Yesu amabya Masiya

Yohana abya iniane mutulira ati: ‘Oyunyilengire anemwasa.’ Omughulu Yesu ayira emyaka nga 30, mwalua e Galilaya n’erighenda oko Lusi lwe Yordani, eyo Yohana abya inianemubatisirya abandu. Yesu mwanza ati Yohana amubatisaye, aliwe Yohana mwabugha ati: ‘Sinitolere erikubatisya. N’iwe utolere erinyibatisya.’ Yesu mwabwira Yohana ati: ‘Yehova anzire iwanyibatisya.’ Neryo mubaya omo Lusi lwe Yordani, na Yohana mwalubika Yesu yo ndeke omo maghetse.

Yesu abere abilua omo maghetse, mwasaba. Oko ndambi eyo, olubula mulwakingukala, n’ekirimu ky’oMungu mukyamundaghalirako ng’akalikuku. Neryo Yehova mwabugha erilua elubula ati: “Uli Mughala waghe omwanzwa; nabirikuligha.”

Yesu abya Kristo kutse Masiya omughulu ekirimu ky’oMungu kyamundaghalirako. Neryo aho angatsukire omubiiri ogho Yehova amutuma erisyakola oko kihugho.

Yesu abere abinabatisibwa, mwaghenda omo mbwarara n’eribughayo ebiro 40. Abere abisubula, mwaya eyiri Yohana. Abere abihika ahali Yohana, Yohana mwabugha ati: ‘Eki ni Kyana ky’Embuli ky’oMungu oyukalusaya erilolo ry’ekihugho.’ Omw’ibugha atya, Yohana mwaleka abandu ibaminya ngoko Yesu yo Masiya. Unasi ebyahikira Yesu iniane omo mbwarara? Tulebaye.