Akabokisi K’ebibuuzo

◼ Kihikiire Omujurizi wa Yehova kuragurirwa nari kutunga obujanjabi omu irwariro eririkwebemberwa ekibiina ky’ediini?

Ebibiina bingi by’ediini biine amarwariro agarikuragurira kandi gakaha obujanjabi abo abaine oburwaire obutarikukira juba. Okutwarira hamwe, amarwariro nk’ago nigaba gatatairweho kushagika ediini z’ebishuba. (Kush. 18:2, 4) Ekibiina ky’ediini nikibaasa kuba kyatandikireho amarwariro nk’ago kukora sente. Amarwariro agamwe obwire obu gari omu maziina g’ediini kwonka, kandi agandi nigakorwamu bamwe aha beebembezi b’ediini.

Omujurizi wa Yehova ku yaakurwara, ashemereire kwecweramu ahabwe yaaba araaze omu irwariro eriine akakwate n’ekibiina ky’ediini. Omuntu omwe naabaasa kucwamu kuzayo kandi ondiijo naabaasa kucwamu kutazayo bombi barikwihirira aha muntu waabo ow’omunda. (1 Tim. 1:5) Hariho enshonga ezimwe ezirikubaasa kureetera omuntu kucwamu atyo, kandi ni kirungi kwetegyereza ezi ahaifo.

Nk’eky’okureeberaho, irwariro eriri omu maziina g’ekibiina ky’ediini niribaasa kuba niryo ryonka eriri haihi. Nari oshangye ngu n’obu haraabe hariho erindi haihi, kwonka eriri omu maziina g’ekibiina ky’ediini niryo riine obuheereza burungi. Irwariro nk’eryo niribaasa kuba niryo ryonka eririkubaasa kuragurira oburwaire obumwe, nari oshangye ngu omu irwariro eryo ryonka nimwo omushaho waawe arikubaasa kukuragurira. Kandi obumwe, amarwariro againe akakwate n’ekibiina ky’ediini nigabaasa kuba nigaikirizana naiwe nk’Omukristaayo aha nshonga y’okutateebwamu shagama, kwonka oshangye ngu agandi nk’aga gavumenti nari ag’abantu gatarikwikiriza. N’ahabw’ekyo, ezi nizo zimwe aha nshonga ezi oshemereire kwetegyereza waaba noocwamu irwariro eri oraazemu.

Waacwamu kuza omu irwariro eriine akakwate n’ediini, noobaasa kurireeba nk’omuntu ou orikushashura ahabw’okukorera omurimo. Noobaasa kurireeba nk’oku ekibiina ky’ediini kyakuba kiine eduuka, n’ahabw’ekyo waaba noogura ebintu omu duuka egyo, nooba otarikushagika diini y’ebishuba. Nooba noogurayo ebintu kwonka, nari nooshashurira obuheereza.

Buzima nk’Omukristaayo, omu mbeera nk’ezi ashemereire kuhamya ngu omu muringo gwona ti yaayejumba mu kuramya okw’ebishuba. Kandi abantu abarikukora ah’irwariro eryo nari abarikwijaho toine kubeeta omu bitiinisa byabo by’ediini nka “Faaza” nari “Sisita.” (Mat. 23:9) Eirwariro nk’eryo noobaasa kuritwara nk’entebeekanisa y’obushuubuzi ahu orikuragurirwa kandi okatunga obujanjabi kwonka, hatariho kindi.

Waaheebwa ekitanda omu irwariro nk’eryo, oshemereire kubamanyisa ku ori omwe aha Bajurizi ba Yehova kandi ngu nooyenda kuguma nootaayaayirwa abareeberezi b’ekibiina kyawe. Eki nikiija kukubaasisa kutunga obuhwezi bw’eby’omwoyo obwire bwona obu oraaheze aha kitanda.​—1 Tes. 5:14.

Ow’eishe-emwe nari munyaanyazi-itwe okaikwire yaaba ari omu irwariro, n’okukira munonga ryaba niryebemberwa ekibiina ky’ediini, ab’eishe-emwe ab’omuka ye, abareeberezi b’ekibiina kye, n’abandi omu kibiina bashemereire kuguma nibafayo aha byetengo bye eby’omwoyo. Okufayo munonga aha bantu nk’abo abakaikwire nikibagaruramu amaani kandi kibahwera kutejumba omu mikoro y’ediini erikuba omu marwariro nk’ago.

Bwanyima y’okwetegyereza enshonga ezi zoona, buri omwe naija kureeba ebirikutwarirwamu reero acwemu irwariro eri araazemu.​—Gal. 6:5.