija kuguma n’abakuratsi be “ebiro byona okuhitsya obu [entebeekanisa y’ensi] egi” yaakuhwaireho. (Mat. 28:20) Ebigambo ebi nibyoreka gye ngu Yesu akaba naija kugumizamu naareeberera omurimo gw’okubuurira, kuhitsya omu bunaku bwaitu.

5. Twine mwanya ki omu kuhikiiriza obunabi oburi omuri Zaaburi 110:3?

⁵ Yesu akaba ateerarikiriire ngu tiharikwija kubaho abakozi barikumara omu bwire bw’emperu. Akaba naamanya ngu ebigambo by’obunabi eby’omuhandiiki wa zaaburi nibiija kuhikiirira. Nibigira biti: ‘Abantu baawe nibaija kwehayo beekundiire aha izooba ry’okugaba engabo.’ (Zab. 110:3) Ku oraabe nooyejumba omu murimo gw’okubuurira, nooshagika Yesu n’omwambari omwesigwa, kandi noohwera omu kuhikiiriza obujunaanizibwa obwo. Omurimo nigugyenda omu maisho kwonka gurimu oburemeezi.

6. Ababuurizi b’Obukama hati nibahikwaho mbeera ki emwe egumire?

⁶ Emwe aha mbeera egumire erikuhika aha babuurizi b’Obukama n’okuhiiganisibwa. Abeehagwire aha mazima, abeebembezi b’ediini, n’ab’eby’obutegyeki nibagamba ebitahikire aha murimo gwaitu gw’okubuurira. Abanyabuzaare, abanyaruganda, n’abu turikukora nabo baahabisibwa pokopoko egi, nibabaasa kutugyemesereza kurekyera aho kuheereza Yehova n’okureka kubuurira. Omu mahanga agamwe, okuhiiganisibwa nikutwariramu okutiinatiinisibwa, okukwatwa, nangwa n’okukomwa. Entwaza egi terikututangaaza. Yesu akagira ati: ‘Nimwija kwangwa amahanga goona ahabw’eiziina ryangye.’ (Mat. 24:9) Ahabw’okugira ngu turiyo nitwangwa, n’obuhame ngu nitusiimwa Yehova. (Mat. 5:11, 12) Omuregi niwe ari enyima y’okuhiiganisibwa oku. Kwonka tarikwinganisa na Yesu amaani! Ahabw’obushagiki bwa Yesu, amakuru marungi gariyo nigahika aha bantu b’amahanga goona. Yetegyereze obuhame obu.

7. Ni buhame ki oburikworeka ngu ebiri omu Okushuuruurwa 14:6, 7 biriyo nibihikiirira?

⁷ Ekindi ekirikugumira ababuurizi b’Obukama n’endimi zitarikushushana. Omu kushuuruurwa oku Yesu yaahaire entumwa Yohaana, akooreka ngu omu bunaku bwaitu amakuru marungi gakaba nigaija kusingura embeera egi. (Shoma Okushuuruurwa 14:6, 7.) Mu muringo ki? Nituha abantu baingi nk’oku kirikubaasika omugisha gw’okwikiriza obutumwa bw’Obukama. Hati, abantu omu nsi yoona nibabaasa kushoma ebihandiikirwe ebirikwegamira ahari Baibuli ebiri aha mukura gwaitu jw.org, ahakuba biriho omu ndimi ezirikurenga 1,000! Akakiiko Akareeberezi kakaikiriza ngu ekitabo Yesiimire Amagara Ebiro Byona!, ekikoreso kyaitu ekikuru omu kuhindura abantu abeegi, kivunuurwe omu ndimi ezirikurenga 700! Kandi n’eby’okurya by’omwoyo nibitebeekanisibwa kurabira n’omu vidiyo z’abafiire amatu, n’ebitabo by’abafiire amaisho. Nitureeba obunabi bwa Baibuli burikuhikiirira. Abantu kuruga “omu mahanga aga buri rurimi” bariyo nibeega kugamba orurimi orushemeire orw’amazima ga Baibuli. (Zek. 8:23; Zef. 3:9) Ebi byona nibikorwa ahansi y’obureeberezi bwa Yesu Kristo.

8. Ni birungi ki ebirikuruga omu murimo gwaitu gw’okubuurira?

⁸ Hati, ekibiina kya Yehova kirimu abantu abarikurenga 8,000,000 omu mahanga 240, kandi buri mwaka emitwaro n’emitwaro y’abantu nibabatizibwa! Kwonka ekikuru munonga kukira omuhendo, abeegi basya aba nibataho “omuntu omusya” nari emitwarize y’Ekikristaayo. (Kol. 3:8-10) Baingi bakarekyera aho kuba enshambani, enshaarizi, tibaakishoroora bandi, kandi tibarikuhimbisiriza amahanga gaabo ekirenga. Obunabi oburi omuri Isaaya 2:4 buriyo nibuhikiirira, ‘tibarikwega eby’engamba.’ Twateeraho kutaho emitwarize misya, nituhwera abantu kwija omu kibiina kya Ruhanga, kandi nitworeka ngu nitukuratira omureeberezi waitu Kristo Yesu. (Yoh. 13:35; 1 Pet. 2:12) Ebi byona tibirikubaho bubaho. Yesu naatuha obuhwezi obu turikwenda.

