Puku ya Bobedi ya Dikoronika
23 Ka ngwaga wa bošupa, Jehoyada o ile a bontšha sebete gomme a dira kgwerano le baetapele ba dihlopha tša mašole a 100, e lego Asaria morwa wa Jerohama, Ishimaele morwa wa Jehohanani, Asaria morwa wa Obede, Maaseya morwa wa Adaya le Elishafate morwa wa Sikiri. 2 Ke moka ba sepelasepela le naga ya Juda ka moka gomme ba kgoboketša Balefi bao ba bego ba le metseng ya Juda ka moka le baetapele ba malapa a borakgolokhukhu ba Isiraele. Ge ba fihla Jerusalema, 3 phuthego ka moka e ile ya dira kgwerano le kgoši ka ntlong ya Modimo wa nnete. Ka morago ga moo, Jehoyada a re go yona:
“Morwa wa kgoši o tla buša go etša ge Jehofa a be a tshepišitše seo mabapi le barwa ba Dafida. 4 Dirang se: Ikaroleng ka dihlopha tše tharo. Sehlopha se sengwe sa baperisita le Balefi seo se tla bago se šoma ka Sabatha, se tla leta mejako. 5 Sehlopha se sengwe se tla ba ntlong ya kgoši gomme se sengwe sa ba Keiting ya Fantešeni. Ke moka batho ka moka ba tla ba malapeng a ntlo ya Jehofa. 6 Le se ke la dumelela motho a tsena ka ntlong ya Jehofa ge e se baperisita le Balefi bao ba hlankelago moo. Bona ba ka tsena ka gobane ke sehlopha se sekgethwa. Ke moka batho ka moka ba swanetše go kwa molao wa Jehofa gomme ba dule ka ntle. 7 Balefi ba swanetše go dikologa kgoši ka mahlakoreng ka moka, yo mongwe le yo mongwe a swere dibetša tša gagwe. Motho yo a ka tsenago ka ntlong o tlo bolawa. Le dule le na le kgoši kae le kae moo e yago gona.”
8 Balefi le Bajuda ka moka ba ile ba dira seo moperisita Jehoyada a ba laetšego sona. Yo mongwe le yo mongwe a tšea mašole a gagwe ao a bego a šoma ka sabatha le ao a bego a sa šome ka sabatha ka gobane moperisita Jehoyada o be a se a lokolla dihlopha mošomong wa tšona. 9 Moperisita Jehoyada a fa baetapele ba dihlopha tša mašole a 100 marumo, dikotse tša dinkgokolo le dikotsana tšeo e bego e le tša Kgoši Dafida, tšeo di bego di le ka ntlong ya Modimo wa nnete. 10 Ke moka a emiša setšhaba ka moka, yo mongwe le yo mongwe a swere sebetša sa gagwe ba eme go tloga ka lehlakoreng le letona la ntlo go fihla ka lehlakoreng le letshadi la ntlo, ba bangwe ba le kgauswi le aletare gomme ba bangwe ba le kgauswi le ntlo. Ka moka ba be ba dikologile kgoši. 11 Ke moka sa ntšhetša morwa wa kgoši ka ntle sa mo rweša mphapahlogo hlogong ya gagwe le Molao Woo o Ngwadilwego,* gomme sa mo dira kgoši. Ke moka Jehoyada le barwa ba gagwe ba mo tlotša ke moka ba re: “Anke kgoši e phele go ya go ile!”
12 Ge Athalia a ekwa lešata la batho bao ba kitimago, o ile a napa a ya go batho bao ka ntlong ya Jehofa. 13 Ke moka a bona kgoši e eme kgauswi le philara ya yona mojakong. Baetapele le baletši ba diphalafala ba be ba na le kgoši gomme batho ka moka ba moo nageng ba be ba thabile ebile ba letša diphalafala gomme diopedi tšeo di bego di swere diletšo tša mmino di be di eteletše pele batho bao ba bego ba goeletša ba thabile. Ge Athalia a bona seo, o ile a gagola diaparo tša gagwe gomme a goeletša a re: “Ba logile maanomabe! Ba logile maanomabe!” 14 Eupša moperisita Jehoyada a tla le baetapele ba dihlopha tša mašole a 100 bao ba bego ba kgethilwe gore ba hlokomele mašole, a re go bona: “Mo ntšheng ka mo gare ga mašole. Le gona ge e ba go ka ba le motho yo a mo emelelago, a bolawe ka sabola!” Ka gobane moperisita o be a itše: “Le se ke la mmolaela ka ntlong ya Jehofa.” 15 Ka gona ba mo swara gomme ge a fihla Keiting ya Dipere ya ntlo ya kgoši ba ile ba mmolaela gona moo gateetee.
16 Ke moka Jehoyada a dira kgwerano ya gore yena le kgoši gotee le batho ka moka, ba tla tšwela pele e le batho ba Jehofa. 17 Ka morago ga moo setšhaba ka moka sa ya tempeleng ya Baali gomme sa e phušola, sa phušola dialetare tša gagwe, sa pšhatlaganya le diswantšho tša gagwe gomme sa bolaya Matane yoo e bego e le moperisita wa Baali pele ga dialetare tšeo. 18 Ke moka Jehoyada a tšea mešomo ya ka ntlong ya Jehofa a e fa baperisita le Balefi bao Dafida a bego a ba beile ka dihlopha gore ba hlokomele ntlo ya Jehofa le gore ba direle Jehofa dihlabelo tša go fišwa go ya ka seo se ngwadilwego Molaong wa Moshe. Ba be ba dira bjalo ba thabile ebile ba opela ka ge Dafida a be a laetše bjalo. 19 Le gona o ile a bea batho bao ba letago dikeiti dikeiting tša ntlo ya Jehofa e le gore motho yo a sa hlwekago ka tsela le ge e le efe a se ke a tsena. 20 Ke moka a tšea baetapele ba dihlopha tša mašole a 100, batho bao ba hlomphegago, batho bao ba bušago ba bangwe le batho ka moka ba moo nageng gore ba tšwe le kgoši ge e etšwa ka ntlong ya Jehofa. Ke moka ba tsena ka keiti ya ka godimo ba ya ntlong ya kgoši ke moka ba dudiša kgoši setulong sa bogoši. 21 Ka gona, setšhaba ka moka sa mo nageng sa thaba gomme motseng gwa ba le khutšo ka gobane Athalia o be a bolailwe ka sabola.