Wangakangania uti ko ukasima Yehova busana n’embanulo

1-2. Yesu mwaherera engebe yiwe busana netu, ekyo kikatukuna erikolaki, kandi busanaki? (2 Abanya Korinto 5:14, 15) (Ulebaye n’epitsa.)

TUBUGHE tuti omundu mwakakulusaya omo nyumba eyilue iyabirikutererako. Ahate eritika-tika ighunemwendibula erisima omundu oyo nomo angabya imwakawatikaya n’abandi bandu? Ighuwene-wene ighukendisima omundu oyo, n’erimubwira ngoko siwendisyibirirwa n’ahake ekyo alyakukolera.

² Ngoko twanalangira omo mwatsi w’ahanyuma, tulaghire oko mundu oyo wangatusabula oko rilolo n’oluholo. Aliwe oluholo lwa Yesu lwanganatuwatikya omo myatsi isatu eno: (1) erighanyirwa amalolo wetu, (2) eribya n’amaha w’erilua omo mubere wetu w’obutahika-hikana, (3) n’eribya n’obwira obuwene na Yehova. Ekyo kikaleka itwabya n’amaha w’erisyabyaho kera na kera omo kihugho kihya kya Yehova. Yesu mwakangania ngoko atwanzire kutsibu omughulu aherera engebe yiwe busana netu. Nibya embere ase oko kihugho, abya iniatwanzire. (Misyo 8:30, 31) Omukwenda Paulo mwahandika ati: “Olwanzo lwa Kristo lukatukuna.” (Soma 2 Abanya Korinto 5:14, 15.) Ekyo ni bugha ambu, olwanzo lwa Yesu lukatukuna erikola omwatsi mulebe owakakanganaya ngoko sitwangibirirwa n’ahake ekyo atukolera.

3. Busanaki esyonzira sy’erikangania erisima busana n’embanulo syanganabula erisosana?

³ Embanulo ya Yesu yangakukuna erikolaki? Obuli mundu awite ekisubiryo kiwe. Eriminya ekyo kyo ndeke, terilengekania oko bandu basatu abakasonda eritsuka olughendo. Abandu abo bakaya haghumerera, aliwe obuli mundu akalua omo muyi wiwe kandi obuli mundu akendilaba omo nzira yiwe. Netu tuli ng’abandu abo. Twanzire itwakangania ko tukasima Yehova na Yesu busana n’ekyo babiritukolera. Aliwe obuli mundu awite enzira y’erikangania mw’erisima liwe. Omo mwatsi ono, tukendikania oko mihanda isatu y’abandu abakakanganaya erisima lyabo omo nzira esisighene: (1) Abigha b’eBiblia, (2) Abakristo ababatisibwe, (3) n’abandu ababirileka erikolera Yehova.

ABIGHA B’EBIBLIA

4. Yehova akalangira ati abigha b’eBiblia?

⁴ Wamabya ighunemwigha eBiblia, uminye kino: Eriligha engulu mbuya kikakanganaya ngoko uli oko abandu abo oMungu akaleta eyo ali batoke eribya bira biwe. (Yoh. 6:44; Mib. 13:48) “Yehova yukalebaye ebiri omo mutima.” Ekyo ni bugha ambu, akalangira ngoko unemuyikasa utoke erimuminya, kandi akatsema akalangira ukabindula emyatsi milebe omo ngebe yaghu utoke erikwama esyokanuni siwe. (Misyo. 17:3; 27:11) Kundi Yesu mwakuholera, ukatoka eribya n’obwira obuwene haghuma na Yehova. (Rom. 5:10, 11) Isiwanatibirirwa ekyo n’ahake.

5. Abigha b’eBiblia bangakolesya bati erihano eriri omo Abanya Filipi 3:16?

⁵ Wamabya ighuli mwigha w’eBiblia, wangakangania uti ko ukasima ekihembo ky’embanulo? Enzira nguma ry’erikwama erihano eryo omukwenda Paulo ahandikira Abakristo be Filipi. Mwabugha ati: “Nomo twangabya itwabirilola embere omo lulengo lwahi, situlekere aho.” (Flp. 3:16) Eyindi mbindula y’eBiblia ikabindula yitya erisako eri: “Litolere itwalola embere omo nzira ngumerera eno, eyo tunemo.” Ngoko erisako eri likatuhana, isiwaleka omwatsi wosi-wosi kutse ekindu kyosi-kyosi bikaleka ukataluka erilola embere omo nzira eno, eyikakolaya oko ngebe.​—Mat. 7:14; Luka 9:62.