YESU OKUTOORANA OMWAMBARI

9. Kurugiirira ahari Matayo 24:45-47, Yesu akagira ngu hakaba nihaija kubaho ki omu biro by’emperu?

⁹ Shoma Matayo 24:45-47. Yesu akagira ngu omu biro by’emperu, akaba naija kutoorana ‘omwambari omwesigwa kandi ow’obwengye’ kuha abakuratsi be eby’okurya by’omwoyo. N’ahabw’ekyo omwambari ogwo ashemereire kuba ari omweziriki omu bunaku obu. Kandi buzima nikwo kiri. Omureeberezi waitu atwire naakoresa abashaija bakye ab’entoore kuha abantu ba Ruhanga n’abarikukunda amazima eby’okurya by’omwoyo ‘omu bunaku obuhikire.’ Abashaija aba tibarikwereeba nk’abarikutegyeka okwikiriza kwaitu. (2 Kor. 1:24) Kureka, nibamanya ngu Yesu Kristo niwe “omwebembezi kandi omutegyeki” w’abantu be.—Isa. 55:4.

10. Ni kitabo ki aha birikworekwa omu kishushani ekyakuhweraire kutandika kugyendera omu muhanda ogurikuhitsya omu magara agatahwaho?

¹⁰ Kuruga 1919, omwambari omwesigwa atwire naatebeekanisa ebitabo ebirikuhwera abasya kuroza aha by’okurya by’omwoyo omurundi gwabo ogw’okubanza. Omuri 1921, omwambari akatebeekanisa ekitabo The Harp of God kuhwera abarikwenda kumanya amazima kwega enyegyesa za Baibuli ezirikutandikirwaho. Obwire ku bwahindukire, hakashohozibwa ebitabo ebindi. Ni kitabo ki ekyakuhweraire kumanya Sho ow’omu iguru n’okumukunda? Mbwenu shi ni “Let God Be True,” The Truth That Leads to Eternal Life, You Can Live Forever in Paradise on Earth, Okumanya Okurikwebembera Okuhitsya omu Magara Agatahwaho, Niki Eki Baibuli Buzima Erikwegyesa?, Niki Eki Turikwega omu Baibuli?, nari ni Yesiimire Amagara Ebiro Byona! ekitabo kyaitu ekisya. Ebitabo ebi byona bikatebeekanisibwa kugira ekigyendererwa eki byahikiiriza obu byashohozibwa.

11. Ahabw’enki ni kikuru ngu twena tutungye eby’okurya by’omwoyo?

¹¹ Abasya tibo bonka abashemereire kutunga eby’okurya by’omwoyo ebigumire. Twena twine kubitunga. Entumwa Paulo akahandiika ati: “Eby’okurya ebigumire bishemereire abakuru.” Paulo akongyeraho ngu okugyendera aha buhabuzi bw’eby’okurya by’omwoyo ebyo kikaba nikiija kutuhwera “kutaanisa ekirungi n’ekibi.” (Heb. 5:14) Omu biro bigumire ebi obu emicwe esiisikaire munonga, nikibaasa kuguma kuhamira aha mitindo ya Yehova. Kwonka Yesu naahamya kureeba ngu twatunga amaani kurabira omu by’okurya birungi eby’omwoyo. Obukomooko bw’eky’okurya ebi n’Ekigambo kya Ruhanga Baibuli. Omwambari omwesigwa naatebeekanisa eby’okurya by’omwoyo kandi abyohereza arikwebemberwa Yesu.

12. Nka Yesu, tworekire tuta ngu nitutwara tuta eiziina rya Ruhanga nka rikuru?

¹² Kushushana na Yesu, tubaasize kuha eiziina rya Ruhanga ekitiinisa ekirishemereire. (Yoh. 17:6, 26) Nk’eky’okureeberaho, omuri 1931 tukatunga eiziina Abajurizi ba Yehova, eririkworeka ngu twine omukago guhami na Tataitwe ow’omu iguru. (Isa. 43:10-12) Kandi kuruga Okwaikumi omwaka ogwo, eiziina rya Ruhanga ritwire niriizira aha kipampagare kya buri magaziini egi. Kandi, omu Baibuli eya New World Translation of the Holy Scriptures eiziina rya Ruhanga ribaasize kugarurwa omu myanya yaaryo yoona. Eki ka nikitaanira kimwe n’amakanisa ga Kristendomu agarikwiha eiziina Yehova omu nvunuura za Baibuli enyingi!

