Nitushenyagura Ebigo
1 Okumara emyaka mingi, Sitaane ahabiise abantu baingi arikukoresa enyegyesa z’ebishuba hamwe n’obugobya. Abugize hoona enyegyesa nk’ey’obushatu, omuriro ogutaraara, n’erikugira ngu omuntu naagumizamu kubaho bwanyima y’okufa. Naareetera abantu kubangaanisa aha kubaho kw’Omuhangi n’aha ky’okugira ngu Baibuli ehandiikisiibwe omwoyo gwa Ruhanga. Okushoroora omu rangi n’abantu okukunda munonga amahanga gaabo ni bimwe aha bindi ebirikuremesa abantu kwega amazima. (2 Kor. 4:4) Nitubaasa kuhwera tuta abantu nk’abo okureka enyikiriza nk’ezo ezaatsimbire kare emizi?—2 Kor. 10:4, 5.
2 Ebiteekateeko Nibitwarirwamu: Enyikiriza ezi abantu bakuzire nibeegyesibwa nk’ezihikire nizikwata munonga aha ku barikuteekateeka. Abamwe batwire nibegyesibwa enyikiriza ezo ezigwire kuruga omu buto. Okuhwera abantu nk’abo, nitwetenga kugamba omu muringo ogurikworeka ngu nitubaha ekitiinisa.—1 Pet. 3:15.
3 Nitubaasa kworeka ngu nituha abantu nk’abo ekitiinisa twabareka bakashoboorora ebi barikwikiriza bakooreka n’enshonga ahabw’eki. (Yak. 1:19) Obundi nibateekateeka ngu omuntu naagumizamu kubaho bwanyima y’okufa ahabw’okugira ngu bakafeerwa abakundwa baabo kandi baine ekihika ky’okugaruka kubareeba. Nari nibakuza ebiro bikuru ahabw’okugira ngu nibibaha omugisha kuba hamwe n’ab’omu maka gaabo. Okuhurikiza ebi barikugamba aha bintu nk’ebyo nikituhwera kumanya eki barikuteekateeka kandi n’okubagarukamu omu muringo murungi.—Enf. 16:23.
4 Tooreza Yesu: Yesu akatuteeraho eky’okureeberaho kirungi munonga obu yaagarukamu omushaija owaabaire naamanya gye Ebiragiro. Yesu taramugambiire ebi yaabaire eshemereire kukora, obundi ebyakureetaire omushaija ogwo kwanga ahabw’okukunda enyikiriza ye. Kureka, Yesu akajuriza Ebyahandiikirwe, yaamushaba kugira eki yaabigambaho, kandi yaamuhwera kwetegyereza arikukoresa eky’okureeberaho.—Luka 10:25-37.
5 Amazima g’omu Kigambo kya Ruhanga nigabaasa kureetera omuntu kureka enyegyesa z’ediini ez’ebishuba ezaatsimbire kare emizi. (Heb. 4:12) Twashoboororera abantu amazima n’obugumisiriza, nitubaasa kubahwera kureka enyikiriza z’ebishuba baikirize amazima kubahindura ab’obusingye.—Yoh. 8:32.