Okucwamu Gye omu Bunyeeto

1. Ni buheereza ki obu eminyeeto Abakristaayo barikwejumbamu?

OBUNAKU obu abantu baingi kuruga omu mahanga goona nibaija omu kuramya okw’amazima. (Kush. 7:9, 10) Eminyeeto nibahwera abantu kumanya amazima agari omu Baibuli. (Kush. 22:17) Abamwe nibeegyesa abantu Baibuli, babahwera kugira emitwarize mirungi. Abandi nibaza kubuurira omu bicweka ebirimu abantu abarikugamba endimi ezindi. (Zab. 110:3; Isa. 52:7) Noobaasa kwejumba ota omu murimo ogu omu bwijwire?

2. Eky’okureeberaho kya Timoseo nikyoreka kita ngu Yehova naabaasa kuha eminyeeto obujunaanizibwa? (Reeba ekishushani aha kutandika.)

² Nk’omunyeeto, noobaasa kucwamu omu muringo oguraije kukubaasisa kuheereza Ruhanga omu biro by’omumaisho. Nk’eky’okureeberaho, Timoseo ow’omuri Lusitura, hatariho kubanganisa akacwamu gye ekyamubaasiise kuba omumiisani aine emyaka nka 20. (Byak. 16:1-3) Nikireebeka ngu bwanyima y’ameezi makye, hakabaho okuhiiganisibwa okwareeteire Paulo kuhunga omu kibiina kisya kya Tesalonika, kwonka akaha Timoseo obujunaanizibwa bw’okugaruka Tesalonika kugumya ab’eishe-emwe. (Byak. 17:5-15; 1 Tes. 3:1, 2, 6) Timoseo ka aine kuba yaashemereirwe kutunga obujunaanizibwa obwo!

OKUCWAMU KWAWE OKURIKUKIRAYO

3. Ni kintu ki ekikuru eki orikubaasa kucwamu kukora, kandi noobaasa kukikora ryari?

³ Obunyeeto n’obwire burungi bw’okucwamu ebintu bikuru. Okucwamu kuheereza Yehova nikyo kikuru. Ni ryari obu orikubaasa kucwamu kukora ekyo? Yehova naagira ati: “Oijukye Omuhangi waawe omu biro by’obutsigazi bwawe.” (Mub. 12:1) Omuringo gwonka ogu orikubaasa ‘kwijukamu’ Yehova n’okumuheereza n’omutima gwawe gwona. (Bir. 10:12) Okucwamu kuheereza Yehova n’omutima gwawe gwona nikyo kintu kikuru. Nikiija kukwata aha biro byawe by’omumaisho.​—Zab. 71:5.

4. Oyihireho okuheereza Yehova, ni bintu ki ebindi ebi oine kucwamu gye?

⁴ Buzima okucwamu kuheereza Yehova tikyo kyonka ekirikukwata aha biro byawe by’omumaisho. Nk’eky’okureeberaho, noobaasa kuteekateeka aha kushwera, ou oraashwere, kandi n’oku oraabeho. Ebi n’eby’okucwamu bikuru, kwonka nikiba kiri eky’obwengye kubanza kucwamu kuheereza Yehova nk’oku orikubaasa. (Bir. 30:19, 20) Ahabw’enki? Ahabw’okuba ebyo byona biine akakwate. Ebi orikucwamu aha bikwatiraine n’obushwere, n’omurimo nibiija kukwata aha ku oraaheereze Ruhanga. (Gyeragyeranisa na Luka 14:16-20.) Kandi ekyetengo kyawe eky’okuheereza Yehova nikiija kukuhwera kucwamu aha bikwatiraine n’obushwere hamwe n’omurimo. Ekyo nikiija kukuhwera kwebembeza ebintu ebikuru.​—Fil. 1:10.

NIKI EKI ORAAKORE OMU BUNYEETO BWAWE?

5, 6. Ha eky’okureeberaho kworeka oku okucwamu gye kirikubaasa kurugamu ebirungi bwanyima.

⁵ Waacwamu kuheereza Ruhanga, oine kuteekateeka aha ki arikwenda ngu okore, kandi okacwamu oku oraamuheereze. Ow’eishe-emwe kuruga Japan akahandiika ati: “Obu naabaire nyine emyaka 14, nkaba nimbuurira n’omureeberezi owaareebire ngu tindikukunda kubuurira. Omu muringo murungi akangira ati: Irooko otaahe, Yuichiro. Ku oraahikye omuka oteekateeke aha bi Yehova akukoreire. Nkakora nk’oku yaangambiire. Nkaguma ninkiteekateekaho kandi ndikushaba. Mporampora, nkahindura aha miteekateekyere yangye. Bwanyima, nkatandika kukunda kuheereza Yehova. Nkaba ninkunda kushoma ebirikukwata aha bamiisani, kandi nkatandika kuteekateeka aha kwongyera kuheereza Yehova n’omutima gwangye gwona.”