YESU OKUTEBEEKANISA ABAKURATSI BE

13. Niki ekirikukuhamiza ngu Yesu naakoresa ‘omwambari omwesigwa kandi ow’obwengye’ hati? (Yohaana 6:68)

¹³ Yesu kurabira omu ‘mwambari omwesigwa kandi ow’obwengye,’ ataireho ekibiina ky’omutaano omu nsi eky’okwenegyeza okuramya okushemeire. Ekibiina eki nookireeba ota? Obundi noobaasa kuba nooyehurira nk’entumwa Petero, owaagizire Yesu ati: “Nituza ahari oha? Ka niiwe oine ebigambo by’amagara agatahwaho.” (Yoh. 6:68) Mbwenu buri omwe ahariitwe ku ari nkahi ku ogire ngu tituraizire omu kibiina kya Yehova? Kurabira omu kibiina eki, Kristo naahamya ngu twariisibwa gye omu by’omwoyo. Kandi naatutendeka kuhikiiriza gye obuheereza bwaitu. Ekindi, naatuhwera kutaho ‘omuntu omusya,’ kugira ngu tushemeze Yehova.—Efe. 4:24.

14. Ogasiirwe ota ahabw’okuba omu kibiina kya Yehova omu bwire bwa muyego ya COVID-19?

¹⁴ Yesu naaha obuhabuzi bw’obwengye omu bwire bugumire. Emigasho y’obuhabuzi obwo ekareebwa butunu ku haabarukireho muyego ya COVID-19. N’obu baingi omu nsi baraabe baabaire batarikumanya eki baine kukora, Yesu akahamya ngu twatunga obuhabuzi oburikwetegyerezibwa gye kugira ngu tugume turi buhooro. Tukahigwa kujwara obushankara twaba turi omu rweteeraine, n’okutahikaana n’abandi. Abareeberezi bakaijukibwa kuguma nibahurizana na buri omwe omu kibiina kumanya oku bari omu by’omubiri n’eby’omwoyo. (Isa. 32:1, 2) Kandi tukaguma nitutunga obuhabuzi obundi kurabira omu ripoota z’Akakiiko Akareeberezi.

15. Tukaheebwa buhabuzi ki aha bikwatiraine n’enteerane n’okwejumba omu kubuurira omu bwire bw’ekigwererezi, kandi harugiremu ki?

¹⁵ Omu bwire bw’ekigwererezi ekyo, tukatunga n’obuhabuzi burungi oburikukwata aha kugira enteerane z’ekibiina n’okwejumba omu murimo gw’okubuurira. Omu kaire kakye, tukatandika kuza omu nteerane z’Ekikristaayo, empango ez’ekiro kimwe, n’ez’ebiro bishatu turikuhurizanira aha vidiyo. Haihi twena tukatandika n’okubuurira turikukoresa amabaruha n’amasimu. Yehova akaha omugisha okuteeraho kwaitu. Ofiisi z’amataagi enyingi zihaire ripoota ezirikworeka ngu omuhendo gw’ababuurizi gweyongyeire. Nangwa, baingi batungire eby’okureeberaho ebirikugaruramu amaani omu bwire obu.—Reeba akabokusi “Yehova Naaha Omugisha Okubuurira Kwaitu.”

16. Twine buhame ki?

¹⁶ Abamwe nibabaasa kuba baateekateekire ngu ekibiina kiriyo nikirengyesereza omu kwegyendesereza aha bikwatiraine n’ekigwererezi. Kwonka bwanyima y’obwire, kikareebwa butunu ngu obuhabuzi obu twahairwe bukaba buri obw’obwengye. (Mat. 11:19) Kandi twateekateeka aha muringo gwa rukundo ogu Yesu arikwebemberamu abantu be, twine obuhame ngu n’obu haakubaho ki omu biro by’omumaisho, Yehova n’Omwana we omukundwa nibaija kuba bari naitwe.—Shoma Abaheburaayo 13:5, 6.

17. Nooyehurira ota ahabw’okukorera ahansi y’obwebembezi bwa Yesu?

¹⁷ Ka twine omugisha gw’amaani ogw’okukorera ahansi y’obureeberezi bwa Yesu! Turi omu kibiina ekirikusingura embeera zigumire zoona, nk’ez’enganda, amahanga, n’endimi. Nituriisibwa gye omu by’omwoyo, kandi tutendekirwe gye kwejumba omu murimo gw’okubuurira. Buri omwe omu kibiina naahwerwa kugira emitwarize emisya, kandi nitwega n’okukundana. Buzima tuhikire kwesiimira omu mureeberezi waitu Yesu!