Tebeekanisa Abasya Kugumisiriza Baahakanisibwa
1 Abamwe ku barikutandika kwega Baibuli kandi ‘bakamariirira kuguma nibatiina Ruhanga,’ Sitaane naateeraho kubaremesa. (2 Tim. 3:12) Nibabaasa kuhakanisibwa abu barikukora nabo, abu barikushoma nabo, nari abataahi. Nikibaasa kuguma na munonga abanyabuzaare baabo baaba nibo baabahakanisa.—Mat. 10:21; Mako 3:21.
2 Okuhakanisibwa Kukarangwa: Abasya bashemereire kwetegyereza ngu nibaija kuhiiganisibwa kandi ekyo nikyoreka ngu n’abeegi ba Kristo ab’amazima. (Yoh. 15:20) Obumwe, abarikubahakanisa nibabaasa kuba batarikwetegyereza nyikiriza y’Abajurizi ba Yehova. Guma noijuka ngu okushemererwa okwingi nikuruga omu kuhemurwa ahabw’okuba omukuratsi wa Yesu n’okworobera Ruhanga. (Byak. 5:27-29, 40, 41) Hamiza abasya ngu Yehova tarikwija kubatsigaho. (Zab. 27:10; Mako 10:29, 30) Okurinda obwesigwa kwabo nikubahwera kuguma aha rubaju rwa Yehova omu nshonga y’obutegyeki.—Enf. 27:11.
3 Omugasho gw’Okumanya Okuhikire: Hwera abeegi baawe ba Baibuli kwetegyereza omugasho gw’okugumizamu kutunga okumanya okuhikire n’obu baakuhikwaho buremeezi ki. Kurabira omu kuhakanisibwa, Sitaane naateeraho kuremesa ebi barikwega kutsimba emizi omu mitima yaabo. (Enf. 4:23; Luka 8:13) Baine kugumizamu kutunga okumanya okuhikire okw’omu Kigambo kya Ruhanga okubaasa kutsimba emizi n’okuhama omu kwikiriza.—Zab. 1:2, 3; Kol. 2:6, 7.
4 Obukuru bw’Okugumisiriza: Omu buremeezi obw’amaani, okugumisiriza ni kukuru kandi nikubaasa kurugamu ebirungi. (Luka 21:16-19) Abasya ku barikugumisiriza omu kuhakanisibwa, nikibagasira kandi kigasira n’abandi. Nibeetegyereza ngu Yehova naaha emigisha mingi abo abarikugumisiriza n’obwesigwa.—Yak. 1:12.
5 Entumwa Paulo akashemerererwa okweyongyera omumaisho omu by’omwoyo okw’ab’eishe-emwe omuri Tesalonika. Akeebaza Ruhanga ahabwabo, kandi baingi omuribo n’abu yaahwereire kwija omu mazima. (2 Tes. 1:3-5) Naitwe nitubaasa kutunga okushemererwa n’okumarwa nk’okwo twatebeekanisa abeegi baitu ba Baibuli kugumisiriza okuhakanisibwa.