“Hati Ninkunda Obuheereza!”

NKABA NTAKIINE KUSHEMERERWA

Eky’obusaasi, ku naahikize emyaka y’obushogoyo, omukago gwangye na Yehova gukatuuba. Okaba nooshusha ngu abu ndikushoma nabo baine obugabe obutaine bugarukiro, kandi naanye nkaba niinyenda kugira obugabe nk’obwabo. Eby’okukuratira eby’abazaire bangye n’emitindo y’Ekikristaayo bikambeera nk’omugugu, n’eby’omwoyo bikaba nibireebeka nk’ebigumire. N’obu ndaabe ntarabangaanise okubaho kwa Yehova, nkatandika kwehurira nk’ori hare nawe.

Kwonka nketaantara kubarwa nk’otakibuurira, ndikuguma nimpa Yehova oburagarikira. Nkaba nza omu kubuurira nteetebeekaniise, n’ahabw’ekyo kikaba nikingumira kutandika nari kugumizamu ekigaaniiro. N’ekyarugiremu, obuheereza bwangye bukaba butarikurugamu ebirungi kandi nkaba ntaine n’okushemererwa, naayongyera kutamwa okubuurira. Nkaba niinyebuuza, ‘omuntu naabaasa ata kukora eki buri saabiiti, buri kwezi?’

Kuza kuhitsya emyaka 17, nkaba niinyendera kimwe kwetongora. N’ahabw’ekyo nkapakira ebintu byangye omu nshaho, naaruga omu ka naaza Australia. Abazaire bangye bakagira obusaasi kundeeba ningyenda. Bakaba nibeerarikirira, kwonka bakaba nibateekateeka ngu ninyija kugumizamu n’entebeekanisa yangye ey’eby’omwoyo.

Omuri Australia, nkeyongyerera kimwe kugaruka ahansi omu by’omwoyo. Nkatandika kwosha enteerane. Nkanywana eminyeeto abaabaire nibashushana naanye barikuza omu ruteerane omwabazyo ogumwe, reero ogundi bakaza aheeru kunywa n’omu myanya y’okuziniramu nyekiro. Naareeba enyima, ninyetegyereza ngu nkaba ntaire ekigyere kimwe omu mazima ekindi nkitaire omu nsi, kwonka buzima nkaba ntaine ahu mpamiire.

NKEEGA EISHOMO RIKURU ERI NAABAIRE NTARIKUMANYA

Bwanyima y’emyaka ebiri, nkabuganaho kakye na munyaanyazi-itwe owaandeeteire kuteekateeka ahari nyentsya yangye. Nkaba nintuura omu nju emwe na banyaanyazi-itwe bataano, reero twataayaayisa omureeberezi orikutaayaayira ebibiina n’omukazi we, Tamara kumara saabiiti. Iba ku yaabaire aba naakora emirimo y’ekibiina, tukaba tumara obwire na Tamara turikusheka hamwe. Ekyo kikaanshemeza. Akaba ari omuntu w’abantu orikuhikwa. Kikaantangaaza kureeba omuntu w’eby’omwoyo nk’ogwo arikuzaana naitwe munonga ati.

Tamara akaba ari omukazi orikushemererwa. Rukundo ei yaabaire ainiire amazima n’obuheereza bikaba nibiturira. Akaba ashemereirwe arikuha Yehova ekirikukirayo oburungi, obwo nyowe nyine enaku ndikumuha oburagarikira. Emiteekateekyere ye mirungi n’okushemererwa kwe okurikuruga aha mutima bikampwera munonga. Eky’okureeberaho kye kikandeetera kuteekateeka aha mazima makuru g’Ebyahandiikirwe eki ngu, Yehova naayenda ngu tumuheereze ‘tushemereirwe’ kandi turikuteera n’akaari k’okushemererwa.​—Zab. 100:2.

OKUGARUKA KUKUNDA OBUHEEREZA

Nkaba niinyenda kutunga okushemererwa nk’okwa Tamara, kwonka kikaba nikinyetengyesa kukora empindahinduka mpango. Kikatwara obwire, kwonka nkarugaho naatandika kuteera orutambwe. Nkatandika kutebeekanisiza obuheereza, kandi obumwe n’obumwe nkaba mba payoniya omuhwezi. Eki kikampwera kutuubya aha kwetiina n’okwongyera kweyikiririzamu. Ku naagumire ninkoresa Baibuli munonga omu kubuurira, nkagira okumarwa okwabuzima. Omu bwire bukye, nkatandika kuba payoniya omuhwezi buri kwezi.

Nkatandika kunywana boona abaabaire nibakora gye omu kibiina, kandi abarikukunda kuheereza Yehova. Eky’okureeberaho kyabo kirungi kikampwera kumanya ebi nyine kwebembeza n’okugira entebeekanisa nungi ey’eby’omwoyo. Nkatandika kukunda obuheereza, kandi naahendera mbaire payoniya ow’obutwire. Omurundi gw’okubanza omu myaka egyo yoona, nibwo naahurira nshemereirwe kandi nyijwire omu kibiina.

NKATUNGA PAYONIYA OW’OKUBUURIRA NAWE OBUTWIRE

Bwanyima y’omwaka, nkabugana Alex, omuntu omunyambabazi, kandi orikukundikira kimwe Yehova n’obuheereza. Akaba ari omuheereza omu kibiina amazire emyaka mukaaga ari payoniya. Kandi Alex akaba yaaheereizeho omuri Malawi ahu ababuurizi baabaire nibendwa munonga. Obu yaabaire ari omu ihanga eryo, akaba naamara obwire n’abamiisani abaamutereireho eky’okureeberaho kirungi kandi bakamuhiga kugumizamu naayebembeza eby’Obukama.

