Yehova ni Ruhanga Ohikire Kumanywa

HARIHO ekintu kikuru eki orikufeerwa eki oine kumanya? Waaba noomanya bikye ahari Ruhanga, buzima haine eki orikufeerwa. Ahabw’enki? Ahakuba, abantu baingi beetegyereize ngu okuteeraho kumanya Ruhanga orikugambwaho omu Baibuli n’eky’omugasho munonga. Noogasirwa hati n’omu biro by’omumaisho.

Yehova Ruhanga, Owaahandiikiise Baibuli, naayenda ngu tumumanye. Omuhandiiki wa zaaburi akagira ati: ‘Bamanye ngu niiwe wenka orikwetwa Yehova, nookira boona,’ kandi ori ahaiguru ya byona. Naamanya ngu nitugasirwa twamumanya. “Niinye [Yehova] Ruhanga waawe orikukwegyesa eby’okukugasira.” Nitugasirwa tuta twamanya Yehova Ruhanga, Rukira Boona?—Zaaburi 83:18; Isaaya 48:17.

Nitugasirwa ahakuba nitutunga obuhabuzi oburikutuhwera kuraba omu mbeera za buri izooba, amatsiko gahami aha biro by’omumaisho, n’obunanukye by’omu biteekateeko. Ekindi, okumanya Yehova gye nikituhwera kugira emiteekateekyere mirungi aha mbeera zigumire ezi abantu omu nsi yoona barikukira kurabamu ebiro ebi. Embeera ezo niziiha?

Okubaho Kwawe Kwine Ekigyendererwa?

N’obu haraabe habaireho okutunguuka omu by’empurizana, na hati abantu nibakibuuza ebibuuzo bikuru nk’ebi: ‘Ahabw’enki twahangirwe? Tworekyereire nkahi? Okubaho kwaitu kwine ekigyendererwa?’ Omuntu yaaba atatungire eby’okugarukamu ebihikire, naaba ataine ekigyendererwa ekihikire. Mbwenu shi eki abantu baingi nibakimanya? Okucondooza okwakozirwe omuri Germany emyaka ya 1990 erikutandika kukooreka ngu kimwe kya kabiri ky’abantu obumwe nibakira kwehurira nk’abataine kigyendererwa ky’okubaho. Obundi embeera nk’egi eri omu kicweka eki orikutuuramu.

Waaba otarikumanya ekigyendererwa ky’okubaho nooba otaine musingi gw’okwombekaho ebigyendererwa byawe. Baingi nibateeraho kutunga enshumbuushano haagira ebi baafeerwa barikutaho ekigyendererwa ky’okuba abasinguzi nari barikushanguriza eby’obugaiga. Kwonka nabwo nibaguma batamazirwe. Okutamanya ekigyendererwa ky’okubaho nikiteganisa abantu abamwe bahika n’aha kwenda kweita. Eki nikyo kyahikire aha mwishiki murungi kurugiirira aha rupapura rwa makuru International Herald Tribune, owaakuriire “omu ka engaiga kandi aine obugabe bw’okukora buri kimwe eki arikwenda.” N’obu araabe yaakuriire omu mbeera nungi, akaba aine eihamba ataine kigyendererwa. Akamira omubazi gw’okugwejegyera baamushaga afiire. Noobaasa kuba noomanya abandi abahikirweho akagwe nk’ako ahabw’okugira eihamba.

