Waaba Nooyehurira ngu Torikubaasa Kugumizamu

Adriana kuruga Brazil naagira ati: “Enyehurira nk’ezi zikaba ziri ez’amaani, n’ahabw’ekyo nkateekateeka ngu ni kirungi okweita.”

OREEHURIIREHO kubi okateekateeka ngu toshemereire kuguma ohuriire? Ku kiraabe nikwo kiri nooyetegyereza oku Adriana yaayehuriire. Akaba aine amaganya maingi kyamureetera enaku n’okwehwa amatsiko. Adriana bakamukyebera baashanga aine endwara y’amaganya g’obwire bwona.

Teekateeka aha Kaoru owa Japan owaabaire naareeberera abazaire be abakaikwire kandi barwaire. Naashoboorora ati: “Omu bwire obwo nkaba ningyemeserezibwa munonga aha murimo. Bwanyima, nkaba ntakyenda kurya, kandi nkaba nimburwa n’oturo. Nkatandika kuteekateeka ngu haakiri naafa nimba naahuumura.”

Ojebode orikuruga Nigeria naagira ati: “Nkaba ninkira kuguubwa kubi mpika n’aha kurira, n’ahabw’ekyo nkateeraho kweita.” Ekirungi Ojebode, Kaoru, na Adriana bakaguma bahuriire tibarayeitsire. Kwonka buri mwaka abantu baingi nibeita.

AH’OKWIHA OBUHWEZI

Abashaija nibo barikukira kweita, ahakuba baingi aharibo nibahemuka kusherura obuhwezi. Yesu akagira ngu abarwaire nibo baine kuza kureeba abashaho kuragurirwa. (Luka 5:31) N’ahabw’ekyo waaba oine enyehurira nk’ezo otahemuka kushaba obuhwezi. Baingi abarikugira amaganya bashangire ngu okutunga obujanjabi nikibahwera kugumisiriza. Ojebode, Kaoru, na Adriana bakatunga obujanjabi kandi ekyo kibahwereire kwemera embeera.

Abashaho nibahwera abo abaine amaganya barikubaha obujanjabi nari barikugaaniira nabo kubaasa kuhindura emiteekateekyere yaabo. Abaine amaganya nibaba nibenda obushagiki bw’ab’amaka gaabo n’abanywani abarikufayo kandi abarikugumisiriza. Yehova Ruhanga, niwe munywani orikukirayo ou buri omwe arikubaasa kugira, orikuha obuhwezi oburi omu Kigambo kye Baibuli.

OBUREMEEZI NIBUBAASA KUHWERAHO KIMWE?

Abaine amaganya nikibaasa kubeetengyesa kutunga obujanjabi bw’obwire buraingwa, kandi nibaba baine kwega kukora empindahinduka omu mitwarize yaabo. Kwonka ku oraabe oine amaganya, noobaasa kugira amatsiko ga nyentsya nungi nka Ojebode. Naagira ati: “Nyine ekihika ky’okureeba ebiri omu Isaaya 33:24 nibihikiirira, aharikworeka ngu tihariho n’omwe aha omu nsi orikwija kugira ati: ‘Ndwaire.’” Nka Ojebode, noobaasa kuhuumurizibwa ebi Ruhanga arikuraganisa omu ‘nsi ensya’ eraabe etarimu “busaasi.” (Okushuuruurwa 21:1, 4) Okuraganisa okwo nikutwariramu okuhwaho kw’obusaasi omu biteekateeko n’omu nyehurira. Enyehurira z’obusaasi ezi oine zoona niziija kuhweraho kimwe. Enyehurira zaawe z’obusaasi tihaine obu oraagarukye ‘kuziijuka, n’obu kwakuba okuzitaho omutima.’—Isaaya 65:17.

Ebyahandiikirwe Ebirikubaasa Kukuhwera

Ruhanga naayetegyereza enyehurira zaawe.

‘Nyowe, [Yehova] Ruhanga waawe, ninyija kukukwata omukono gwa buryo, nkugire nti: Otatiina, naija kukuhwera.’—Isaaya 41:13.

Yehova naayetegyereza gye enyehurira zaitu okukira omuntu ondiijo weena, kandi naayenda kutuhwera.

Teekateeka aha Kigambo kya Ruhanga.

‘[Eliya] akashaba Ruhanga ngu afe. Yaagira ati: Ai [Yehova,] nyita.’—1 Abagabe 19:4.

Ojebode naagira ati: “Okuteekateeka aha Kigambo kya Ruhanga kikampwera. Nkareeba ngu nabi Eliya akaba aine enyehurira nk’ezangye.”

Yegyera aha barikugambwaho omu Baibuli.

“Kwonka nyowe [Yesu] nkakushabira [Petero] ngu okwikiriza kwawe kutahwaho.”—Luka 22:32.

Bwanyima ya Petero kwehakana Yesu emirundi eshatu, akagira amaganya maingi yaarira munonga. Kaoru naagira ati: “Ebyahikire ahari Petero bikampwera kwetegyereza ngu Yehova na Yesu bakafayo aha nyehurira ze. Eki kikangumya.”

Enyehurira zaawe z’obusaasi tihaine obu oraagarukye ‘kuziijuka, n’obu kwakuba okuzitaho omutima.’—Isaaya 65:17