Noobaasa Kushemeza Ota Yehova omu Migambire Yaawe?

Yehova akatuhanga twine ekiconco ky’omuhendo, eky’okubaasa kugamba. Naafayo shi oku turikukoresa ekiconco eki? Buzima naafayo! (Shoma Yakobo 1:26.) Nitubaasa kukoresa tuta okubaasa kwaitu kw’okugamba omu muringo ogu Yehova arikusiima?

1. Nitubaasa kukoresa tuta ekiconco ky’okugamba?

Baibuli neetuhiga eti: “Mugumyane, kandi mwombekane.” (1 Abatesalonika 5:11) Noobaasa kuteekateeka ahari bamwe abaine kugumibwa? Noobaasa kukora ki kubareetera kwehurira gye? Bahamize ngu noobafaho. Obundi noobaasa kubagambira ebi orikubasiimaho. Noijuka ekyahandiikirwe ekirikubaasa kugumya omuntu ou orikumanya? Hariho ebyahandiikirwe bingi ebi orikubaasa kukoresa. Kandi ijuka ngu, ebigambo ebi orikugamba n’oku orikubigamba ni kikuru omu kugumya abandi. N’ahabw’ekyo butoosha teeraho kugamba gye, kandi omu muringo gw’embabazi.—Enfumu 15:1.

2. Ni migambire ki ei twine kwetantara?

Baibuli neegira eti: ‘Omu kanwa kaanyu hatarirugamu ekigambo kyona ekibi.’ (Shoma Abaefeso 4:29.) Eki nikimanyisa ngu nitwetantara kukoresa orurimi rubi nari ebigambo ebirikucumita, ebirikuba bigyendereire kureetera omuntu kwehurira kubi. Kandi twine n’okwetantara orugambo n’okubeiherera abandi.—Shoma Enfumu 16:28.

3. Niki ekiraatuhwere kugamba ebirikwombeka abandi?

Ebintu ebi turikukira kugambaho nibyoreka ekirikuba kiri omu mutima gwaitu n’ebiteekateeko byaitu. (Luka 6:45) N’ahabw’ekyo twine kwetendeka kuta omutima aha bintu ebihikire, ebishemeire, ebirikusiimwa, kandi ebirikuhimbisibwa. (Abafilipi 4:8) Kubaasa kuta omutima aha bintu ebi, twine kutoorana gye eby’okweshemeza n’abanywani. (Enfumu 13:20) N’eky’obwengye kubanza twateekateeka tutakagambire. Yetegyereze oku ebigambo byawe birikukwata aha bandi. Baibuli neegira ngu okugamba ebigambo otabandize kubiteekateekaho, ‘nibicumita nka rurara, kwonka orurimi rw’omunyabwengye nirutamba.’—Enfumu 12:18.

SHWIJUMA GYE

4. Rinda emigambire yaawe

Obumwe, twena nitugamba ebintu bwanyima twefuuza. (Yakobo 3:2) Shoma Abagalatia 5:22, 23, kubaasa kugarukamu ebibuuzo ebi:

• Aha mitwarize egi ni guuha ogu orikubaasa kushaba Yehova kukuha, reero gukakuhwera kurinda emigambire yaawe? Emitwarize egi neebaasa kukurinda eta?

Shoma 1 Abakorinso 15:33, kubaasa kugarukamu ekibuuzo eki:

• Abanywani abu orikutoorana n’eby’okweshemeza ebi orikwejumbamu nibibaasa kukureetera kugira migambire ki?

Shoma Omubuurizi 3:1, 7, kubaasa kugarukamu ekibuuzo eki:

• Ni ryari obu kirikuba kiri eky’obwengye kuhunama, nari kutegyereza okagamba omu bwire buhikire?

5. Gamba gye aha bandi

VIDIYO: Gambira Abandi ‘Ebirungi Ebirikubaasa Kubombeka’ (4:07)

• Omu vidiyo egi, ahabw’enki ow’eishe-emwe yaabaire naayenda kuhindura oku arikugamba aha bandi?

• Akakora ki kubaasa kuhinduraho?

Shoma Omubuurizi 7:16, kubaasa kugarukamu ekibuuzo eki:

• Twine kwijuka ki twayohibwa kugamba kubi aha muntu?

Shoma Omubuurizi 7:21, 22, kubaasa kugarukamu ekibuuzo eki:

• Ekyahandiikirwe eki nikibaasa kukuhwera kita kutagira ekiniga omuntu yaakugambaho ebitahikire?

6. Ba omunyambabazi waaba noogamba n’ab’eka yaawe

VIDIYO: Rukundo n’Okuhaana Ekitiinisa Nibigaita Amaka (3:08)

• Niki ekiraakuhwere kugamba gye n’ab’eka yaawe?

Shoma Abaefeso 4:31, 32, kubaasa kugarukamu ekibuuzo eki:

• Ni migambire ki erikwombeka eka?

Yehova akooreka oku yaabaire naatwara Omwana we, Yesu. Shoma Matayo 17:5, kubaasa kugarukamu ekibuuzo eki:

• Noobaasa kutooreza ota Yehova waaba noogaaniira n’ab’eka yaawe?

OMU BUGUFU

Ebigambo biine amaani. N’ahabw’ekyo, twine kwegyendesereza munonga ebi turikugamba, n’oku turikubigamba.

Okweijutsya

• Noobaasa kukoresa ota ekiconco ky’okugamba kuhwera abandi?

• Ni migambire ki ei oine kwetantara?

• Niki ekirikubaasa kutuhwera kugamba ebirikwombeka abandi kandi eby’embabazi?

JUMBURA EBINDI

Niki ekirikubaasa kutuhwera kugira emigambire mirungi?

Gira Orurimi rw’Abanyabwengye (8:04)

Manya ekirikubaasa kukuhwera kwetantara kukoresa emigambire mibi.

“Okukyeena shi Buzima ni Kubi?” (Eky’aha mukura)

Reeba oku orikubaasa kwetantara kugwa omu mutego gw’okugambuura abandi.

Nimbaasa Kutajanjaaza Nta Orugambo? (2:36)

Manya oku Yehova yaahweraire omushaija owaabaire aine emigambire mibi.

“Nkatandika Kuteekateeka n’Obwegyendesereza aha Mitwarize Yangye” (Omunaara gw’Omurinzi, Agusto 1, 2013)