‘Obwengye Bumanyirwa aha Mirimo Yabwo’
1. Abamwe omurimo gwaitu nibagureeba bata?
1 Obumwe abu turikubuurira abatarikutwetegyereza gye nari abagambiirwe ebitahikire aha Bajurizi ba Yehova nibabaasa kutugarukamu omu muringo mubi. Obundi ebi barikututeekateekaho nibirugiirira aha bi batuhuriireho ebitahikire. Omu myanya emwe nitugambwaho kuba “ediini y’akabi eyaarugire omu diini endiijo.” Tushemereire kutwaza tuta abantu baatugambaho ebitahikire nk’ebyo?
2. Niki ekiratuhwere kwetantara kuhwa amaani twagambwaho ebitahikire?
2 Guma Oine Emiteekateekyere Mirungi: Omu kyasha ky’okubanza abantu bakaba batarikwetegyereza Yesu n’abaheereza ba Yehova abandi kandi bakaba babagambaho kubi. (Byak. 28:22) Kwonka, ebigambo ebyo tibirabareetaire kuhemuka ahabw’omurimo gwabo gw’okubuurira. Yesu akagira ati: ‘Obwengye bumanyirwa aha mirimo yabwo.’ (Mat. 11:18, 19) N’obweziriki akagumizamu naakora ebi Ishe arikwenda, aine obwesigye ngu omugasho gw’amakuru marungi gukaba nigwija kureebwa abo abarikusherura amazima. Nitubaasa kwetantara kuhwa amaani turikwijuka ngu Omwana wa Ruhanga nawe akahikwaho ebintu nk’ebyo.
3. Ahabw’enki ebirikutugambwaho ebitahikire n’okuhakanisibwa bitashemereire kututangaaza?
3 Yesu akooreka ngu ensi ekaba neija kwanga abakuratsi be nk’oku yamwangyire. (Yoh. 15:18-20) N’ahabw’ekyo, ebirikutugambwaho ebitahikire n’okuhakanisibwa ebiriho ebiro ebi tibishemereire kututangaaza. Buzima, tushemereire kumanya ngu ebintu nk’ebyo nibiija kweyongyera nk’oku turaagume nitweyongyera omu biro by’emperu kandi nk’oku ekiniga kya Sitaane kirikweyongyera. (Kush. 12:12) Twine kushemererwa ahabw’okuba ebintu ebyo nibyoreka ngu ensi ya Sitaane eri haihi kucwekyerezibwa.
4. Omu kubuurira amakuru marungi, baatugambira omu muringo mubi tushemereire kubagarukamu tuta?
4 Garukamu n’Embabazi: Abantu baatugambira omu muringo mubi, butoosha tushemereire kubagarukamu n’embabazi kandi n’obucureezi. (Enf. 15:1; Kol. 4:5, 6) Kyaba nikibaasika, nitubaasa kushoboororera abantu ab’emitima egororokire ngu hariho bingi ebirikugambwa aha Bajurizi ba Yehova ebitahikire nari nitubaasa kubabuuza ahabw’enki nibateekateeka batyo. Okugarukamu kwaitu n’obucureezi nikubaasa kubareetera kubuuza aha ebi baahuriire aha Bajurizi ba Yehova kandi kibareetere kuhurikiza Abajurizi ba Yehova baabatayaayira omurundi ogundi. Kwonka, ou turikubuurira yaagira ekiniga, nikiba kiri kirungi kumureka. Nitubaasa kuhamya ngu n’obu abandi baakuba nibatureeba bata, Yehova naasiima okubuurira kwaitu.—Isa. 52:7.