Oku Orikubaasa Kutuura omu Nsi Ensya

Ebicweka eby’enyima nibyoreka ngu Ruhanga ari haihi kucwekyereza ababi boona, kandi amareho n’oburemeezi bwona. Nitubaasa kuhamya ngu eki nikiija kubaho. Ahabw’enki? Ahakuba Ekigambo kya Ruhanga Baibuli nikiraganisa kiti:

“Ensi egi neehwaho.”—1 YOHAANA 2:17.

Nitubaasa kuhamya ngu nihaija kubaho abaraahonokyeho ahakuba omushororong ogwo nigugumizamu guti:

‘Orikukora ebi Ruhanga arikukunda, naagumaho ebiro byona.’

N’ahabw’ekyo, kubaasa kuhonokaho twine kukora ebi Ruhanga arikukunda. Kubaasa kumanya ebi Ruhanga arikukunda, twine kubanza twamumanya.

‘MANYA RUHANGA’ KUBAASA KUHONOKAHO AHA MPERU

Ebishushani: 1. Omunaasi arotami omu irwariro, aruhire kandi ashobeirwe. 2. Yaahuumuraho kugira eki yaanywa reero yaareeba omukozi mugyenzi we ashemereirwe naashoma magaziini. 3. Yaamushomera ekyahandiikirwe omu Baibuli kandi yaamuha kaada ya jw.org.

Yesu akagira ati: “Aga nigo magara agatahwaho, okumanya iwe Ruhanga omwe ow’amazima.” (Yohaana 17:3) Kubaasa kuhonokaho aha mperu tukagumaho ebiro byona, ‘twine kumanya’ Ruhanga. Okumanya Ruhanga nikikira aha kumanya bumanya ngu Ruhanga ariho nari kumanya bikye ebirikumukwataho. Nikitwariramu okuba banywani be. Twaba nitwenda kugira omukago murungi n’omuntu, twine kutamu obwire bwaitu. Nikyo kimwe n’omukago gwaitu na Ruhanga. Teekateeka aha mazima makuru ga Baibuli agarikutuhwera kugira omukago murungi na Ruhanga, n’okwongyera kuguhamya.

Amazima Agu Turikwega omu Baibuli

Nitwega ngu Ruhanga akaba naayenda ngu abantu batuure omu Paradiso.

Akahanga abantu b’okubanza, Adamu na Haawa, kandi yaabata omu mwanya murungi ogurikwetwa omusiri Edeni. Bakaba bahikiriire, kandi Ruhanga akaba abahaire buri kimwe ekirikwetengyesa kushemererwa omu nsi. Bakaba nibabaasa kugumaho ebiro byona. Ku baagumire bari banywani ba Ruhanga, bakaba batarikwija kufa. Kwonka bakacwamu kugomera ekiragiro kyorobi eki Ruhanga yaabahaire.

Nitwega enshonga ahabw’enki hati hariho okubonabona kwingi.

Omuntu w’okubanza Adamu ku yaagomiire Ruhanga akafeerwa omugisha gw’okugumaho ebiro byona n’abantu abandi boona. Baibuli neeshoboorora eti: ‘Ekibi kikaija omu nsi ahabw’okushiisha kw’omuntu omwe kandi kyarugamu okufa, n’okufa kwabuga omu bantu boona.’ (Abarooma 5:12) Nk’oku omuntu arikubaasa kuhungura akamogo aha bazaire be, nikwo n’abaana b’Adamu boona baahungwire obutahikiirira ahariwe. Ekyarugiremu, nitukura kandi tufa.

Nitwega eki Ruhanga yaaherize kutukorera kubaasa kutuhwera.

