Mugyende nk’Abanyabwengye
1 Yesu ku yaashabire abajubi bana kuba abakuratsi be, tibareziringire kucwamu, kureka ‘ahonaaho . . . bakamukuratira.’ (Mat. 4:18-22) Saulo owa Taruso ku yaahindwirwe kandi akahumuuka, nawe tareeziringire, kureka ‘ahonaaho akatandika kugamba ahari Yesu omuri sinagogi.’ (Byak. 9:20) Obwire, butoosha nibugyenda omu maisho; bwahingura, nibuba butarigaruka. Egi niyo nshonga ahabw’enki ni kikuru itwe ‘kugyenda nk’abanyabwengye’ aha bikwatiraine n’oku turikukoresa obwire bwaitu.—Efe. 5:15, 16.
2 Ebihikiirizi: Emigisha y’okuheereza Yehova ei twine hati neebaasa kuba etakiriho omu biro by’omu maisho. (Yak. 4:14) Tihariho otarikubaasa kuhikwaho ‘ebihikiirizi.’ (Mub. 9:11) Ekindi, twena nitweyongyera kukura, kandi ‘ebiro by’enaku’ ebirikureetwa bukuru, ebirikutuubya aha bi turikubaasa kukora omu buheereza bwa Yehova titurikubaasa kubyetantara omu busingye obu. (Mub. 12:1) N’ahabw’ekyo, ti ky’obwengye okweziringa kwehayo ahari Ruhanga nari kutegyereza obwire oburungi kubaasa kwongyera aha buheereza bwaitu kandi obwo turikukibaasa nahati. (Luka 9:59-62) Abrahamu akatunga obusingye omu myaka ye ya bukuru, yaafa ‘ari omugurusi kandi amazirwe’ ahabw’okuba akakoresa gye amagara ge, arikwemarira aha kuheereza Yehova.—Kut. 25:8.
3 Hatsigaireyo Obwire Bukye: Naitwe nitwenda kukoresa gye obwire bwaitu ahabw’okuba ‘obwire obutsigaireyo ni bukye.’ (1 Kor. 7:29-31) Omu bwire butari bwa hare, obusingye obu nibuza kucwekyerezibwa. Emigisha y’okwejumba omu kurundaana abantu abari nk’entaama omu bwire ‘bw’okushaaruura eby’ensi’ neija kuhwaho. (Kush. 14:15) Tutaikiriza amaganya g’amagara n’ebirikutuhuzya kututwarira obwire obu twakukoreise gye turikubuurira. (Luka 21:34, 35) Ka nikiija kuba kirungi okugaruza amaisho enyima turikumanya ngu tukejumbira kimwe omu kushaaruura!
4 Obutoosha tushemereire kuguma tweteekateekire kugira ngu tutafeerwa omugisha gwona ogw’okwejumba omu buheereza oburimu okushemererwa oburaabe buriho bwona. Ka tumaririire kukora kyona eki turikubaasa okuheereza Yehova “obunaku butakarengire.” (Heb. 3:13) Omu kukora ekyo, nitwija kworeka ngu turi abanyabwengye buzima ahabw’okuba “okora ebi Ruhanga akunda, agumaho ebiro byona.”—1 Yoh. 2:17.