⁶ Yuichiro naagumizamu ati: “Nkatandika kucwamu omu muringo oguraambaasise kuheereza omu ihanga erindi. Nk’eky’okureeberaho, nkatandika kwega Orungyereza. Ku naaherize kushoma, nkacwamu kukora eshaaha nkye buri wiiki ndikwegyesa Orungyereza kubaasa kuguma ndi payoniya. Ku naahikize emyaka 20, nkatandika kwega orurimi rwa Mongolia kandi naatunga omugisha kuza omu nteerane za guruupu y’ababuurizi abaabaire nibagamba orurimi rwa Mongolia. Bwanyima y’emyaka ebiri, nkataayaaya omuri Mongolia omu 2007. Ku naabaire nimbuurira na baapayoniya nkareeba ngu abantu baingi bakaba nibenda kumanya amazima kyandeetera kwenda kuza omu mwanya ogwo nkabahwera. Nkagarukayo Japan kwetebeekanisa. Ntwire ndi payoniya omuri Mongolia kuruga Okwakana 2008. Embeera teyorobi. Kwonka abantu nibakunda amakuru marungi, kandi nimbaasa kubahwera kugira omukago murungi na Yehova. Ninteekateeka ngu eki naacwiremu kukora nikyo kirikukirayo oburungi.”

7. Nitubaasa kucwamu kukora ki, kandi Musa akatuteeraho ky’okureeberaho ki?

⁷ Buri omwe aine kwecweramu eki araakore nk’Omujurizi wa Yehova. (Yos. 24:15) Titurikubaasa kukuragiira kushwera, nari kukworeka ou oraashwere, nari omurimo ogu oraakore. Noija kucwamu kukora omurimo ogurikukwetengyesa kutendekwa kumara obwire bukye? Eminyeeto abamwe nimubaasa kuba nimutuura omu byaro ebyoro kandi abandi barikutuura omu tauni. Omu nsi yoona nimutaana omu mitwarize, okubaasa kwanyu, okumanya, ebi murikukunda, n’omu kwikiriza kwanyu. Buzima nimutaana nk’oku Eminyeeto Abaheburaayo abaabaire bari omuri Misri baabaire nibataana ahari Musa obu yaabaire akiri muto. Musa akaba naatunga ebirungi omu kikaari ky’Omugabe Faraho n’obu Abaheburaayo abandi baabaire bari abahuuku. (Kur. 1:13, 14; Byak. 7:21, 22) Bakaba baine kukora empindahinduka kandi naitwe twine kuzikora. (Kur. 19:4-6) Buri omwe akaba aine kucwamu eki araakore. Musa akacwamu gye.​—Shoma Abaheburaayo 11:24-27.

8. Niki ekirikubaasa kuhwera eminyeeto kucwamu gye?

⁸ Yehova naakuhwera kucwamu gye. Naakwegyesa emisingye ei orikubaasa kugyenderaho omu mbeera zoona. (Zab. 32:8) Okwongyera ahari ekyo, abazaire baawe Abakristaayo n’abareeberezi omu kibiina nibabaasa kukuhwera kuteekateeka aha ku orikubaasa kugyendera aha misingye egyo. (Enf. 1:8, 9) Ka tushwijume emisingye ya Baibuli eshatu erikubaasa kukuhwera kucwamu omu muringo gw’obwengye.

EMISINGYE ESHATU YA BAIBULI ERAAKUHWERE

9. (a) Ni mu muringo ki ogu Yehova arikutuha obugabe bw’okwecweramu? (b) Noija kugasirwa ota waabanza ‘kusherura eby’Obukama’?

⁹ Banza osherure Obukama bwa Ruhanga n’okuhikiirira kwe. (Shoma Matayo 6:19-21, 24-26, 31-34.) Yehova naatuha obugabe bw’okwecweramu. Tarikukuragiira ngu oine kukoresa obwire bwawe bwona omu kubuurira. Kwonka Yesu akatuha omusingye ogurikubaasa kutuhwera kubanza kusherura Obukama bwa Ruhanga. Oku oraagyendere aha buhabuzi obwo, nikiija kworeka yaaba nookunda Ruhanga, noofayo ahari bataahi baawe, kandi yaaba noosiima amatsiko g’amagara agatahwaho. Waaba nooteekateeka kushwera nari kutunga omurimo, teeraho kumanya yaaba ebi oraacwemu nibiija kukureetera amaganya nari kworeka ngu nooyebembeza eby’Obukama bwa Ruhanga n’okuhikiirira kwe.