6. Litolere omwigha w’eBiblia iniakolaki kyamamukalako erikirirya omwatsi mulebe kutse erikola esyombinduka silebe? (Eryibuka Ebihano 30:11-14) (Ulebaye n’epitsa.)

⁶ Kwamuhwa kyanganakukalako eriligha omwatsi mulebe ogho mwamalua okw’igha. Neryo wangakolaki? Litolere iwakwesa-kwesa oko mwatsi oyo kandi iwasaba Yehova akuwatikaye eryowagho ndeke. (Esy. 86:11) Omwatsi oyo amabilola embere erikukala-kalako, ulabe kugho; ukendisyowagho ndeke bolo. Aliwe isiwaleka erigha e Biblia. Kandi kyanabirikukalako erileka omutse ogho Yehova aponire? Litolere iwibuka ngoko Yehova syalisaba n’ahake abandu b’ebyo bate bangatoka. Naghu unawite obutoki bw’erikola ebyangamwanzisya. (Soma Eryibuka Ebihano 30:11-14.) Kandi Yehova akalagha ati akendikuwatikya. (Isa. 41:10, 13; 1 Kor. 10:13) Neryo isiwaluha. Omo mwanya w’erihwerya obulengakania b’oko byo ukalabamo, uhirebo oko byosi ebyo Yehova abirikukolera erihirako n’eriherera Mughala wiwe. Olwanzo lwaghu oko Yehova lukalola embere erikula, ukendiyilangirira ngoko “ebyalayiro biwe si muheke owalitohire.”​—1 Yoh. 5:3.a

7. Abana balere abali omo kihanda ky’Abimiri ba Yehova, litolere ibalengekania okuki?

⁷ Tubughe tutiki oko bana betu abali omo ndeko? Nabo ni bigha b’eBiblia. Bana, oko bandu abo ababuti benyu batolere ibigha nabo eBiblia, inywe muli b’embere-mbere. EBiblia ikabugha yiti: “Museghere hakuhi n’oMungu, naye akendiseghera hakuhi nenyu.” (Yak. 4:8; 1 Emy. 28:9) Omughulu ukakola emyatsi eyikaleka obwira bwaghu na Yehova ibwanoka, naye akakola emyatsi eyikendileka obwira bwenyu ibwanoka. Ababuti baghu eribya omo kwenene, kyo kiteleka Yehova iniakuyira mo mwira wiwe. Omo mwanya w’ekyo anzire iwanokya obwira haghuma naye. Yehova abirikolaki utoke erinokya obwira naye? Mwatuma mughala wiwe akuholere. Ekyo ni kihembo ky’obughuli. (Rom. 5:1, 2) Neryo ekiro ky’Eryibuka oluholo lwa Yesu kikaseghera hakuhi ulengekanaya oko kyo Yehova na Yesu babirikukolera. Ulengakanaye nga wangakolesya uti engebe yaghu n’erilengekania oko myatsi eyo utolere iwalandamirira utoke erikangania ko ukasima Yehova busana n’ekyo abirikukolera.b

ABAKRISTO ABABATISIBWE

8. Omukristo oyubatisibwe abirikangania ati obw’ikirirya omo mbanulo?

⁸ Wamabya ighuli Mukristo oyubatisibwe, wabirikangania ngoko ukasima ekyo Yehova na Yesu bakukolera. Ng’eky’erileberyako, muwalekana n’emyatsi milebe utoke eritsemesya Yehova n’erikwama esyokanuni siwe. Muwasikya ekyalayiro kya Yesu ky’erikola abigha kandi unemubwira abandi b’ebyo wikirirye. Muwayiherera oko Yehova, wamabatisibwa. Kwamuhwa abandu mubakwendererya busana n’eriyisogha erikolera Yehova. (2 Tim. 3:12) Eribya ighunemukolera Yehova yo butaleghula kikakanganaya ngoko umwanzire, kandi ngoko ukasima ekyo abirikukolera, ni bugha ambu erituma Yesu ahole busana naghu.​—Ebr. 12:2, 3.

9. Abakristo ababiribatisibwa batolere ibayiteya oko mwatsi wahi?

⁹ Itwe Bakristo ababiribatisibwa, tutolere itwaminya ngoko hane olubanza olo tutolere itwayiteyako. Ebiro bikalaba, twanganaherya erisima lyetu oko mbanulo. Ekyo kyangatuhikira kiti? Tukanaye oko kyahikira Abakristo be Efeso ab’oko karne k’erimbere. Yesu mwasimabo busana n’eriyiyinia lyabo. Nomo bine mwabwirabo ati: “Aliwe, siniritsemera omwatsi ono okw’iwe: Wabirileka erikangania olwanzo olo wabya nalo oko mwanzo.” (Erib. 2:3, 4) Ebinywa bya Yesu ebyo bikakanganaya ngoko kyanganahikira Omukristo iniatsuka erikolera oMungu n’emitima ibiri. Omundu oyo anganabya akasaba, iniaghenda oko mihindano, n’eritulira. Aliwe anganabya iniakakola ebyo mo kituli, isi busana n’olwanzo. Wangakolaki wamabya isighukyanzire Yehova nga kera?

