Ebiraganiso Ebirikwija Kuhikiirira
Amakuru marungi gariyo nigabuurirwa omu nsi yoona nk’oku Yesu yaagambire. (Matayo 24:14) Ekitabo kya Baibuli ekya Danieli nikyoreka ngu Obukama bwa Ruhanga ni gavumenti. Eshuura ya 2 ey’ekitabo eki erimu obunabi oburikworeka oku gavumenti z’abantu, nari obugabe bw’abantu bwabaire nibwihaihana kuruga ahari Babulooni eya ira kuhika omu bunaku bwaitu. Omushororongo gwa 44 gurikugamba aha kirikuza kubaho, nigugira guti:
“Ruhanga w’omu iguru aryataho obundi bugabe, obutaricwekyerezibwa ebiro byona, kandi obutegyeki bwabwo tiburihungurwa rindi ihanga; kureka buryayatagura obwo bugabe bwona, bubumareho kandi bwo buryagumaho.”
Obunabi obu n’obundi bw’omu Baibuli nibworeka ngu Obukama bwa Ruhanga nibwija kwihaho obutegyeki bw’abantu, kandi bureete obuteeka n’eihoreere omu nsi yoona. Embeera niziija kushusha ki Obukama bwa Ruhanga bwaba nibutegyeka? Ahaifo hariho bimwe aha biraganiso ebiri haihi kuhikiirira.
ENTARO NIZIIJA KUHWAHO
Zaaburi 46:9: “[Ruhanga] amaraho engamba okuhika aha muheru gw’ensi; ahenda amata, amacumu agatemamu kabiri; n’ebigaari abyotsya n’omuriro.”
Teekateeka aha ku ensi yaakubaire neeshusha, esente zoona n’emyoga ebirikukoresibwa omu kukora eby’okurwanisa byateebwa omu mirimo erikugasira abantu omu mwanya gw’okubaita! Okuraganisa oku nikwija kuhikiirira gye Obukama bwa Ruhanga bwa nibutegyeka.
ENDWARA NIZIIJA KUHWAHO
Isaaya 33:24: “Tihaine mutuuzi waayo origira ati: Ndwaire.”
Teekateeka aha nsi etarimu abantu abarwaire, endwara z’omutima, ekookoro, omushwija, n’ezindi ndwara. Amarwariro n’emibazi nibiija kuba bitakiriho. Abantu abaraabe bari omu nsi omu biro by’omumaisho nibaija kuba baine amagara marungi.
ENJARA NEIJA KUHWAHO
Zaaburi 72:16: “Haryabaho omweru mwingi omu nsi, emyaka eryakondakonda omu misiri omu bibungo.”
Ensi neija kweza eby’okurya ebirikumara buri omwe, kandi abantu boona nibaija kuba nibabaasa kubitunga. Enjara n’okukuuhura nibiija kuhwaho.
OBUSAASI, ENAKU, N’OKUFA NIBIIJA KUHWAHO
Okushuuruurwa 21:4: “[Ruhanga] aryaragaza amarira goona aha maisho gaabo; tiharibaho kufa bundi, n’obu kwakuba okucura nari okurira nari obusaasi, ahakuba ebya ira biryaba bihweireho.”
Eki nikimanyisa ngu abantu nibaija kuba nibatuura omu nsi bahikiriire! Eki nikyo Omuhangi waitu owa rukundo Yehova Ruhanga arikuraganisa.
BUZIMA NIBIIJA KUHIKIIRIRA
Mbwenu shi ebi byona noobireeba nk’ebitarikubaasa kubaho? N’obu abantu baraabe nibaikiriza ngu ebirungi ebirikugambwaho omu Baibuli buzima nibishemeza, baingi nibagumirwa kwetegyereza enshonga y’okutuuraho ebiro byona. Ekyo tikirikutangaaza, ahakuba tihariho muntu oratungireho amagara agatahwaho akatugambira oku garikushusha.
Abantu batwire omu buhuuku bw’ekibi n’okufa kandi batwire nibakorera omu busaasi, okubonabona, n’enaku, kumara obwire buraingwa kyareetera baingi kwikiriza ngu embeera egi n’eya butoosha. Kwonka eki nikitaana n’eki Omuhangi waitu, Yehova Ruhanga yaabaire naayendeza abantu.
Ruhanga kubaasa kutuhwera kwetegyereza ngu ebi yaaraganiise buzima nibiija kubaho, akagamba aha Kigambo kye ati: “Tikirigaruka hariinye busha, kureka kiryahikiiriza ebi ndikwenda, kigire omugisha omuri ebyo ebi nkitumiire.”—Isaaya 55:11.
Yehova naagambwaho omu Baibuli ngu ni Ruhanga “otabaasa kubeiha.” (Tito 1:2) Obu niwe arikuturaganisa ebintu ebi byona omu biro by’omumaisho, n’eky’obwengye kwebuuza tuti: Buzima nikibaasika abantu kutuura omu Paradiso ey’omu nsi ebiro byona? Twine kukora ki kubaasa kugasirwa omu ki Ruhanga arikuraganisa? Aha mpapura ezirikukurataho omu magaziini egi, noija kutunga eby’okugarukamu eby’ebibuuzo ebyo.