Huumuriza Abarikuganya
1. Ahabw’enki abarikuganya barikwetenga kuhuumurizibwa?
1 Okufeerwa omukundwa n’ekintu kirikusaasa munonga, n’okukira munonga abo abataine matsiko g’Obukama. (1 Tes. 4:13) Abantu baingi nibakira kwebuuza bati: ‘Ahabw’enki abantu nibafa? Omuntu naagumizamu kuba ohuriire bwanyima y’okufa? Ndyagaruka ndeebe omukundwa wangye owaafiire?’ Ahaifo hariho emiringo ei turikubaasa kuhuumuriza abo abu turikushanga omu kubuurira abarikuba nibaganya ahabw’okufeerwa omunyabuzaare nari omunywani.—Isa. 61:2.
2. Ou turikubuurira yaatugambira ngu aine amaganya, tushemereire kumubuurira kumara obwire buraingwa?
2 Twaba Nitubuurira Enju aha Ndiijo: Ou turikubuurira naabaasa kutugambira ngu yaaheza kufeerwa omuntu omu ka yaabo. Aine amaganya maingi? Enju eijwiremu abanyabuzaare abarikuganya? Omu mbeera nk’ezo, ti kirungi okumara obwire buraingwa noobuurira ab’omu ka nk’egyo. (Mub. 3:1, 7) Obundi nitubaasa kubooreka ngu twashaasha nabo, tubahe ka turakiti, magaziini nari burocuwa eshemereire, reero turugyeyo. Na bwanyima nitubaasa kugaruka omu bwire burungi okwongyera kubahuumuriza turikukoresa Baibuli.
3. Embeera zaatubaasisa, ni byahandiikirwe ki ebi turikubaasa kushomera orikuganya?
3 Obumwe, nitubaasa kureeba ngu nikibaasika okugamba bingi aha murundi gw’okubanza. N’obu omurundi gw’okubanza buraabe butari bwire bw’okuhakanisa ebitahikire ebyagambwa, nitubaasa kubashomera ebiraganiso by’omu Baibuli ebirikukwata aha kuzooka. (Yoh. 5:28, 29) Nari nitubaasa kubooreka eki Baibuli erikugamba aha mbeera y’abafu. (Mub. 9:5, 10) Ebihandiikirwe omu Baibuli ebirikukwata aha kuzooka nabyo nibibaasa kubahuumuriza. (Yoh. 11:39-44) Nari noobaasa kugamba aha bigambo ebirikureetera omuntu kugira amatsiko omuri Yehova ebi omwesigwa Yobu yaagambire. (Yobu 14:14, 15) Tutakarugireyo, nitubaasa kumuha burocuwa What Happens to Us When We Die?, When Someone You Love Dies, nari endiijo yoona eshemereire nari turakiti. Nari nitubaasa kumutsigira akatabo Eki Baibuli Erikwegyesa, tumworekye ebiri omu shuura 6, kandi tutebeekanise kwongyera kugaaniira nawe aha kicweka ekyo omurundi ogundi.
4. Ni miringo ki endiijo ei turikubaasa kuhuumurizamu abantu?
4 Omu Mbeera Ezindi: Emikoro y’okuziika ku yaakuba neeza kuba aha Kyombeko ky’Obukama, nihaija kuba hariho abantu abatari Bajurizi ba Yehova? Ebitabo ebirikuhuumuriza abantu nibibaasa kubaheebwa. Obumwe, ebirango by’okuziika ebirikuba biri omu mpapura z’amakuru bireetaire bamwe kuhandika ebaruha ngufu erikuhuumuriza abafeereirwe. Bwanyima y’okutunga ebaruha eyaabaire erimu bwa turakiti, omushaija owaabaire afeereirwe omukazi we akagyenda n’omuhara omu ka y’omubuurizi yaamubuuza ati: “Niimwe munyoherereize ebaruha egi? Hati niinyenda kumanya ebirikukiraho ebirikukwata ahari Baibuli!” Omushaija ogwo hamwe n’omuhara bakaikiriza kwega Baibuli kandi baatandika kwija omu nteerane z’ekibiina.
5. Ahabw’enki tushemereire kukoresa buri kagisha koona kuhuumuriza abo abarikuganya?
5 Omubuurizi 7:2 nihagira hati: “Okuza omu ka erimu okucura nikikira okuza omu ka erimu obugyenyi.” Orikuba naaganya naabaasa kuhurira Ekigambo kya Ruhanga okukira ogwo orikuba ari omu kushemererwa. Twena tushemereire kuteeraho kusherura obwire burungi obw’okuhuumuririzamu abo abarikuganya ahabw’okufeerwa.