10. Wangakolesya uti erihano eryo Paulo aha Timoteo eriri omo 1 Timoteo 4:13, 15?

¹⁰ Omukwenda Paulo mwabwira Timoteo ati abye akalengekania kutsibu okw’iramya liwe n’erihira kulyo k’omutima. (Soma 1 Timoteo 4:13, 15.) Ngoko erihano eryo likakanganaya, wanganalengekania nga wangakolaki utoke erilola embere eribya “n’omuhwa omo mubiiri wa Yehova.” (Rom. 12:11) Ng’eky’eriberyako, wanganabya ukateghekania ndeke emihindano. Ekyo kikendileka iwabya ukakwamayo ndeke. Kutse omughulu ukayighisaya eBiblia, wanganabya ukasondya omwanya owatulere utoke erighanirya oko ebyo ukasoma. Ngoko omundu akanatunda omuliro n’eryongeryamo esyongwi akasyalima, naghu litolere iwalola embere erikola emyatsi eyiri ng’eyo utoke erisima butsir’ileka ebyosi ebyo Yehova abirikukolera, erihirako n’embanulo. Amayenga malebe embere omuhindano w’Ery’ibuka ahike, wanganalengekania oko myatsi eyo Yehova anemukolera abandu biwe. Ekyo kikendyongera erisima lyaghu oko mbanulo eyikaleka iwabya n’obwira obuwene na Yehova.

11-12. Wamabya isighukiwite omuhwa nga kera, ekyo ini bugha ambu sighukiriko ekirimu ky’oMungu? Kanaya. (Ulebaye n’epitsa.)

¹¹ Kyanganakuhikira iwalangira ngoko omuhwa waghu abirikeha. Ekyo kyamabya isiwabunika mutima kutse eriyowa oMungu ng’abirikulusyako ekirimu kiwe. Wibuke ebyo Paulo ahandikira Abakristo be Korinto ebilebirye omubiiri wiwe. Mwabugha ati: “Nomo nangakola nitya butsira eryanza, nisabirwe erikola omubiiri oyo.” (1 Kor. 9:17) Ekyo ni bugha ambu ki?

¹² Ihakanabya endambi Paulo iniayowa isyali n’omuhwa w’eritulira. Nomo bine, mwayisogha kundu erilola embere eritulira nomo angayowa ng’akwire obughata. Naghu wanganayisogha erikola ekyo. Uyisoghe erikola ekyuwene nomo wangayowa iwamabula omuhwa w’erikolakyo. Neryo usabe Yehova akuhe “omuhwa n’obutoki bw’erikola ekyo.” (Flp. 2:13) Ubye ukakola emyatsi eyangakuwatikya erisighala hakuhi na Yehova. Ekyo kikendileka endambi iyahika olwanzo lwaghu oko Yehova ilwakanya neryo iwatasyabya n’omuhwa.

13. Twangakolaki tutoke erilebya nga ‘tunemukola erikwamana n’obwikirirya’?

¹³ Obuli ndambi litolere itwabya itunemuyilebya ngoko Paulo anabugha omo 2 Abanya Korinto 13:5. Mwabugha ati: “Mubye mukalebya nga munemukola erikwamana n’obwikirirya bwenyu, mubye mukalebya nga muli bandu abali bati.” Twanganabya tukayibulya amabulyo ng’ano: ‘Ninemuhira emyatsi y’Obwami y’embere?’ (Mat. 6:33) ‘Eby’eriyitsemesya ebyo ngasombola, bikanakanganaya ngoko niponire ekibi?’ (Esy. 97:10) ‘Ebyo ngakakola n’ebyo ngabugha, bikanaleka endeko iyabya iyinemo obuholo n’obughuma?’ (Efe. 4:2, 3) Eryibuka Oluholo lwa Yesu ni mughulu oghuwene, ow’erighanirya kutsibu oko kyo Yehova na Yesu babiritukolera. Kandi likatuha akanya k’eriyitsopolya n’eriyilebya nga tunemutsemesya Kritso kutse nga tukayitsemesaya.c

