Nookoresa Akatabo Reasoning?
1. Entumwa Paulo na Yesu bakaba beegyesa bata abandi?
1 Entumwa Paulo akaba ateeraho ‘kushoboororera abantu kuruga omu Byahandiikirwe.’ (Byak. 17:2, 3; 18:19, NW) Omu kukora atyo, akatooreza Yesu, owaabaire akira kujuriza Ebyahandiikirwe kandi akakoresa eby’okureeberaho kuhwera abamuhurikiize kwetegyereza ebi Ruhanga akunda. (Mat. 12:1-12) Akatabo Reasoning From the Scriptures katebeekanisiibwe kukuhwera kukora nikyo kimwe.
2. Nitubaasa kukoresa tuta akatabo Reasoning okutebeekanisa enyanjura ezirikukora gye?
2 Tebeekanisa Enyanjura Nungi: Akatabo Reasoning From the Scriptures karimu enyanjura nungi aha rupapura 9-15. Okwega n’okukoresa enyanjura zitarikushushana, okukira munonga mwaba nimuheza juba ekicweka eki murikubuuriramu, nikukuhwera kutunga emiringo mingi y’okubuuriramu kandi kukuhwera kumanya emiringo mirungi y’okutandika kubuurira omuntu. Enyanjura nizibaasa kushomwa kuruga omu katabo aka waaba nookoresa esimu kubuurira nari waaba noobuurira orikukoresa amasimu g’aha marembo.
3. Aha rupapura 16-24 omu katabo Reasoning hariho ki ebiraatuhwere omu kubuurira?
3 Oku Turikubaasa Kugarukamu Abarikutwangira Kubabuurira: Nitubaasa kuteekateeka aha bi abarikwanga ngu tutababuurira barikubaasa kugamba kandi tutware obwire tutakagiire kubuurira kweyijutsya ebiri aha rupapura 16-21 kureeba oku turikubaasa kubagarukamu. Abu turikubuurira baaba bari Ababuda, Abahindu, Abayudaaya nari Abasiraamu, nitubaasa kukoresa ebiri aha rupapura 21-24.
4. Batubuuza ekibuuzo nari batuhakanisa aha nshonga emwe nitubaasa kukoresa tuta akatabo Reasoning?
4 Okugarukamu Ebibuuzo: Akatabo Reasoning nikabaasa n’okutuhwera baatubuuza ekibuuzo nari baagira enshonga ei batuhakanisaho. Noobaasa kugambira omuntu ogwo ngu nooyenda kumworeka ekintu kirungi aha nshonga ei yaakubuuza reero okoresa akatabo Reasoning. Obu enshonga zihandiikirwe zikurataine, za aha mutwe omukuru ogu orikuteekateeka ngu guriho ebi orikwenda. Reero oreebe ebibuuzo ebiri ahansi y’omutwe ogwo. Waaba otarahukire kureeba eki orikusherura, za aha muheru gw’akatabo ahansi y’omutwe index. Waaheza kutunga ebirikugamba aha nshonga egyo bimushomere kuruga omu katabo. Mwaba nimuhanuura aha kyahandiikirwe, noobaasa kutunga ebi orikwenda kuruga aha rupapura 445 ahansi y’omutwe “Ebyahandiikirwe Ebirikukira Kushoboororwa Kubi.”
5. Ni migasho ki endiijo ei akatabo Reasoning kaine?
5 Emigasho Endiijo: Abamwe nibatwara akatabo Reasoning aha murimo nari aha ishomero kubaasa kubahwera kugarukamu ebibuuzo nka, ‘Ahabw’enki mutarikukuza ebiro bikuru?’ Eminyeeto eshangire ngu ebirikushangwa ahansi y’emitwe “Okuhanga” na “Okugira ngu Ebintu Tibirahangirwe kureka ngu bakaija nibihindahinduka” nibibahwera aha ishomero baagira eki babashaba kuhandiika aha nshonga egyo. Waaba nooza kutaayaayira omuntu orwaire nari ofeereirwe omukundwa, ebiri ahansi y’omutwe “Okuhuumuriza” nibibaasa kukuhwera obaase kumworeka Ebyahandiikirwe ebirikugaruramu amaani. Akatabo Reasoning kandi karimu ebirikubaasa kuhwera abo abarikuteebekanisa embazo nari abarikwebembera enteerane z’okwetebeekanisa kuza kubuurira.
6. Twaba nitubuurira tushemereire kugira kigyendererwa ki?
6 Twaba nitubuurira, ekigyendererwa kyaitu ti kuhakana n’abantu nari kubagambira bugambira ebintu. Nitwenda kubashoboororera gye turikukoresa Ebyahandiikirwe. Twakoresa gye akatabo Reasoning, nitworeka ngu nitufayo aha ku turikwegyesa.—1 Tim. 4:16.