Ruhanga Atwiniire Kigyendererwa Ki?

KU ORIKUSHOMA empapura z’amakuru, okareeba tiivi, nari okahurikiza radiyo, nooreeba kandi ohurira bingi ebirikukwata aha kuhenda ebiragiro, entaro n’obuzahambuki. Obundi naiwe oine obusaasi ahabw’endwara nari ahabw’okufeerwa omuntu ou orikukunda.

Yebuuze oti:

• Eki nikyo Ruhanga arikunyendeza n’ab’omu ka yangye?

• Nimbaasa kwiha nkahi obuhwezi kwemera oburemeezi bwangye?

• Nihaija kubaho obusingye obwabuzima?

Baibuli neeha eby’okugarukamu by’ebibuuzo ebi.

BAIBULI NEEYEGYESA NGU RUHANGA NAIJA KUKORA EBY’OKUTANGAAZA EBI OMU NSI.

• Abantu tibarikwija kugaruka, kuba abakaikuru nari abagurusi, nari kufa.—Okushuuruurwa 21:4

• “Ekirema kiryaguruka nk’empara.”—Isaaya 35:6

• “Amaisho g’empumi garyahumuurwa.”—Isaaya 35:5

• Abaafiire nibaija kuzooka.—Yohaana 5:28, 29

• Tihaine oraagarukye kurwara.—Isaaya 33:24

• Buri omwe omu nsi naija kutunga eby’okurya bingi.—Zaaburi 72:16

  

GASIRWA OMU KI BAIBULI ERIKWEGYESA

Kyorobi kuteekateeka ngu ebi waashoma aha mpapura ez’okubanza ez’akatabo aka n’ebirooto burooto. Kwonka Ruhanga naaraganisa kureetaho empindahinduka ezo omu nsi omu bwire butari bwa hare, kandi Baibuli neeshoboorora oku araakikore.

Baibuli erimu ebirikukira ahari ekyo. Neetugambira eki twine kumanya kubaasa kutunga okushemererwa okwabuzima hati. Teekateeka aha bintu ebirikukwerarikiriza. Ebi nibibaasa kutwariramu eby’amaka nari esente, amagara mabi, nari okufeerwa omuntu ou orikukunda. Baibuli neebaasa kukuhwera kwemera oburemeezi obu, kandi neebaasa kukuhuumuriza erikugarukamu ebibuuzo nk’ebi:

• Ahabw’enki nitubonabona?

• Nitubaasa kwemera tuta oburemeezi obu twine?

• Eka yaitu neebaasa kubamu okushemererwa?

• Niki ekirikutubaho twafa?

• Nitwija kugaruka kureeba abakundwa baitu abaafiire?

• Ahabw’enki nituhamya ngu Ruhanga naija kukora buri kimwe eki yaaraganiise?

Ahabw’okugira ngu nooshoma akatabo aka, nikyoreka ngu nooyenda kumanya eki Baibuli erikwegyesa. Akatabo aka nikaija kukuhwera. Buri kacweka kaine ekibuuzo kyako, kandi eki nikiija kukuhwera kwetegyereza gye Baibuli. Abantu baingi batwire nibakunda kuhikaanisa ebiteekateeko aha Baibuli barikuhwerwa Abajurizi ba Yehova. Twine amatsiko ngu naiwe noija kukunda omuringo ogu. Nitushaba Ruhanga kukuha omugisha omu kuteeraho kumanya eki Baibuli erikwegyesa!