ABAKRISTO ABIRILEKA ERIKOLA

14. Ni myatsi milebe yahi eyabirileka Abakristo balebe ibaleka erihindana?

¹⁴ Hane Abakristo balebe ababirileka erihindana. Abandu abo bangababya imubaleka enyuma sy’emisi mingyi babibatisibwa kutse enyuma sy’emyaka mingyi. Busanaki? Abandi bakaluha busana “n’erihangya-hangya ly’engebe.” (Luka 21:34) Abandi mubatwikala busana n’ebinywa bya mulikyetu kutse emikolere yiwe. (Yak. 3:2) N’abandi mubakola erilolo erikalire neryo babirihemuka kandi sibalibatanza erisondya obuwatikya bwa Yehova. Nomo kyangabya ini kyahi ekikaleka, wangakolaki utasyasuba omo ndeko? Erilengekania oko mbanulo kyangakukuna erikolaki?

15. Yehova akakanganaya ati ngoko atsomene esyombuli esiherire? (Ezekieli 34:11, 12, 16)

¹⁵ Terilengekania Yehova ng’akayowa ati busana n’abandu ababiriyihighula oko ndeko. Syahitene kubo kandi syibirirwebo. Omo mwamya w’ekyo akasondaya esyombuli esiherire. Akalisayasyo n’eriwatikyasyo sitoke erisuba omo kihangulo. (Soma Ezekieli 34:11, 12, 16) Naghu Yehova anemwendikukolera atya? Inga ko bine bitya! Eribya ighunemusoma omwatsi ono kikakanganaya ngoko ukinanzire eritsemesya Yehova. Yehova mwalangira omo mutima waghu mw’emyatsi eyuwene neryo amakuleta omo kwenene. Okw’ekyo syangatsema ukasuba enyuma, anzire iwasuba omo ndeko.

16. Niki kyo kyangawatikya omundu eritasyasubira Yehova? (Ulebaye n’epitsa.)

¹⁶ Akatabu Umurudilie Yehova kalimo ebinywa bino ebikasikaya mutima: “Uyiketere ngoko Yehova akendikuwatikya ukayikasa erimusubira. Yehova akendikuwatikya erilwa n’erihangya-hangya n’erilwa n’emyatsi eyikabuna mutima. Kandi akendikuwatikya eribya n’obunya-mutima obuwene, neryo iwatulera omo mutima n’omo bwenge. Ekyo kikendileka iwatasyatoka erikolera Yehova haghuma n’abaghala na bali benyu.” Wibuke ngoko, abasyakulu b’endeko banayiteghekire erikuwatikya. Bali “ng’ah’eriyibisa oko kihunga, omwanya w’eriyibisamo busana n’ekibula.” (Isa. 32:2) Erikangania erisima ryaghu busana n’embanulo, yibulaye eribulyo lino, ‘Ni myatsi yahi eyo nangakola lino nitoke ‘eritasyalungula emyatsi’ na Yehova? (Isa. 1:18; 1 Pet. 2:25) Ng’eky’erileberyako, wanganatasyatsuka erihindana oko mihindano. Wanganahikira omughuma w’oko basyakulu b’endeko, iwamusaba obuwatikya. Anganakusondera ow’eritasyigha naye eBiblia omo biro bilebe. Uyiketera ndeke-ndeke ngoko Yehova akendikutsumula ukayikasa erimusubira n’erikangania ko ukamusima busana n’embanulo.

EKYO WANGAKOLA

17-18. Ebiro ebitangirire Eryibuka ly’omwaka ono litolere itwakolaki erikangania erisima lyetu?

¹⁷ Yehova mwaherera engebe ya Mughala wiwe “oyukamwikiriraya syahere nikwa abane engebe y’erikota.” (Yoh. 3:16) Kundi Yesu mwatuholera, Yehova akatulusaya omo bukobe bw’ekibi n’oluholo. Mughulu wosi litolere itwakangania erisima lyetu busana n’embanulo. (Rom. 3:23, 24; 2 Kor. 6:1) Ebiro ebikatangirira ekiro ky’Eryibuka oluholo lwa Yesu bikatuha akanya k’erighanirya oko lwanzo olo Yehova na Yesu batukanganaya, n’olwanzo olo lukatukuna eringakania erisima lyetu.

¹⁸ Wangakangania uti erisima lyaghu oko mbanulo? Obuli mundu akasubiraya omo nzira yiwe. Aliwe tuyiketere ngoko Yehova akendisyatsumula akaghala ako ukendisyahiraho utoke erihindana n’amamilioni w’abaghala n’abali benyu abakakanganaya ngoko sibaliho busana “n’erikola ebyo banzire, aliwe busana n’eritsemesya oyo wahola busana nabo.”​—2 Kor. 5:15.