‘Mukuratire eky’Okureeberaho Kye’
1. Nitubaasa tuta kuba ababuurizi barungi?
1 Yesu akaba ategyesiibwe mu mashomero g’Ekiyudaaya, kwonka omu byafaayo akaba ari Omubuurizi w’engiri orikukirayo. Ekirikushemeza munonga, ebyahandiikirwe aha buheereza bwa Yesu bikarindwa gye okubaasa kutugasira. Naitwe okubaasa kuba ababuurizi barungi, tushemereire ‘kukuratira eky’okureeberaho kye.’—1 Pet. 2:21.
2. Niki ekiratuhwere kugirira abantu rukundo nk’eya Kristo?
2 Yoreka Abantu Rukundo: Rukundo ei Yesu yaabaire ainiire abantu ekamuhiga kugira eki yaabakorera. (Mako 6:30-34) Abantu baingi omu kicweka eki turikubuuriramu ‘baine obusaasi’ kandi nibetengyera kimwe kumanya amazima. (Rom. 8:22) Twateekateeka munonga aha mbeera yaabo mbi n’ahari rukundo ei Yehova abainiire nikiija kutureetera kugumizamu turikubuurira. (2 Pet. 3:9) Ekindi, abantu nibaija kwikiriza amakuru agu turikubabuurira baaheza kukireeba ngu buzima nitubafaho.
3. Ni ryari obu Yesu yaabaire abuurira abantu?
3 Koresa Buri Mugisha Kubuurira: Yesu akaba akoresa buri mugisha gwona kubuurira abandi amakuru marungi. (Mat. 4:23; 9:9; Yoh. 4:7-10) Naitwe nitwenda kuba tweteekateekire buri kiire kugamba aha mazima twaba nitukora emirimo yaitu ey’obutoosha. Abamwe nibagyenda na Baibuli n’ebitabo ebi turikukoresa omu kubuurira kugira ngu babaase kubuurira bari aha ishomero, aha rugyendo, barikugura ebintu nari bari ahandi hoona.
4. Nitubaasa tuta kuhindura Obukama omutwe mukuru omu kubuurira kwaitu?
4 Buurira Munonga aha Bukama: Amakuru marungi g’Obukama nigwo gwabaire guri omutwe mukuru omu kubuurira kwa Yesu. (Luka 4:43) N’obu twakuba tutagambire aha bukama ahonaaho, nituguma nitwijuka kuhwera ou turikubuurira kureeba ngu nibwetengyesa. Na twaba nitugamba aha mbeera mbi eriho omu nsi erikworeka ngu turi omu biro by’aha mperu, ekikuru eki ‘turikubuurira n’engiri y’ebigambo birungi.’—Rom. 10:15.
5. Okubaasa kuba ababuurizi barungi, tushemereire kukoresa tuta Baibuli?
5 Koresa Ekigambo kya Ruhanga: Yesu omu buheereza bwe bwona akaba ajuriza Ebyahandiikirwe kuhamya ebi yaabaire naayegyesa. Tarayegyeise biteekateeko bye ahabwe. (Yoh. 7:16, 18) Yesu akaba atungwa Ekigambo kya Ruhanga kandi akikoresa yaagyezibwa Sitaane. (Mat. 4:1-4) Naitwe okubaasa kwegyesa gye abantu, tushemereire kushoma Baibuli buri izooba kandi tukata omu nkora ebi turikushoma. (Rom. 2:21) Twaba nitugarukamu ebibuuzo turi omu kubuurira, tushemereire kworeka oku Baibuli erikuhamya ebi turikugamba kandi tukashomayo omu Baibuli kyaba nikibaasika. Nitwenda ngu ou turikubuurira areebe ngu ebi turikumubuurira ti biteekateeko byaitu beitu ngu n’ebya Ruhanga.
6. Yesu akakora ki okuhika aha mitima y’abaabaire baba bamuhurikiize?
6 Hika aha Mutima omu Kwegyesa Kwawe: “Tihakabahoga muntu orikugamba nk’ogu mushaija.” (Yoh. 7:46) Okwo nikwo abakuru b’abaserukare baagarukiremu obu abanyamurwa n’abafarisaayo baababuuza ahabw’enki bataakwata Yesu. Omu mwanya gw’okugambira abantu enshonga kwonka, Yesu akaba naayegyesa omu muringo ogwamubaasiise kubahika mutima. (Luka 24:32) Yesu akaba akoresa eby’okureeberaho ebya butoosha okubahwera kwetegyereza gye ebi yaabaire naabagambira. (Mat. 13:34) Yesu akaba atagambira abaabaire baba bamuhurikiriize ebintu bingi omurundi gumwe. (Yoh. 16:12) Akaba ayegyesa ebya Yehova baitu bitari ebye. Nka Yesu, naitwe nitubaasa kuba abeegyesa barungi turikufayo ‘obutoosha aha bi turikwegyesa.’—1 Tim. 4:16.
7. Ahabw’enki Yesu yaagumisiriize omu kubuurira?
7 Gumisiriza n’Obu Haakubaho Obutafayo n’Okuhakanisibwa: N’obu Yesu araabe yaakozire eby’okutangaaza, baingi tibaramwikiriize. (Luka 10:13) Nangwa n’abu yaabaire naatuura nabo omuka bakagira ngu Yesu “agwire eiraro.” (Mako 3:21) Kwonka, Yesu akagumisiriza. Yesu akagumizamu naakora ebihikire ahabw’okuba akaba naakimanya ngu aine amazima agarikuhindura abantu ab’obusingye. (Yoh. 8:32) Twine obuhwezi bwa Yehova, naitwe tumaririire kugumisiriza.—2 Kor. 4:1.
8, 9. Nitubaasa kutooreza tuta Yesu omu kwefeerereza ahabw’amakuru marungi?
8 Yefeerereze Okubaasa Kwejumbira Kimwe omu Kubuurira: Yesu akefeerereza eby’obutungi ahabw’omurimo gw’okubuurira. (Mat. 8:20) Akabuurira n’omujinya, obumwe n’omu mwabazyo. (Mako 6:35, 36) Yesu akaba naakimanya ngu akaba aine obwire bukye okuheza omurimo gwe. Ahabw’okugira ngu ‘obwire obutsigaireyo ni bukye,’ naitwe nitwenda kwefeerereza obwire bwaitu, eby’obutungi n’okukoresa amaani omu kutooreza Yesu.—1 Kor. 7:29-31.
9 Abakristaayo b’omu kyasha ky’okubanza bakaba bari ababuurizi barungi ahabw’okuba bakeegyera ahari Yesu. (Byak. 4:13) Naitwe nitubaasa kukora kihango omu murimo gwaitu gw’okubuurira twatooreza Omubuurizi w’engiri orikukirayo omu byafaayo.—2 Tim. 4:5.