10. Niki ekyabaire kireetera Yesu okushemererwa, kandi niki ekiraakureetere kushemererwa?

¹⁰ Gira okushemererwa ahabw’okuheereza abandi. (Shoma Ebyakozirwe 20:20, 21, 24, 35.) Yesu akatwegyesa omusingye mukuru ogu. Akaba naashemererwa ahabw’okukora ebi Ishe arikukunda. Yesu akaba ashemererwa kureeba abantu abacureezi barikwikiriza amakuru marungi. (Luk. 10:21; Yoh. 4:34) Obundi naiwe otungire okushemererwa nk’okwo ahabw’okuhwera abantu kumanya amazima. Waacwamu ebintu ebikuru orikwihirira aha misingye ei Yesu yaayegyeise, noija kugira okushemererwa oshemeze na Yehova.​—Enf. 27:11.

11. Ahabw’enki Baruki yaahikize obunaku akabura kushemererwa, kandi Yehova akamuha buhabuzi ki?

¹¹ Okushemererwa okurikukirayo nikuruga omu kuheereza Yehova. (Enf. 16:20) Omuhandiiki wa Yeremia, Baruki ekyo kikamweba. Obwire bukahika yaaba atakikunda kuheereza Yehova. Yehova akamugira ati: “Mbwenu nooyesherurira ebikuru? Otabisherura. Ahabw’okuba reeba, naaza kureeta akabi aha bantu boona; kwonka iwe ndyakutimbuura omu ruganda n’engabirano, nigo magara gaawe, omu myanya yoona ei orikuzamu.” (Yer. 45:3, 5) Iwe nooteekateeka ngu Baruki akaba aine kukora ki? Mbwenu shi ekyabaire nikiija kumureetera kushemererwa kukaba kuri okwesherurira ebikuru nari okuhonokaho nk’omuheereza wa Yehova?​—Yak. 1:12.

12. Ramiro akacwamu kukora ki ekyamureeteire okushemererwa?

¹² Ramiro akashemererwa ahabw’okuhwera abandi. Naagira ati: “Ninduga omu eka enyoro omu kyaro ekiri omu nshozi za Andes. Mukuru wangye akaba naayenda ngu anshashurire aha yunivasite, kandi buzima ogwo gukaba guri omugisha. Kwonka nkaba naaherize kubatizibwa nk’omwe aha Bajurizi ba Yehova, kandi payoniya omwe akaba yaanyetsire kubuurira nawe omu tauni nkye. Nkazayo naayega kutega eishokye, naatandika kutega abantu eishokye. Ku twabaire nitubuurira, baingi bakaba nibaikiriza amazima. Bwanyima, nkegaita aha kibiina ekyabaire nikikoresa orurimi oru naabaire ningamba. Hati mmazire emyaka 10 omu buheereza obw’obutwire. Tihariho murimo ogwabaire nigubaasa kundeetera okushemererwa nk’okuhwera abantu kumanya amazima omu rurimi rwabo.”

13. Ahabw’enki obunyeeto n’obwire burungi bw’okuheereza Yehova?

¹³ Heereza Yehova n’omujinya omu bunyeeto. (Shoma Omubuurizi 12:1.) Toshemereire kuteekateeka ngu oine kubanza kutunga omurimo murungi reero obone kuheereza Yehova. Waaba ori omunyeeto nibwo orikubaasa kuheereza Yehova omu bwijwire. Eminyeeto abaingi tibaine bujunaanizibwa bwingi omu ka yaabo kandi nibaba baine amaani kubaasa kwejumba omu buheereza oburikwetengyesa amaani. Niki eki orikwenda kukorera Yehova omu bunyeeto? Noobaasa kuba oine ekigyendererwa ky’okuba payoniya. Noobaasa kuba nooyenda kuheereza omu kicweka ahu barikugamba orurimi orundi. Nari nooyenda kwongyera aha buheereza bwawe omu kibiina eki orimu hati. Kyona eki oraacwemu kukora oine kuba noomanya oku oraayebaiseho. Ni murimo ki ogu orikwenda kukora, kandi nigwetengyesa kutendekwa kurikwingana ki?

