Noobaasa Kuba Munywani wa Yehova

Yehova naayenda ngu omumanya gye. Ahabw’enki? Aine obwesigye ngu waayongyera kumanya emitwarize ye, emihanda ye, n’ebigyendererwa bye, noija kwenda kuba munywani we. Buzima noobaasa kuba munywani wa Ruhanga? (Shoma Zaaburi 25:14.) Noobaasa kukora ki kuba munywani we? Baibuli neegarukamu ebibuuzo ebyo kandi neeyoreka ahabw’enki okunywana Yehova nigwo mukago ogurikukirayo obukuru.

1. Yehova naatuhiga kukora ki?

“Mwirire haihi Ruhanga, nawe abone kubairira haihi.” (Yakobo 4:8) Eki nikimanyisa ki? Yehova naakuhiga kuba munywani we. Abamwe nikibagumira kwikiriza ngu nibabaasa kunywana Ruhanga ahabw’okugira ngu tibarikumureeba. Kwonka Yehova naakoresa Ekigambo kye Baibuli, kutumanyisa buri kimwe eki turikwenda kumanya aha bikwatiraine n’emitwarize ye kubaasa kumwirira haihi. Twashoma obutumwa obu Ruhanga yaatuhaire oburi omu Baibuli, omukago gwaitu nawe nigwongyera kuhama n’obu turaabe tutakamureebaga.

2. Ahabw’enki Yehova niwe munywani orikukirayo ou orikubaasa kugira?

Tihaine orikukukunda kukira Yehova. Naayenda ngu oshemererwe kandi omushabe waaba nooyenda obuhwezi bwe. Noobaasa ‘kumwegyekyerera okushoberwa kwawe kwona, ahabw’okuba’ naakufaho. (1 Petero 5:7) Butoosha Yehova naaba ayeteekateekire kuhwera banywani be, kubahuumuriza, n’okubahurikiza.—Shoma Zaaburi 94:18, 19.

3. Yehova banywani be abainemu amatsiko g’okukora ki?

Yehova naakunda abantu boona okutwarira hamwe, kwonka naanywana “ab’omutima ogugororokire.” (Enfumu 3:32) Banywani be abainemu amatsiko g’okuteeraho kukora ebirungi, n’okwetantara kukora ebibi. Abamwe nibabaasa kuteekateeka ngu tikirikubaasika kworobera emitindo ya Yehova erikukwata aha kirungi n’ekibi. Kwonka, Yehova tarikutaho maremesa. Naayakiira buri omwe orikumukundira kimwe, kandi orikuteeraho kumushemeza.—Zaaburi 147:11; Ebyakozirwe 10:34, 35.

SHWIJUMA GYE

4. Abrahamu akaba ari munywani wa Yehova

Ebi Baibuli erikugamba ahari Abrahamu (kandi orikwetwa Abramu) nibituhwera kumanya eki kirikumanyisa kuba munywani wa Ruhanga. Shoma ebirikukwata ahari Abrahamu omu Okutandika 12:1-4, kubaasa kugarukamu ebibuuzo ebi:

• Yehova akashaba Abrahamu kukora ki?

• Yehova akamuraganisa ki?

• Abrahamu akatwara ata ebi Yehova yaamugambiire kukora?

5. Eki Yehova arikushaba banywani be kukora

Banywani baitu nituba tubainemu amatsiko g’okugira ebi baatukorera.

• Ni bintu ki ebimwe ebi orikwenda ngu banywani baawe bakukorere?

Shoma 1 Yohaana 5:3, kubaasa kugarukamu ekibuuzo eki:

• Yehova naayenda ngu banywani be bakore ki?

Kubaasa kworobera Yehova, nikibaasa kutwetengyesa kuhindura emicwe yaitu nari emitwarize yaitu. Shoma Isaaya 48:17, 18, kubaasa kugarukamu ekibuuzo eki:

• Ahabw’enki Yehova naayenda ngu banywani be bakore empinduka?

6. Ebi Yehova arikukorera banywani be

VIDIYO: Yehova Ankoreire Bingi (3:20)

• Omu vidiyo egi Yehova akahwera ata omukazi kusingura emiteekateekyere etahikire n’enyehurira zigwire?

Shoma Isaaya 41:10, 13, kubaasa kugarukamu ebibuuzo ebi:

• Yehova naaraganisa kukorera ki banywani be boona?

• Ahabw’enki nooteekateeka ngu Yehova naabaasa kuba omunywani murungi?

7. Okugira omukago na Yehova nikitwariramu okuhurizana nawe

Okuhurizana nikuhwera abanywani kuhamya omukago gwabo. Shoma Zaaburi 86:6, 11, kubaasa kugarukamu ebibuuzo ebi:

• Nitubaasa kuhurizana tuta na Yehova?

• Yehova naagamba ata naitwe?

OMU BUGUFU

Yehova naayenda kuba munywani waawe, kandi naija kukuhwera kumwirira haihi.

Okweijutsya

• Yehova naahwera ata banywani be?

• Ahabw’enki Yehova naagambira banywani be kukora empinduka?

• Noogira ngu kigumire kuba munywani wa Ruhanga, nari kyorobi?

JUMBURA EBINDI

Okuba munywani wa Ruhanga nikibaasa kukugasira kita?

“Yehova ni Ruhanga Ohikire Kumanywa” (Omunaara gw’Omurinzi, Febwari 15, 2003)

Manya oku orikubaasa kuba munywani wa Ruhanga.

“Nimbaasa Kuba nta Munywani wa Ruhanga?” (Eminyeeto Nibabuuza—Eby’okugarukamu Ebirikukora, aka 2, eshuura 35)

Manya ahabw’enki omukazi omwe naateekateeka ngu okuba munywani wa Yehova kikamucungura.

“Nkaba Ntarikwenda Kufa!” (Omunaara gw’Omurinzi Na. 1 2017)

Hurikiza eminyeeto barikugamba enyehurira ezi bainiire Yehova.

Nikimanyisa ki Okuba Munywani wa Ruhanga? (1:46)