Nitubuurira Abandi aha Matsiko Gaitu ag’Obukama
1 Omu biro by’emperu ebi eby’akabi kingi, baingi omu nsi tibaine matsiko. (Efe. 2:12) Abamwe bataire obwesigye bwabo omu by’obutungi, omu bantu abarikutegyeka, omuri sayansi, n’omu bindi bintu. Ka twine okushemererwa okugira amatsiko aga buzima aha biro by’omu maisho, amatsiko agari “nk’ekitsibo ky’amagara, . . agahamire kandi agatarikunyiganyigibwa”!—Heb. 6:19.
2 Ahansi y’obutegyeki bw’Obukama bwa Ruhanga, ensi neija kuhindurwa paradiso. Abakundwa abaafiire nibaija kuzoorwa. (Byak. 24:15) Obworo, obutariburinganiza, endwara, bukuru, n’okufa biryaba bitakiriho. (Zab. 9:18; Mat. 12:20, 21; Kush. 21:3, 4) Ebi ni bimwe aha bi Yehova yaaraganiise ebi ari haihi kuhikiiriza. Ni kiiha omu bi twineho amatsiko eki otegyereize n’ekihika?
3 Buurira Amakuru Marungi: Titushemereire kwesigariza amatsiko g’Obukama. Rukundo ei twiniire Ruhanga n’abataahi neetuhiga kutooreza Yesu ‘n’okubuurira abooro ebigambo ebirungi, . . . okumanyisa enkwatwa eby’okurekurwa, okumanyisa empumi eby’okuhumuurwa, n’okurekura abarikwitwa kubi.’ (Luka 4:18) Entumwa Paulo akaba abuurira amakuru marungi omu katare hamwe n’ahandi hoona ahu yaabaire ashanga abantu. Akeemarira aha kubuurira. (Byak. 18:5) Okukuratira eky’okureeberaho kye eky’okubuurira n’obweziriki nikwija kuremesa ‘amaganya g’ensi, n’okubeihwabeihwa eby’obutungi’ okunyuruza amatsiko gaitu nk’Abakristaayo.—Mako 4:19.
4 Amatsiko gaitu ag’Obukama tigarikuhindukaho twabugana abantu abatarikufa aha makuru g’Obukama nari abarikutuhakanisa. ‘Nituhamya amatsiko gaitu turikubuurira tutarikunyiganyiga.’ (Heb. 10:23) ‘Titurikukwatwa nshoni ahabw’engiri.’ (Rom. 1:16) Okugumisiriza kwaitu nikubaasa kureetera bamwe kurugaho kuhurikiza.
5 N’obu turaabe nitworeka abantu oku embeera y’ensi erikweyongyera kusiisikara erikuhikiiriza obunabi bwa Baibuli, titurikubuurira kabi. Kureka, nitubuurira aha matsiko gaitu ag’Obukama—nigo makuru marungi ag’Obukama bwa Ruhanga. Ka tubuurire amakuru marungi aga, twine okwikiriza n’obweziriki, ‘tubone kugira amatsiko tutarikubanganisa okuhitsya aha muheru.’—Heb. 6:11.