OKUCWAMU GYE ORIKUHWERWA EMISINGYE YA BAIBULI

14. Twaba nitutebeekanisiza ebiro byaitu eby’omumaisho tushemereire kwegyendesereza ki?

¹⁴ Emisingye ya Baibuli eshatu ei twashwijuma neebaasa kukuhwera kucwamu omurimo ogu oraakore. Hatariho kubanganisa abashomesa baawe nibabaasa kuba nibamanya ebirikukwata aha mirimo eriho omu kicweka kyanyu. Nainga nihabaasa kuba hariho nk’ekitongore kya gavumenti ekirikubaasa kukumanyisa ngu hariho omurimo omu kicweka kyanyu nari ei orikuza kuheereza. Okumanyisibwa nk’okwo nikubaasa kuba okw’omugasho, kwonka oine kwegyendesereza. Abantu abatarikuheereza Yehova nibabaasa kukutamu ekiteekateeko ky’okukunda ensi. (1 Yoh. 2:15-17) Waareeba ebintu ebi orikubaasa kutunga omu nsi, omutima gwawe nigubaasa kukubeiha.​—Shoma Enfumu 14:15; Yer. 17:9.

15, 16. N’oha orikubaasa kukuha obuhabuzi burungi oburikukwata aha by’emirimo?

¹⁵ Waaheza kumanya omurimo ogu orikubaasa kukora nooyetenga obuhabuzi burungi. (Enf. 1:5) Ni baahi abarikubaasa kukuhwera kushwijuma omurimo ogu oraakore barikukoresa emisingye ya Baibuli? Hurikiza abantu abarikukunda Yehova, abarikukukunda, abarikukumanya n’ebirikukukwataho. Nibaija kukuhwera kweshwijuma kumanya ebi orikubaasa kukora n’ebi otarikubaasa kukora. Obundi ebi baraagambe nibiija kukuhwera kuteekateeka munonga aha bigyendererwa byawe. Abazaire baawe baaba nibakunda Yehova nibabaasa kukuhwera munonga! Kandi, n’abareeberezi omu kibiina nibabaasa kukuha obuhabuzi oburaakuhwere kucwamu gye. Noobaasa kubuuza baapayoniya nari abareeberezi abarikutaayaayira ebibiina. Ahabw’enki baacwiremu kuheereza Yehova n’omutima gwabo gwona? Bakatandika bata kuba baapayoniya, kandi bakaba beebeisaho bata? Ni migisha ki ei batungire omu buheereza bwabo?​—Enf. 15:22.

¹⁶ Abo abarikukumanya gye nibabaasa kukuha obuhabuzi barikukoresa okwetegyereza. Nk’eky’okureeberaho, noobaasa kuba nooyenda kurekyera aho kushoma reero obe payoniya ahabw’okwenda kuhunga ebi eishomero ririkwenda ngu okore. Omuntu orikukukunda naabaasa kureeba ebigyendererwa byawe akuhwere kwetegyereza ngu eishomero niribaasa kukuhwera kutahwa maani, omutwarize oguraakuhwere kuheereza Yehova n’omutima gwawe gwona.​—Zab. 141:5; Enf. 6:6-10.

17. Ni kucwamu kwa muringo ki oku twine kwetantara?

¹⁷ Buri muntu weena orikuheereza Yehova naahikwaho embeera erikubaasa kumureetera kutuubya okwikiriza kwe kikamureetera kuruga ahari Yehova. (1 Kor. 15:33; Kol. 2:8) Emirimo emwe neebaasa kuba ey’akabi aha kwikiriza kwawe kukira endiijo. Mbwenu shi bamwe omu kicweka kyanyu “bakasiisikarirwa okwikiriza kwabo nk’obwato oku bufeera omu nyanja” bwanyima y’okutunga omurimo? (1 Tim. 1:19) Nikiba kiri eky’obwengye kwetantara kucwamu omu muringo oguraashiishe omukago gwawe na Ruhanga.​—Enf. 22:3.

YESIIME AHABW’OKUBA OMUNYEETO OMUKRISTAAYO

18, 19. Niki eki oshemereire kukora ku waakuba otakagizire kihika ky’okuheereza Yehova?

¹⁸ Ku oraabe oine ekyetengo ky’okuheereza Yehova, koresa obunyeeto bwawe kumuheereza nk’oku arikwenda. Cwamu omu muringo oguraakubaasise kuheereza Yehova omu bunaku obu.​—Zab. 148:12, 13.

¹⁹ Niki eki oshemereire kukora ku waakuba otakagizire kihika ky’okuheereza Yehova? Gumizamu noohamya okwikiriza kwawe. Paulo naayoreka eki yaakozire kubaasa kutunga emigisha ya Ruhanga. Akagira ati: “Ku muraateekateekye okundi aha kintu kyona, nakyo Ruhanga aryakibashuuruurira. Kwonka amazima agu tuhikiremu, tube nigo twagyenderamu.” (Fil. 3:15, 16) Guma noijuka ngu Yehova naakukunda kandi obuhabuzi bwe nibwo burikukirayo oburungi. Yehova niwe wenka oraakuhwere kucwamu gye okukira omuntu ondiijo weena.