Haine obu oraahuriire abantu nibagira ngu saayansi neebaasa kushoboorora byona ebirikukwata aha magara? Orupapura rwa German orw’amakuru orwa buri saabiiti orurikwetwa Die Woche rukagira ruti: “N’obu saayansi yaakuba neereebeka nk’ehikire, kwonka n’enafu omu by’omu by’omwoyo. Enyegyesa erikugira ngu ebintu bikabaho bubaho egumire kwetegyereza, nangwa n’ebi abahangu barikuteebereza nibiguma nibihinduka, kandi tibirikureeta obuhuumure n’oburinzi.” Ebijumbwirwe abanyasaayansi bikozire kihango omu kushoboorora oku amagara gaatandikire, okuhindahinduka kw’embeera, n’ekiine kukorwa kubaasa kuhangaara. Kwonka saayansi tarikubaasa kutugambira ahabw’enki twahangirwe n’ahu tworekyeire. Twayesiga munonga saayansi nitubaasa kutatunga eby’okugarukamu eby’ebibuuzo byaitu. Orupapura rw’amakuru Süddeutsche Zeitung rukooreka ngu, “okusherura obuhabuzi kweyongyeire.”

Omuhangi tiwe ahikire kuha obuhabuzi nk’obwo? Obu niwe yaahangire abantu akabata omu nsi, aine kuba naamanya ahabw’enki turiho. Baibuli neeshoboorora ngu Yehova akahanga abantu kugira ngu baijuze ensi, bagireeberere kandi ebe eka yaabo. Abantu bakaba baine kutooreza emitwarize ya Yehova nk’oburingaaniza, obwengye, na rukundo omuri byona ebi barikukora. Twaheza kwetegyereza ahabw’enki Yehova yaatuhangire, nitumanya ahabw’enki turiho.—Okutandika 1:26-28.

Niki Eki Orikubaasa Kukora?

Ku oraabe oraatungire eby’okugarukamu ebihikire eby’ebibuuzo ebi: ‘Ahabw’enki twahangirwe? Tworekyeire nkahi? Ekigyendererwa ky’okubaho niki?’ Baibuli neekuhiga kuteeraho kumanya gye Yehova. Nangwa Yesu, akagira ati: “Aga nigo magara agatahwaho, okumanya iwe Ruhanga omwe ow’amazima, n’ogwo ou waatumire Yesu Kristo.” Kandi noohigwa kugira emitwarize y’Ekikristaayo, okukira munonga rukundo, kandi teeraho kweta ahansi y’obushoboorozi bw’Obukama bwa Mesia oburi haihi kutegyeka. Reero noija kumanya ekigyendererwa ky’okubaho n’ebiro birungi by’omumaisho. Ebibuuzo bikuru ebyabaire nibikuteganisa obundi nibiija kugarukamu.—Yohaana 17:3; Omubuurizi 12:13.

Noija kwehurira ota waatunga eby’okugarukamu? Hans n’eky’okureeberaho eki orikubaasa kwegyeraho.a Emyaka mingi enyima akaba ataine kwikiriza okwabuzima, kandi okwikiriza okwo kukaba kutarikukora makuru. Hans akaba naakunda kukoresa emibazi y’ekitabura bwongo, arikwejumba omu bikorwa by’obushambani, arikukora ebihagaro, kandi ari n’omu kigombe mpaka z’okuvuga piki. “Kwonka akaba atamazirwe,” nikwo arikushoboorora. Obu yaabaire ari omu myaka ya 20, Hans akacwamu kwega ebirikukwata ahari Ruhanga arikuta omutima aha kushoma Baibuli. Hans ku yaagumire naayega ahari Yehova kandi akeetegyereza amakuru g’okubaho, akahindura emitwarize ye yaabatizibwa yaaba omwe aha Bajurizi ba Yehova. Atwire omu buheereza bw’obutwire emyaka ikumi ehingwire. Naagira ati: “Okuheereza Yehova nikyo kirikukirayo oburungi. Tihaine ekirikubaasa kwingana nakwo. Okumanya Yehova kimpwereire kugira okumarwa.”

Amazima gari ngu, okumanya ekigyendererwa ky’okubaho tiyo nshonga yonka erikwerarikiriza abantu baingi. Embeera omu nsi zaayongyera kusiisikara, nihaija kuguma nihabaho enshonga ezindi ezirikuteganisa abantu.

Ahabw’enki Kyabaireho?

