Omutwarize Mukuru ogw’Omwegyesa Murungi
1. Ni mutwarize ki mukuru ogu omwegyesa murungi ashemereire kuba aine?
1 Niki ekirikutuma omuntu yaaba omwegyesa murungi wa Baibuli? N’obwegyese? N’obwire obu amazire omu mazima? N’okwetegyereza oku aine? N’omutwarize ogurikuhikiiriza ebiragiro ogurikumanyisa abeegi ba Yesu, kandi nigwo mutwarize mukuru gwa Yehova. (Yoh. 13:35; Gal. 5:14; 1 Yoh. 4:8) Ni rukundo. Abeegyesa barungi nibooreka rukundo.
2. Ahabw’enki ni kikuru itwe kugirira abantu rukundo?
2 Kunda Abantu: Omwegyesa Mukuru Yesu, akooreka abantu rukundo kandi ekyo kikabahiga kumuhurikiza. (Luk. 5:12, 13; Yoh. 13:1; 15:13) Twaba nitufayo aha bantu, nitwija kukoresa buri kagisha kubabuurira. Okuhiiganisibwa nari abantu okutakunda mazima tibirikwija kuturemesa kubuurira. Nitwija kworeka ngu buzima nitufayo munonga ahari abo abu turikubuurira kandi nitwija kuhindahindura omu nyanjura zaitu kuhikaana n’embeera zaabo. Nitwija kuba tweteekateekire kugirira obwire buri mwegi waitu wa Baibuli n’okugira obwire bw’okutebeekanisa gye buri kuza kwega nawe.
3. Okukunda amazima ga Baibuli nikiija kutuhwera kita omu kubuurira?
3 Kunda Amazima ga Baibuli: Yesu nawe akaba naakunda amazima ga Baibuli kandi akagatwara nk’eky’eitungo. (Mat. 13:52) Twaba nitukunda amazima, nitwija kubuurira n’omuhimbo kandi eki nikibaasa kuhiga abu turikubuurira kukunda ebi turikubabuurira. Rukundo nk’egyo neija kutuhwera kuta omutima aha makuru g’omuhendo agu turikubuurira, beitu bitari ebi turikuremwa kuhikiiriza, kandi titurikwija kutiina munonga twaba nitubuurira.
4. Nitubaasa kugira tuta rukundo?
4 Teeraho Kugira Rukundo: Nitubaasa kugirira tuta abantu rukundo? Turikuteekateeka munonga ahari rukundo ei Yehova n’Omwana we bainiire abantu n’aha mbeera mbi y’eby’omwoyo ei abantu omu kicweka kyaitu barimu. (Mak. 6:34; 1 Yoh. 4:10, 11) Oku turikukunda amazima nikwija kweyongyera twaguma nitweshomesa Baibuli obutoosha kandi tukateekateeka munonga aha bi turikushoma. Rukundo n’omutwarize ogu omwoyo gurikwera gurikutuhwera kugira. (Gal. 5:22) N’ahabw’ekyo nitubaasa kushaba Yehova kutuha omwoyo gurikwera kandi tumushabe kutuhwera kweyongyera kugira rukundo. (Luk. 11:13; 1 Yoh. 5:14) Okuba abeegyesa barungi ba Baibuli tikurikurugiirira aha bwegyese obu twine, okwetegyereza oku twine nari emyaka ei tumazire omu mazima, kureka nikurugiirira aha kugira rukundo.