Yohana amateghekania enzira

Yohana mughala wa Zekaria na Elizabeti abere abikula mwabya muminyereri. Yehova mwakolesya Yohana erikangirirya abandu ati Masiya anemwasa. Aliwe omo mwanya w’erikangirirya omo syosinagogi kutse omo miyi, Yohana iye mwakangirirya omo mbwarara. Abandu mubalua e Yerusalema ne Yudea bakasyakangiriribwa na Yohana. Mwabakangirirya ati, eritsemesya oMungu, batolere ibaleka erikola ebibi. Babere babihulikirira Yohana, abangyi mubabindula emitima yabo, naye mwababatisya omo Lusi lwe Yordani.

Yohana mwolobya engebe yiwe. Iniakambala olukimba olukokotibwe omo bweya bw’engamia kandi iniakalya esyongyike n’obuki. Abandu mubanza eriminya Yohana nga nindi. Nibya n’Abafarisayo ab’emiyiheko n’Abasadukayo mubasa erisyamulebya. Yohana mwababwira ati: ‘Mutolere imwabindula emitsye yenyu n’eribindula emitima. Isimwalengekanaya muti muli b’embaghane kundi muli bana ba Abrahamu. Ekyo si bugha ambu muli bana b’oMungu.’

Abandu bangyi mubasyabana Yohana, n’erimubulya bati: ‘Niki kyo tutolere erikola eritsemesya oMungu?’ Yohana mwabwira Abayahudi ati: ‘Wamabya ighuwite oko syongyimba ibiri, uhe olughuma oyutawite.’ Unasi ekyaleka iniabugha atya? Abya anzire ibaminya ngoko eritsemesya oMungu, litolere ibanza abandu.

Yohana mwabwira abakalihisaya ebitasi ati: ‘Mubye mw’ekwenene, isimwiba omundu wosi-wosi.’ Mwabwira abasuda ati: ‘Isimwaligha ebyutuliro kutse eribugha amabehi.’

Abahereri n’Abalawi nabo mubasyasunga Yohana n’erimubulya bati: ‘Iwe uli ndi? Obuli mundu anzire iniaminya.’ Yohana mwabugha ati: ‘Niri mulenge omo mbwarara. Ngasondola abandu oko Yehova, ngoko Isaya anabugha.’

Abandu mubanza ebyo Yohana abya akabakangirirya. Abangyi babya bakayibulya nga n’iye Masiya. Aliwe mwababwira ati: ‘Oghundi oyunilengire anemwasa. Kandi sinyitolere n’erikundula ekamba y’ebiryato biwe. Ngabatisaya omo maghetse, aliwe iye akendisyabatisya omo kirimu kibuyirire.’