Sefela sa Difela
8 “Ge nkabe o le buti’aka
Yo a antšego letswele la mma!
Ke be ke tla re ge ke go hwetša ka ntle ka go khisa
Gomme batho ba be ba ka se ntshole.
Ke be ke tla go nea beine e tswakilwego,
Le seno sa digarenate seo se sa tšwago go dirwa.
3 Seatla sa gagwe sa le letshadi se tla ba se nthekgile hlogo,
Gomme seatla sa gagwe sa le letona se tla ba se nkgokaretše.
4 “Lena barwedi ba Jerusalema, ke le eniša gore:
Le se ke la tsoša goba la phafoša lerato la ka go ba go fihlela le itlela.”
5 “Ke mang mosadi yo yoo a rotogago a etšwa lešokeng,
Yo a ithekgilego ka moratiwa wa gagwe?”
“Ke go tsošitše o le ka tlase ga moapola.
Gona moo mmago a bego a šokwa a le gona.
Ke gona moo yo a go belegego a ilego a šokwa gona.
6 “Mpee pelong ya gago bjalo ka pheta yeo e lego molaleng wa gago,
Le bjalo ka palamonwana yeo e lego letsogong la gago.
Gobane lerato ke le matla bjalo ka lehu
E bile le dira gore o kgomarele motho yo o mo ratago bjalo ka Lebitla* ge le kgomarela bao ba lego ka go lona.
Lerato le swana le kgabo ya mollo o tukago, kgabo ya Jah.*
7 Meetse a mantšhi a ka se kgone go tima lerato,
Dinoka le tšona ga di kgone go le gogola.
Ge e ba motho a ka nyaka go reka lerato ka dilo tša gagwe ka moka tše bohlokwa tša ntlong ya gagwe,
Ruri batho ba tla di nyatša.”*
8 “Re na le moratho wa ngwanenyana,
Yo a sa tšwago a thoka matswele.
Re tla mo direla’ng
Mohlang ba nyaka go mo nyala?”
9 “Ge nkabe e le leboto
Re be re tla mo direla tora ya silifera,
Eupša ge nkabe e le mojako,
Re be re tla mo thiba ka lepolanka la motsedara.”
10 “Ke nna leboto,
Gomme matswele a ka a swana le ditora.
Ka gona ge moratiwa wa ka a ntebelela
O mpona ke na le khutšo.
11 Solomone o be a na le serapa sa meterebe kua Baali-hamoni,
Gomme o ile a se nea batho gore ba se hlokomele.
Ge serapa seo se e ba le dienywa, yo mongwe le yo mongwe o be a tliša dišekele tša silifera tše 1 000 (sekete).
12 Dišekele tša silifera tše 1 000 (sekete) ke tša gago Solomone
Gomme tše 200 (makgolo a mabedi) ke tša bao ba hlokomelago serapa,
Eupša nna ke nyaka go itlhokomelela serapa sa ka.”
13 “Wena yo a dulago dirapeng,
Bagwera ba ka ba nyaka go kwa lentšu la gago.
Anke le nna ke le kwe.”
14 “Phakiša moratiwa wa ka,
Kitima ka lebelo go swana le phala
Goba kgama e nyenyane
Yeo e lego dithabeng tša mehlašana yeo e nkgago bose.”