Akabokisi K’ebibuuzo

◼ Abazaire bombi nibabaasa kubara eshaaha ezi barikuheza barikwega n’ab’omu maka gaabo butoosha?

N’obu baishe b’abaana baraabe nibo baine kwebembera omu kworora abaana ‘nibabeegyeseza omuri Yehova,’ abazaire bombi nibahwerahwerana omu kutendeka abaana baabo. (Efe. 6:4) Baibuli neehiga abaana eti: “Mwana wangye, guma ohurire ebi sho arikukuhabura, kandi otanga ebi nyoko arikukwegyesa.” (Enf. 1:8) Omuringo gumwe ogu abazaire barikutendekyeramu abaana n’okugira okwega Baibuli okw’amaka.

Enyimaho, omuzaire obaire naayebembera omu kwegyesa abaana baabo abatakabatiziibwe niwe abaire naabara eshaaha, n’obu abazaire bombi babaire nibejumba omu kwegyesa okwo. Eki hati, kihindwirwemu. Abazaire bombi baayejumba omu kwegyesa abaana baabo, obwo bombi nibabaasa kubara eshaaha emwe yonka buri saabiiti nk’ei bakozire omu kubuurira. N’eky’amazima, abazaire okutwarira hamwe nibaheza obwire oburengire aha shaaha emwe buri saabiiti barikwegyesa abaana baabo. Okutendeka abaana nikutwariramu abazaire bombi kuguma nibateeraho kubeegyesa. (Bir. 6:6-9) Kwonka ripoota yaabo y’okubuurira eya buri kwezi na munonga eshemereire kworeka eshaaha ezi baabuuriire beitu zitari ezi bamazire nibeegyesa abaana baabo zonka. N’ahabw’ekyo, tibashemereire kubara eshaaha ezirengire ahari emwe buri saabiiti n’obu okwega okwo kwakuba kwarengize aha shaaha emwe, nari n’obu baakuba beegire na buri mwana okwe. Omuzaire omwe niwe eshemereire kubara omwegi omwe wa Baibuli kandi ngu akeega nawe omurundi gumwe buri saabiiti.