Baibuli neegira eti: “Oku nikwo Ruhanga yaakunzire atyo ensi, akahayo Omwana we omwe nyamunegyere, ngu omuntu weena orikumwikiriza arekye kuhwerekyerera, kureka atungye amagara agatahwaho.” (Yohaana 3:16) Ruhanga akatuma Yesu omu nsi kuhayo amagara ge ahabwaitu. Prabhakar ow’emyaka 86 kuruga India arikugamba aha kikorwa kya Ruhanga ekyo ekya rukundo, naagira ati: “Nikyoreka rukundo mpango ei Yehovaa anyiniire. Rukundo ye empaire amatsiko g’amagara agatahwaho.”

Nitwega oku turikubaasa kusiima Ruhanga ahabw’eki yaatukoreire.

Baibuli neeyoreka ngu nitubaasa kusiima Ruhanga ahabw’eki yaatukoreire ‘turikukora ebi arikuturagiira.’ (1 Yohaana 2:3) Yehova Ruhanga naatworeka omu muringo gwa rukundo oku turikubaasa kushemererwa obunaku obu. (Isaaya 48:17, 18) Ruhanga tarikwenda ngu tubonabone. Naaturaganisa ngu twakuratira obuhabuzi bwe, titurikwija kushemererwa hati kyonka kureka nitwija n’okutunga omugisha gw’okutuuraho ebiro byona.

SHOMA EKIGAMBO KYA RUHANGA, BAIBULI BURI IZOOBA

Omunaasi naareeba ahaiguru bwanyima y’okushoma Baibuli omu bwire bwa kyamushana. — Noobaasa kuhonokaho aha mperu y’ensi egi orikushaba Ruhanga obuhwezi n’okukora ebi arikukunda

Niturya eby’okurya butoosha kuguma tuhuriire. Kwonka Yesu akagira ati: ‘Omuntu tarikutungwa by’okurya byonka, kureka n’ekigambo kyona ekirikuruga omu kanwa ka Ruhanga.’—Matayo 4:4.

Obunaku obu, ebigambo bya Yehova nitubishanga omu Baibuli. Waaba nooyega ebiri omu kitabo eki ekirikwera, noija kumanya amazima makuru agarikukwata aha ku Ruhanga yaakoragaine n’abantu ira, omu bunaku obu, n’oku araakikore omu biro by’omumaisho.

SHABA RUHANGA OBUHWEZI

Noobaasa kukora ki waaba nooyenda kukuratira obuhabuzi bwa Ruhanga, kwonka orikugumirwa kurekyera aho kukora ebi arikugira ngu bigwire? Obwo, okumanya Ruhanga nikiija kukuhwera omu muringo gw’omutaano.

Teekateeka aha mukazi ou turaayete Sakura, owaabaire naayejumba omu bikworwa by’obushambani. Ku yaatandikire kwega Baibuli, akeega aha kiragiro kya Ruhanga ekirikukwata aha ‘kwetantara obushambani.’ (1 Abakorinso 6:18) Sakura akashaba Ruhanga kumuha amaani kandi yaamuhwera kurekyera aho ebikorwa bye bibi. Kwonka akaba aine kuguma naarwanisa okwohibwa. Naagira ati: “Ku naabaire ngira ebiteekateeko bibi, nkaba nshaba Yehova nyihire aha mutima ndikumanya ngu tindikubaasa kusingura ahabwangye nyenka. Amaani g’okushaba gampwereire kwirira haihi Yehova.” Nka Sakura, abantu nyamwingi nibongyera kumanya Ruhanga. Kandi ariyo naabahwera kukora empindahinduka ezirikwetengyesa kubaasa kukora ebirikumushemeza.—Abafilipi 4:13.

Waayongyera kumanya gye Ruhanga nawe naija kwongyera kukumanya gye nka munywani we ow’omuhendo. (Abagalatia 4:9; Zaaburi 25:14) Reero noija kuba ohikire kutaaha omu nsi ensya eya Ruhanga. Kwonka ensi egyo neija kuba neeshusha ki? Ekicweka ekirikukurataho nikiija kugarukamu ekibuuzo ekyo.

a Yehova n’eiziina rya Ruhanga eriri omu Baibuli.