Twine Omugisha gw’Okwombeka n’Okureeberera Ebyombeko by’Obukama

Omurimo gw’okwombeka hekalu gukaba guri muhango kandi gurikutwara esente nyingi. Kwonka, Abaisraeli bakashagika omurimo ogu n’obweziriki. (1 Bus 29:2-9; 2 Bus 6:7, 8) Bwanyima y’Abaisraeli kuheza kwombeka hekalu, okugumizamu nibagireeberera kikaba nikiija kworeka ngu nibatwara eby’omwoyo nka bikuru. (2 Bag 22:3-6; 2 Bus 28:24; 29:3) Obunaku obu, Abakristaayo nibakoresa obwire n’amaani omu kwombeka, okuboneza, n’okureeberera Ebyombeko by’Obukama, n’Ebyombeko eby’Enteerane Empango. Emirimo egi n’ekicweka ky’obuheereza bwaitu oburikwera, twagikora nituba nitukorera hamwe na Yehova kandi ogu n’omugisha gw’amaani.​—Zab 127:1; Kush 7:15.

OKU TURIKUBAASA KUKIKORA . . .

• 

  Turikuboneza buri bwanyima y’enteerane. Embeera yaawe yaaba etarikukubaasisa, kora eki orikubaasa kutsiga omwanya ogu oraashutamemu gushemeire.

• 

  Turikwejumba omu kuboneza n’okureeberera Ekyombeko ky’Obukama butoosha. Abantu baingi baakorera hamwe, nibareetera omurimo gwaba mukye kandi bagukora bashemereirwe.​—lv 92-93 kacw. 18.

• 

  Turikuhayo esente kugushagika. N’obu waakuhayo esente nkye oihire aha mutima nikishemeza Yehova.​—Mak 12:41-44.

• 

  Turikwehayo kuhwera omu kwombeka n’omu kuhunduuza Ebyombeko by’Obukama embeera zaitu zaaba nizitubaasisa. Okukora emirimo egi tikirikwetengyesa ngu obe noomanya kwombeka.