Ou Turikubuurira Yaaba Naagamba Orurimi Orundi
1. Ahabw’enki okukwatanisa nikweyongyera kwetengyesa, ebibiina byaba nibibuurira omu kicweka?
1 Emirundi mingi, ababuurizi b’Obukama omu nsi yoona nibakira kutunga abantu abarikwenda kwega Baibuli, kwonka abarikugamba orurimi orutarikukoresibwa omu kibiina kyabo. Okubaasa kuhwera abantu nk’abo omu by’omwoyo, ofiisi z’amataagi zireebire ngu nikyetengyesa okutandikaho ebibiina hamwe na zaaguruupu ezirikukoresa endimi ezo. Obu endimi nyingi zirikubaasa kuba nizigambwa omu kicweka kimwe, ebibiina ebirikukoresa endimi zitarikushushana nibibaasa kuba nibibuurira omu kicweka kimwe. Ebibiina nk’ebyo nibibaasa kukwatanisa bita okuhamya ngu omurimo gw’okubuurira gwakorwa omu muringo ogutebekanisiibwe gye?—1 Kor. 14:33.
2. Twaba nitubuurira enju aha nju, nitubaasa kukwatanisa tuta na guruupu nari ekibiina ekiri omu kicweka eki turikubuuriramu?
2 Okukwatanisa Gye: Omubuurizi yaaba naabuurira aha nguuto nari naabuurira kitaraariire, ashemereire kubuurira buri omwe, otwariiremu n’abo abarikuba nibagamba orurimi orundi, kandi akabaha ebitabo ebiri omu rurimi oru barikukunda kushoma. Kwonka, yaaba naabuurira enju aha nju omu kicweka ekirikubuurirwamu ebibiina ebindi, omubuurizi ashemereire kuta omutima munonga aha maju agarimu abantu abarikugamba orurimi orw’ekibiina kye. Ebibiina ebitarikushushanisa ndimi bya nibibuurira omu kicweka kimwe, nikiba kiri kikuru okubiika ebihandiiko ebirikukwata aha kubuurira omu kicweka ekyo. Abareeberezi abarikukora aha by’obuheereza bashemereire kukwatanisa kandi bakakora entebeekanisa erikwija kugasira boona. (Enf. 11:14) Kwonka omu kubuurira enju aha nju, omubuurizi yaatunga omuntu orikugamba orurimi orutarikukoresibwa ebibiina ebiri haihi n’ekicweka ekyo, omubuurizi ashemereire kuteeraho kumubuurira kandi yaayoreka ngu naayenda kumanya ebirikukiraho ashemereire kugumizamu kumuhwera.
3. Tushemereire kutwaza tuta twashanga ababuurizi ab’ekibiina ekirikukoresa orurimi orundi barikubuurira omu kicweka eki turikubuuriramu?
3 Nitukora Omurimo Gumwe: N’enki ekishemereire kukorwa ababuurizi b’ebibiina bitarikushushana baayeshanga barikubuurira omu kicweka kimwe aha izooba rimwe? Buzima, rukundo y’Ekikristaayo neija kutureetera kutashoroora mu ndimi kandi twena nitwija kuta omutima aha byetengo by’abantu abari omu kicweka eki turikubuuriramu. (Yoh. 13:34, 35) N’ahabw’ekyo, abo abarikwebembera okubuurira nibooreka oburyo na rukundo omu kucwamu yaaba ekibiina kimwe kishemereire kuza kuba nikibuurira omu kicweka ekindi.—Yak. 3:17, 18.
4. Ni bunabi ki oburiyo nibuhikirizibwa omu bunaku obu?
4 Baibuli ekaranga ngu abantu b’endimi zitari zimwe bakaba nibaija kuhurira amakuru marungi. (Kush. 14:6, 7) Ababuurizi boona baakwatanisa gye nibabaasa kwetantara okubuurira omu ka emwe kandi abasya baingi nibaija kuhikwaho amakuru marungi, otwariiremu abo abarikugamba orurimi orundi.—Efe. 4:16.