Omu 2003, nyowe na Alex tukataaha hamwe omu bushwere, kandi tutwire omu buheereza bw’obutwire kuruga obwo. Twegire bingi, kandi Yehova atuhaire emigisha omu miringo mingi.

OMUHANDA GW’OKWONGYERA KUTUNGA EMIGISHA

Omu 2009, tukoherezibwa kuheereza Timor-Leste, nk’abamiisani omu ihanga rikye ririkushangwa omu bizinga bya Indonesia. Kikatutangaaza munonga, kyatushemeza kwonka twagiramu n’obwoba. Bwanyima y’ameezi ataano, tukahika omu Dili orurembo orukuru orw’eihanga eryo.

Embeera omu ihanga eryo zikaba nizitaana aha zi twabaire tumanyiriire. Tukaba twine kumanyiira entwaza nsya, orurimi, eby’okurya, n’embeera zaayo. Omu buheereza, tukaba nitukira kubuurira abantu abooro, abateegire gye, n’abarikubonabonesibwa. Kandi tukaba nitushangayo baingi abaine enkojo aha mubiri n’omu nyehurira ahabw’entaro n’eby’obushaarizi.a

Obuheereza bukaba nibushemeza! Nk’eky’okureeberaho, eizooba rimwe nkabuurira omwishiki w’emyaka 13 orikwetwa Maria.b Nyina akaba afiire emyaka mikye enyima, kandi akaba atarikukira kureeba ishe. Maria kushushana n’abaana baingi ab’orwingano rwe, akaba ataine bigyendererwa byona. Ninyijuka obu yaarira arikuungambira enyehurira ze. Kwonka, nkaba ntarikwetegyereza ebi arikugamba ahabw’obutamanya gye orurimi rwe. Nkashaba Yehova, kumpwera kumugumya, reero naatandika kumushomera Ebyahandiikirwe ebirikubaasa kumuhuumuriza. Emyaka mikye eyaakuratsireho nkareeba oku amazima gaahwereire Maria kuhinduka omu ndeebeka ye n’omu mitwarize. Akabatizibwa, kandi hati aine abeegi ba Baibuli abu arikwegyesa. Hati, Maria aine eka mpango ey’eby’omwoyo kandi agarukire yaagira amatsiko.

Yehova ariyo naaha omugisha omurimo gw’okubuurira omuri Timor-Leste. N’obu ababuurizi abariyo baraabe baabatizibwe omu myaka ikumi yonka, baingi aharibo ni baapayoniya, abaheereza, nari abareeberezi. Abandi nibaheereza aha ofiisi y’okuvunuura kandi nibahwera omu kushohoza eby’okurya by’omwoyo omu rurimi rwabo. Nkaba ninshemererwa kuhurira nibeshongora omu nteerane, baine akamwenyo aha maisho, n’okureeba nibatunguuka omu by’omwoyo.

OKUSHEMERERWA OKU NAABAIRE NTARIKUTEEKATEEKA KUTUNGA

Obuheereza bwaitu omuri Timor-Leste bukaba nibutaanira kimwe ahabw’omuri Australia, kwonka tukatunga okushemererwa oku twabaire tutarikuteekateeka kutunga. Obumwe, tukaba tugyendera omu kabaasi karimu abantu baingi, eby’enyanja byomire, n’ebiba by’emboga kuruga omu katare. Ebiro ebimwe, tukaba twegyesa abeegi ba Baibuli omu bwire bw’omushana mwingi n’empiita omu maju gatarimu siminti n’enkoko zirikwetara buri hamwe. Kwonka, n’omu mbeera ezo ezigumire, nkaba ninkira kuteekateeka nti: ‘Eki buzima ka nikishemeza!’

Ku ndikureeba enyima, ninsiima abazaire bangye abakozire kihango kunyegyesa emihanda ya Yehova kandi bakaanshagika omu myaka yangye y’obushogoyo eyaabaire etoorobi. Ebiri omu Enfumu 22:6 bibaasize kuhikiirira ahariinye. Tata na maawe, nibatwesiimisa nyowe na Alex, kandi nibashemererwa kutureeba nituheereza Yehova. Kuruga 2016 tutwire nitutaayaayira ebibiina omu kicweka ekiri ahansi y’eitaagi rya Australasia.

Kigumire kwikiriza ngu omu kubanza nkaba ntarikukunda omurimo gw’okubuurira. Hati ninkundira kimwe obuheereza! Nyetegyereize ngu n’obu haakubaho ki okushemererwa okwabuzima nikuruga omu kuheereza Yehova n’omutima gwaitu gwona. N’amazima, omu myaka 18 ei mmazire na Alex turikuheereza Yehova niyo nkizireyo kutunga okushemererwa. Hati ninyetegyereza amazima g’ebigambo by’omuhandiiki wa Zaaburi Daudi, owaagambire ahari Yehova ati: ‘Boona abarikukuhungiraho bashemererwe, bagume bateere akaari ahabw’okunanuka. Kandi n’abarikukunda eiziina ryawe bashemerererwe omuriiwe.’​—Zab. 5:11.