Haabaho ebigwererezi, abantu abu kihikireho nibakira kwebuuza bati: Ahabw’enki kibaireho? Oine kutunga eky’okugarukamu eky’ekibuuzo ekyo kubaasa kusingura enyehurira ezo. Omuntu yaaba atatungire eky’okugarukamu ekihikire, naaguma aine amaganya kandi naabaasa kuguubwa kubi. Teekateeka aha ky’okureeberaho kya Bruni.

“Emyaka mikye enyima kahara kangye kakafa,” nikwo Bruni arikugira, hati ori mukazi omuzaire ow’emyaka ya rwa gati. “Ahabw’okugira ngu niinyikiririza omuri Ruhanga, nkacwamu kuza ow’omwebembezi w’ediini kumpuumuriza. Akagira ngu Ruhanga akatwara Susanne omu iguru kandi hati ni maraika. Nkagira obusaasi bwingi, kandi naayanga Ruhanga ahabw’okutwara omwana wangye.” Bruni akaguma aine obusaasi n’enaku kumara myaka mingi. “Reero omwe aha Bajurizi ba Yehova akanyoreka omu Baibuli ngu nkaba ntashemereire kugirira Ruhanga ekiniga. Yehova taratwire Susanne omu iguru, kandi tarahindukire maraika. Akarwara ahabw’obutahikiirira bw’abantu. Susanne agwejegyeire omu kufa, ategyereize Yehova kumuzoora. Kandi nkeega ngu akaba naayenda ngu abantu batuure omu paradiso y’omu nsi ebiro byona, kandi ekigyendererwa kye nikiija kuhikiirira. Ku naaherize kwetegyereza eki Yehova ari, akaba munywani wangye, kandi amaganya gangye gaatuuba.”—Zaaburi 37:29; Byakozirwe 24:15; Abarooma 5:12.

Abantu baingi nibahikwaho oburemeezi bw’emiringo etari emwe n’emwe: oburemeezi obu turikwereetera, entaro, enjara rwaraanda, nari ebihikiirizi ebirikwereeta. Bruni akeehurira gye ku yaamanyire ngu Ruhanga tiwe arikureetaho okubonabona, akaba atarikwenda ngu abantu babonabone, kandi juba naaza kwihaho ebikorwa bibi. Ebintu bibi okweyongyera kubaho n’akamanyiso ngu turi omu “biro by’aha mperu” y’obusingye obu. Empindahinduka eziriyo nizibaho nizooreka ngu turi haihi kutunga embeera nungi.—2 Timoseo 3:1-5; Matayo 24:7, 8.

Okuteeraho Kumanya Ruhanga

Hans na Bruni bakaba baine emiteekateekyere etahikire ahari Ruhanga. Bakaba nibamwikiririzamu n’obu baraabe baabaire batarikumumanyaho bingi. Okuteeraho kwabo kumanya gye Yehova, kukarugamu ebirungi. Bakatunga eby’okugarukamu ebihikire eby’ebibuuzo ebi baabaire nibakira kwebuuza buri izooba. Eki kikabareetera kugira obusingye bw’omu biteekateeko n’amatsiko aha biro by’omumaisho. Abaheereza ba Yehova baingi barabire omu mbeera nk’ezaabo.

Kubaasa kumanya gye Yehova twine kushwijuma n’obwegyendesereza ebiri omu Baibuli, erikutugambira ebirikumukwataho n’ebi arikwenda ngu tukore. Eki nikyo bamwe omu kyasha ky’okubanza baakozire. Luka Omunyabyafaayo kandi omushaho akagamba aha ab’omu kibiina kya Beroya omuri Bugriika ngu, “bakaakiira ekigambo [kuruga ahari Paulo na Siila] n’emitima erikukundira kimwe, nibashwijuma omu Byahandiikirwe obutoosha kureeba ebigambo ebyo ku biraabe nikwo biri.”—Ebyakozirwe. 17:10, 11.

