Okubuurira Kwaitu Nikworeka Rukundo ei Twiniire Ruhanga
1. Rukundo ei Yesu yaabaire ainiire Ruhanga ekamuhiga kukora ki?
1 Rukundo ekahiga Yesu kwejumba omu kubuurira. Buri kimwe eki Yesu yaakozire omu kubuurira kwe kikorekyera kimwe rukundo ei yaabaire ainiire Yehova. Yesu akagira ati: “Nyowe nkora nk’oku Tata yandagiire, ngu ensi emanye ku mmukunda.” (Yoh. 14:31) Nk’abakuratsi ba Yesu, naitwe twine omugisha gw’okworeka ngu nitukundira kimwe Ruhanga omu kubuurira kwaitu.—Mat. 22:37; Efe. 5:1, 2.
2. Rukundo ei twiniire Ruhanga neekwata eta aha kubuurira kwaitu?
2 “Eiziina Ryawe Ryezibwe”: N’obweziriki twakoresa buri kagisha koona tukabuurira abandi aha birikukwata ahari Yehova n’Obukama bwe, nitworeka ngu nitukunda Ruhanga kandi nituba nituhwera omu kweza eiziina rye. (Zab. 83:18; Ezk. 36:23; Mat. 6:9) Nk’oku Yesu yaakozire omu obuheereza bwe, naitwe okubuurira kwaitu nikworeka ngu nitwenda ngu eiziina rya Yehova ryezibwe n’ebyakunda bikorwe.—Mat. 26:39.
3. Ni mu muringo ki ogu rukundo ei twiniire Yehova erikutuhweramu kusingura oburemeezi?
3 Rukundo Netuhiga Kutaremesibwa Oburemeezi: Rukundo ei twiniire Yehova neeyemera oburemeezi bwona. (1 Kor. 13:4, 7) Yesu akahikwaho oburemeezi bw’emiringo mingi obwabaire nibubaasa kumuremesa okuhikiiriza obuheereza bwe. Kwonka, ku yaabaire ahikwaho oburemeezi, rukundo ei yaabaire ainiire Yehova n’ekyetengo kye ky’okukora ebi Yehova akunda bikaba bimuhwera kubusingura. (Mak. 3:21; 1 Pet. 2:18-23) Naitwe nituhikwaho oburemeezi bwingi kwonka rukundo ei twiniire Ruhanga neebaasa kutuhwera kubusingura. Twakuratira gye eky’okureeberaho kya Kristo, nituhurira tuhami omu kubuurira kwaitu. N’obu amagara mabi, emyaka ya bukuru, okuhakanisibwa kw’ab’omu ka yaitu nari abantu abandi birikubaasa kutuhikaho, tibirikubaasa kutuzibira kworeka rukundo ei twiniire Ruhanga turikwejumbira kimwe omu kubuurira.
4. Okukunda oku twiniire Yehova nikutuha mugisha ki?
4 Rukundo eine amaani, kandi twine omugisha gw’okworeka rukundo eya buzima ei twiniire Ruhanga omu kubuurira kwaitu. (1 Kor. 13:13) Nk’oku turikwirira obwire obu eiziina rya Yehova rirayezibwe omurundi gumwe kikahwa, ‘okukunda kwaitu ka kugume kweyongyere kukanya.’—Fil. 1:9; Mat. 22:36-38.