EISHOMO 11
Oku Orikubaasa Kugasirwa Gye omu Baibuli
Oratiinireho kukora omurimo muhango? Shana obundi kubaasa kworoberwa kugukora, okagukora omu bucwekacweka. Nikyo kimwe n’okushoma Baibuli. Noobaasa kwebuuza oti: ‘Ntandikire nkahi?’ Omu ishomo eri, nituza kureeba ebintu byorobi ebi orikubaasa kukora kukuhwera kukunda kushoma Baibuli n’okugyega.
1. Ahabw’enki twine kushoma Baibuli obutoosha?
Omuntu orikushoma Baibuli butoosha, nari “ebiragiro bya” Yehova, naashemererwa kandi naasingura. (Shoma Zaaburi 1:1-3.) Tandika orikushoma kumara edakiika nkye buri izooba. Waayongyera kumanya ebiri omu Kigambo kya Ruhanga, nooyongyera kukunda kukishoma.
2. Niki ekiraakuhwere kugasirwa omu kushoma Baibuli?
Kubaasa kugasirwa gye omu kushoma Baibuli, twine kwemereramu tukateekateeka aha bi twashoma. Twine kugishoma kandi ‘tukagiteekateekaho.’ (Yoshua 1:8) Waaba noogishoma, yebuuze ebibuuzo nk’ebi: ‘Eki nikinyegyesa ki ahari Yehova Ruhanga? Eki nimbaasa kukigyenderaho nta? Nimbaasa kukoresa nta ebyahandiikirwe ebi kuhwera abandi?’
3. Noobaasa kutunga ryari obwire bw’okushoma Baibuli?
Noogumirwa kutunga obwire bw’okushoma Baibuli? Baingi ahariitwe nitugumirwa. Teeraho kukoresa gye obwire bwawe. (Abaefeso 5:16) Eki noobaasa kukikora orikutaho obwire bw’okushoma Baibuli buri izooba. Abamwe nibataho entebeekanisa y’okushoma Baibuli omu kasheeshe kare munonga. Abandi, omu ihangwe nk’omu bwire bw’okurya kyamushana. Kandi abandi nibagishoma barikuza kubyama. Iwe ni bwire ki oburikukubaasikira?
SHWIJUMA GYE
Yega kureetera okushoma Baibuli kuba okurikushemeza. Manya oku orikubaasa kutebeekanisa gye kugira ngu ogasirwe gye omu kwega Baibuli.
Nk’oku turikwega kurya eby’okurya by’omutaano, nitubaasa kwega kukunda kushoma Baibuli
4. Yega kukunda kushoma Baibuli
Nikibaasa kutooroba kutandika kushoma Baibuli. Kwonka, nitubaasa kugira ekihika ky’okugishoma, nk’oku omuntu arikutandika mporampora kukunda kurya eby’okurya bisya. Shoma 1 Petero 2:2, kubaasa kugarukamu ekibuuzo eki:
Noogira ngu waaguma nooshoma Baibuli buri izooba, noija kugikunda ogire n’ekihika ky’okwenda kugishoma?
Zaana VIDIYO oreebe oku abamwe baatandikire kukunda kushoma Baibuli, kubaasa kugarukamu ebibuuzo ebirikukurataho.
Omu vidiyo egi, eminyeeto bakasingura buremeezi ki?
Niki ekyabahweraire kuhamira aha kigyendererwa kyabo eky’okushoma Baibuli?
Bakareetera bata okushoma Baibuli kuba okurikushemeza?
Obukoryo oburaakuhwere kutandika:
Toorana envunuura ya Baibuli eyorobi, kandi erikwesigwa. Teeraho kushoma New World Translation yaaba eriho omu rurimi rwawe nari oru orikwetegyereza gye.
Banza oshome ebitabo byayo ebirikukushemeza munonga. Kumanya oku orikubaasa kukikora, reeba kyati “Okutandika Kushoma Baibuli.”
Taho akamanyiso ahu waahika omu kushoma. Koresa kyati eri omu kitabo eki eine omutwe “Manya Ahu Waahika omu Kushoma Baibuli.”
Koresa JW Library® app. Neekuhwera kushoma Baibuli n’okugihurikiza omu maraka orikukoresa esimu nari ekindi kyoma.
Koresa ebyongyeirweho omu New World Translation. Nibitwariramu maapu, kyati, n’ebishobooroirwe ebirikubaasa kureetera okushoma Baibuli kuba okurikushemeza.
5. Tebeekanisa ebi orikuza kwega
Shoma Zaaburi 119:34, kubaasa kugarukamu ekibuuzo eki:
Ahabw’enki ni kirungi kushaba otakashomire Baibuli nari otakatebeekaniise ebi orikuza kwega?
Noobaasa kugasirwa ota omu bwijwire buri murundi ogu orikuza kwega? Waaba nootebeekanisa buri ishomo eri orikuza kwega, teeraho kukuratira omuringo ogu:
Shoma obucweka bw’eishomo oburikubanza.
Shoma ebyahandiikirwe, kandi oteereho kwetegyereza oku birikuhikaana n’eishomo.
Shaza aha bigambo ebirikugarukamu buri kibuuzo, kandi eki nikiija kukuhwera kuhikaanisa gye ebiteekateeko aha ishomo n’orikukwegyesa.
Eki waaba nookimanya?
Abajurizi ba Yehova bakakoresaho envunuura za Baibuli ez’emiringo mingi. Kwonka, nitukunda munonga eya New World Translation of the Holy Scriptures ahakuba ehikire, eyorobi kwetegyereza, kandi erimu eiziina rya Ruhanga.—Reeba ekicweka ky’aha mukura “Abajurizi ba Yehova shi Baine Baibuli Eyaabo?””
ABAMWE NIBAGIRA NGU: “Okwega Baibuli kigumire munonga. Tinyine bwire n’amaani g’okugyega.”
Iwe nooteekateeka ki?
OMU BUGUFU
Kubaasa kugasirwa gye omu Baibuli, taho obwire bw’okugishoma, shaba Ruhanga kukuhwera kwetegyereza ebi orikushoma, kandi tebeekanisa ebi orikuza kwega.
Okweijutsya
Niki ekiraakuhwere kugasirwa gye omu Baibuli?
Noobaasa kutunga ryari obwire bw’okushoma Baibuli n’okugyega?
Ahabw’enki n’eky’omugasho kutebeekanisa ebi orikuza kwega?
JUMBURA EBINDI
Yeijutsye enshonga ezimwe ezirikubaasa kukuhwera kugasirwa omu kushoma Baibuli.
“Oku Orikubaasa Kugasirwa omu Kushoma Baibuli” (Omunaara gw’Omurinzi Na. 1 2017)
Manya emiringo eshatu ey’okushoma Baibuli.
“Baibuli Neebaasa Kumpwera Eta?—Ekicweka 1: Manya Gye Baibuli Yaawe” (Eky’aha mukura)
Manya oku orikubaasa kukunda kushoma Baibuli.
Tunga obukoryo bw’okushoma Baibuli kuruga aha bamazire obwire buraingwa barikugishoma.