Hwera Abooro Kugira Amatsiko
1 Yesu akaba naafayo munonga aha booro. Obumwe akaba akora eky’okutangaaza aha abantu ebi barikwetenga kandi akiza abarwaire, kwonka eki yaabaire ataho omutima n’okubuurira abooro ‘amakuru marungi.’ (Mat. 11:5) Obuheereza bw’Ekikristaayo nibweyongyera kugasira abooro hamwe n’abandi bantu.—Mat. 24:14; 28:19, 20.
2 Amatsiko aga Buzima: Ababuurizi omuri Kristendomu nibakira kuraganisa abooro ngu nibaija kutunga empiiha nyingi baaha ekanisa munonga. Kwonka, Baibuli neeyegyesa ngu Obukama bwa Ruhanga bwonka nibwo buraije kumaraho obworo n’oburemeezi bw’abantu bwona. (Zab. 9:18; 145:16; Isa. 65:21-23) Twayoreka abooro eki Baibuli buzima erikwegyesa, nitubahwera kugira amatsiko n’okuhikiiriza ekyetengo kyabo eky’okumanya n’okuramya Ruhanga.—Mat. 5:3.
3 Abafarisaayo ab’omu bwire bwa Yesu bakaba nibagaya abooro, barikubeeta ‘am-ha·’aʹrets, nari shi “abantu ab’ahansi.” Kwonka Yesu we akaba naatwara amagara gaabo nari shi ‘eshagama yaabo nk’ey’obuguzi bwingi.’ (Zab. 72:13, 14) Nitubaasa kutooreza Yesu ‘tugirire abooro embabazi’ turikubafaho kandi turikufayo n’aha buremeezi obu baine. (Enf. 14:31) Titurikwenda kugamba omu muringo gurikworeka ngu nitugaya abooro nari tukanga kubuurira abooro abarikutuura haihi n’ei tutwire. Baingi abarikwikiriza amakuru g’Obukama n’abooro.
4 Hwera Abooro Hati: Okwegyesa emisingye ya Baibuli abooro abari omu kicweka eki turikubuuriramu, nakwo nikubahwera kutuubya aha buremeezi obu baine hati ahabw’obworo. Nk’eky’okureeberaho, Baibuli neejumiirira obusinzi, okuteera zaara, obugara, okukoresa etaabe, n’endiijo mize erikureeta obworo. (Enf. 6:10, 11; 23:21; 2 Kor. 7:1; Efe. 5:5) Ebyahandiikirwe nibituhiga okuba abeesigwa n’okukora n’agaitu goona, emitwarize erikwetengwa aha bakozi. (Kol. 3:22, 23; Heb. 13:18) Omu kucondooza kumwe, abarikuha emirimo bakagira ngu amazima n’obwesigwa nibyo barikusherura omu muntu ou barikuba nibenda kuha omurimo.
5 Ti kugira ngu Yehova tarikufayo aha kubonabona kw’abooro. Juba, Yesu Kristo naija ‘kujuna omworo orikumutakira.’ (Zab. 72:12) Ekyo kitakabaireho, twine omugisha gw’okuhuumuriza abandi otwariiremu n’abooro, turikubooreka amatsiko g’omuri Baibuli.