Na Hati Nitubaasa Kushemererwa
NAIWE noobaasa kugira amatsiko g’okutunga amagara marungi agatarimu okurwara, bukuru, n’okufa! Kwonka nabwo, obunaku obu nitureeba buri omwe naahikwaho oburemeezi bwingi n’embeera zigumire. Niki ekiraakuhwere hati kugira okushemererwa? Baibuli neeha obuhabuzi oburikubaasa kukuhwera kugira okushemererwa n’okumarwa hati. Ka tureebe bumwe aha buremeezi n’oku Baibuli erikubaasa kutuhwera.
OKUTUNGA OKUMARWA
Obuhabuzi bwa Baibuli: “Mutarigira omutima ogurikukunda empiiha, ebi mwine bibe nibyo byabamara.”—Abaheburaayo 13:5.
Ensi obunaku obu erimu ebintu bingi n’obuheereza bwingi obu abantu barikugira ngu buzima nibwetengyesa. Kwonka Baibuli neeyoreka ngu nitubaasa ‘kumarwa n’ebi twine.’ Tuta shi?
Yetantare kukunda esente. Abantu ahabw’okukunda esente, nibeefeerereza amagara gaabo, amaka, emikago, nangwa n’ekitiinisa kyabo. (1 Timoseo 6:10) Buzima ka nibafeerwa ebintu by’omuhendo! Aha muheru, orikukunda eby’obugaiga tarikubaasa “kuhaaga.”—Omubuurizi 5:10.
Kunda abantu, bitari ebintu. Amazima gari ngu, ebintu biine omwanya gwabyo. Kwonka ebintu tibiri nk’abantu. Tibirikubaasa kutukunda nari kutusiima. Okugira omunywani owaabuzima nikitubaasisa kugira okumarwa.—Enfumu 17:17.
NITUBAASA KUSHEMERERWA MUNONGA HATI TWAKURATIRA OBUHABUZI BWA BAIBULI
OKUGUMISIRIZA WAABA ORWAIRE
Obuhabuzi bwa Baibuli: “Omutima ogushemereirwe n’omubazi murungi.”—Enfumu 17:22.
‘Nk’omubazi murungi,’ omutima ogushemereirwe nigubaasa kutuhwera kugumisiriza twaba twine amagara mabi. Kwonka shi niki ekirikubaasa kutuhwera kuguma tushemereirwe twaba twine amagara mabi?
Yega kusiima. Twaguma nituteekateeka aha kubonabona kwaitu, ebiro byaitu nibiija kureebeka nka bibi butoosha. (Enfumu 15:15) Omu mwanya gw’ekyo, Baibuli neetuhiga ‘kuba abarikusiima.’ (Abakolosai 3:15) Yega kusiima ebirungi ebi orikutunga, n’obu byakuba biri bikye. Twareeba eizooba nirirenga, amabeho marungi, akamwenyo k’abakundwa baitu, ebi byona nibitushemeza.
Gira ebi waakorera abandi. N’obu amagara gaitu gaakuba gatari marungi, “okugaba” nikureeta okushemererwa “okukira okuheebwa.” (Ebyakozirwe 20:35) Abandi baatusiima ahabw’ebi tukozire, nitushemererwa kandi nikituhwera kutata omutima aha buremeezi bwaitu. Nitubaasa kushemererwa twahwera abandi kugira embeera nungi.
OKUHAMYA OBUSHWERE
Obuhabuzi bwa Baibuli: Yebeembeze “ebirikukira” obukuru.—Abafilipi 1:10.
Abashaija n’abakazi abatarikuhaana bwire, nibaba bari omu kabi k’okutaana. N’eky’obwengye omushaija n’omukazi kwebembeza obushwere bwabo, kimwe aha bintu ebirikukira obukuru.
Mukore emirimo kumwe. Omu mwanya gw’okukora ebintu wenka, kora entebeekanisa mukorere hamwe emirimo. Baibuli neegira eti: “Ababiri nibakira omwe.” (Omubuurizi 4:9) Nimubaasa kuteeka hamwe, kwiruka hamwe, kunywa kaawa hamwe, nari kwejumba omu by’okweshemeza hamwe.
Yoreka ngu nookunda omukundwa waawe. Baibuli neehiga omushaija n’omukazi kukundana n’okuhaana ekitiinisa. (Abaefeso 5:28, 33) Akamwenyo, okubumbatirana omu muringo gwa rukundo, nari okuhaana ebiconco nikibaasa kwongyera kuhamya obushwere. Kandi enshonga eziine akakwate n’okuteerana zishemereire kuba ezaanyu mwembi mwenka.—Abaheburaayo 13:4.