Puku ya Bobedi ya Dikoronika
22 Ke moka badudi ba Jerusalema ba bea Ahasia morwa wa gagwe yo monyenyane gore e be kgoši legatong la gagwe, ka gobane batho bao ba bego ba tlile le Baarabia go tlo hlasela kampeng ya Bajuda ba be ba bolaile batho ba bagolo ka moka. Ka gona Ahasia morwa wa Jehorama o ile a thoma go buša e le kgoši ya Juda. 2 Ahasia o be a na le mengwaga e 22 ge a eba kgoši, gomme o bušitše Jerusalema ka ngwaga o tee. Leina la mmagwe e be e le Athalia setlogolo sa Omiri.
3 Le yena o dirile dilo tšeo ba ntlo ya Ahaba ba di dirilego ka gobane mmagwe ke yena a bego a mo eletša gore a dire dilo tše mpe. 4 O ile a dula a dira dilo tše mpe pele ga Jehofa go no swana le ge ba ntlo ya Ahaba ba ile ba dira bjalo. Ka gobane ka morago ga lehu la tatagwe, ba ntlo ya Ahaba ba ile ba mo eletša gomme mafelelong a fedišwa. 5 O ile a theetša dikeletšo tša bona, gomme a sepela le Jehorama morwa wa Kgoši Ahaba wa Isiraele go yo lwa le Kgoši Hasaele wa Siria kua Ramothe-gileada, moo babetši ba mesebe ba ilego ba gobatša Jehorama. 6 O ile a boela Jeseriele gore a yo fola dintho tšeo ba bego ba mo ntšhitše tšona kua Rama ge a be a elwa le Kgoši Hasaele wa Siria.
Ahasia* morwa wa Jehorama kgoši ya Juda, o ile a ya Jeseriele go yo bona Jehorama morwa wa Ahaba ka ge a be a gobetše. 7 Eupša, eitše ge Ahasia a eya go Jehorama, Modimo a diriša sebaka seo gore Ahasia a bolawe. Ge a fihla, o ile a tšwela kantle le Jehorama gore ba yo kopana le Jehu setlogolo sa Nimishi, yoo Jehofa a bego a mo tloleditše gore a yo fediša ba ntlo ya Ahaba. 8 Ge Jehu a thoma go phetha kahlolo go ba ntlo ya Ahaba, o ile a hwetša baetapele ba Juda le barwa ba banababo Ahasia, bao e bego e le bahlanka ba Ahasia gomme a ba bolaya. 9 Ke moka a roma batho gore ba nyake Ahasia gomme ba mo swara moo a bego a khutile gona kua Samaria, ke moka ba mo tliša go Jehu, ba mmolaya gomme ba mmoloka, ka gobane ba be ba re: “Ke setlogolo sa Jehoshafate, yoo a bego a hlankela Jehofa ka pelo ya gagwe ka moka.” Go be go se na motho wa ntlo ya Ahasia yoo a bego a na le matla a go buša.
10 Ge Athalia mmago Ahasia a bona gore morwa wa gagwe o hlokofetše, o ile a fediša ba leloko la bogoši la ntlo ya Juda ka moka. 11 Eupša Jehoshabeathe morwedi wa kgoši o ile a utswa Jehoashe morwa wa Ahasia gare ga barwa ba kgoši bao ba bego ba swanetše go bolawa. A tšea yena le moledi wa gagwe gomme a ba khutiša ka kamoreng ya ka garegare. Jehoshabeathe morwedi wa Kgoši Jehorama (e be e le mosadi wa moperisita Jehoyada e bile e le kgaetšedi ya Ahasia) o ile a kgona go mo khutiša gore Athalia a se ke a mmolaya. 12 Jehoashe o ile a dula a khutile ka ntlong ya Modimo wa nnete ka mengwaga e tshela, nakong ya ge Athalia a buša naga.