Kandi Abakristaayo ab’okubanza bakaba nibateeranira hamwe omu bibiina. (Ebyakozirwe 2:41, 42, 46; 1 Abakorinso 1:1, 2; Abagalatia 1:1, 2; 2 Abatesalonika 1:1) N’obunaku obu nikwo kiri. Abajurizi ba Yehova nibaza omu nteerane z’Ekikristaayo ezigyendereire kubahwera kwiririra haihi Yehova n’okumuheereza bashemereirwe. Okushashaanuka n’Abajurizi ba Yehova nikukugasira omu miringo endiijo. Obu abantu barikukuguma nibatooreza Ruhanga ou barikuramya, Abajurizi ba Yehova nibooreka emitwarize nk’eya Yehova omu muringo oguringaniire. N’ahabw’ekyo okuteeranira hamwe n’Abajurizi ba Yehova nikikuhwera kumanya gye Yehova.—Abaheburaayo 10:24, 25.

Mbwenu shi nikyetengyesa kutamu amaani kubaasa kumanya omuntu omwe? Buzima nikyetengyesa. Kwonka shi ekyo ti kimwe aha bintu bingi ebi waakwenzire kuhikiiriza? Teekateeka aha maani agu omwiruki rugambwa arikukoresa yaaba naayetendeka. Nk’eky’okureeberaho, Jean-Claude Killy omwiruki kuruga France owaasingwire omudaari gw’ezaabu naagamba aha kirikutwarirwa omu kuba omusinguzi omu mpaka z’okwiruka: “Oine kutandika kwetendeka harikuburayo emyaka 10, oyetebeekanise kare, kandi ogume nookiteekateekaho buri izooba. . . Oine kukora omurimo ogu omwaka gwona, orikukoresa ebiteekateeko, n’omubiri.” Nookoresa obwire obu bwona n’amaani ahabw’empaka ezirikubaasa kuhendera omu dakiika ikumi! Eki nikyoreka ngu nikyetengyesa okuteeraho munonga kubaasa kumanya Yehova.

Omukago Ogurikuguma Nigwongyera Kukura

N’oha orikwenda kufeerwa ekintu ekirikukirayo oburungi? Tariho. N’ahabw’ekyo, waamanya ngu toine kigyendererwa kihikire eky’okubaho, nari waaba nooyenda kumanya ahabw’enki hariho ebihikiirizi, mariirira kumanya Yehova, Ruhanga orikugambwaho omu Baibuli. Okumwegaho nikibaasa kuhindura amagara gaawe ebiro byona.

Mbwenu shi hariho obu turaarekyere aho kwega ebirikukwata ahari Yehova? Abatwire nibamuheereza kumara emyaka mingi nibatangaara ahabw’ebi bakirikwega n’ebisya ebi barikugumizamu nibamwegaho. Nitushemererwa kwega ebintu ebi kandi nibituhwera kumwirira haihi. Ka tugume nitwijuka ebigambo by’Entumwa Paulo, owaahandiikire ati: “Yeimwe! obutungi bwa Ruhanga, obwengye bwe n’okumanya kwe ka bitaine bugarukiro! Emicwere ye n’emitwarize ye tibirikubaasa kumanywa. N’oha oramanyire obwengye bwa [Yehova], nari n’oha orabeire omuhanuuzi we?”—Abarooma 11:33, 34.

[Obugambo obw’Ahansi]

[Ebigambo ebitoorainwe]

Abantu abamwe nibakyebuuza ebibuuzo nk’ebi: ‘Ahabw’enki ndiho? Ninza nkahi? Okubaho kwine kigyendererwa ki?’

[Ebigambo ebitoorainwe]

“Ku naatandikire kwetegyereza eki buzima Yehova ari, nkamwirira haihi”

[Ebigambo ebitoorainwe]

“Okuheereza Yehova nikyo kirikukirayo oburungi. Tihaine ekirikwingana nakyo. Okumanya Yehova kimpwereire kumanya ekigyendererwa ky’okubaho”