Okuguma Oine Obusingye n’Abanyabuzaare

Abarikutaaha omu bushwere nibaba baatandika eka eyaabo. N’obu oraabe oine kuguma nookunda abazaire baawe kandi noobaha ekitiinisa, ou ori nawe omu bushwere niwe aine kutwara omwanya gw’okubanza. Bamwe aha banyabuzaare baawe nibabaasa kugumirwa kukyetegyereza. Kwonka emisingye ya Baibuli neebaasa kukuhwera kutagwera rubaju, omu kuteeraho kugira omukago guhami omu ka yaawe n’okuguma oine obusingye n’abanyabuzaare.

1 GUMA OINE EMITEEKATEEKYERE MIRUNGI AHA BANYABUZAARE

EKI BAIBULI ERIKWEGYESA: “Tiina sho na nyoko.” (Abaefeso 6:2) N’obu waakuba waagizire eka eyaawe oine kuguma nooha abazaire baawe ekitiinisa. N’ahabw’ekyo manya ngu ou ori nawe omu bushwere, nawe aine kugirira abazaire be obwire. “Okukunda tikugira ihari,” n’ahabw’ekyo oteerarikirira ahabw’omukago ogu ou ori nawe omu bushwere aine n’abazaire be.​—1 Abakorinso 13:4; Abagalatia 5:26.

EKI ORIKUBAASA KUKORA:

• Yetantare kukoresa ebigambo nka, “Ab’owaanyu tibarikumpa kitiinisa” nari “Nyoko takasiimaga ebi ndikukora”

• Teeraho kureeba ebintu omu muringo ogu ou ori nawe omu bushwere arikubireebamu

2 HAMIRA AHA KIHIKIRE

EKI BAIBULI ERIKWEGYESA: ‘Omushaija aryatsigaho ishe na nyina, agume n’omukazi we; bombi babe omubiri gumwe.’ (Okutandika 2:24) Ku orikutaaha omu bushwere, abazaire baawe nibabaasa kuteekateeka ngu bakikwineho obujunaanizibwa, kandi kibareetere kwenda kutaaha omu nshonga z’obushwere bwawe ekirengire.

Iwe n’ou ori nawe omu bushwere mwine kwikirizana ahu abazaire baanyu bashemereire kugarukira. Eki noobaasa kukibagambira butunu, kwonka omu muringo ogurikworeka ngu noobaha ekitiinisa. (Enfumu 15:1) Okugira emitwarize, nk’obucureezi, okutwaza gye, okugumisiriza nikiija kukuhwera kugira omukago murungi n’abanyabuzaare baawe kandi ogumizemu noobagumisiririza omuri rukundo.​—Abaefeso 4:2.

EKI ORIKUBAASA KUKORA:

• Waareeba ngu abanyabuzaare baanyu baine oku barikubataahataahamu, kigaaniireho n’ou ori nawe omu bushwere mwaheza kwikaikana

• Mwikirizane aha ku murikubaasa kushoboorora enshonga ezo