Abamalaika bamatula engulu y’eributwa rya Yesu

Omutabali w’Obutabali bwe Roma, ye Kaisari Ogisto mwabugha ati Abayahudi bosi basube ewabo eriyayihandikisya. Neryo Yozefu na Maria mubaya e Betlehemu, eyo ekihanda kyabo Yozefu kyaluira. Maria abya iniakisiya iniabuta.

Babere babihika e Betlehemu, omwanya w’erighotseramo ogho babana, abya butsunga bw’esyonde. Omo mo Maria abutira mughala wiwe Yesu. Mwamuswika esyongyimba n’erimuhira omo kindu ekyo esyonyama sikaliramo.

Hakuhi ne Betlehemu, abandi balisya babya ibane omoli omo kiro bakateya ebihangulo byabo. Kitsumbukirania, omumalaika mwasa embere syabo, neryo ekyakakala ky’olukengerwa lwa Yehova mukyabatimbako. Abalisya mubakwa obuba, aliwe omumalaika mwababwira ati: ‘Isimwakwa obuba. Ninawite engulu eyuwene. Masiya abiributwa munabwire e Betlehemu.’ Oko ndambi eyo, abamalaika bangyi mubabughira omo kyanya bati: ‘Olukengerwa oko Mungu omo lubula, n’obuholo oko kihugho.’ Neryo abamalaika mubabulirana. Abalisya mubayowa bati?

Abalisya mubabwirana bati: “Tulw’itwaya e Betlehemu.” Mubaghenda, bameya Maria na Yozefu ibane n’omwana wabo omo butsunga bw’esyonde.

Obuli mundu oyo wowa ebyo omumalaika abugha mwasweka. Maria mwalengekania kutsibu oko ebyo omumalaika abugha, kandi mwatibirirwabyo. Abalisya mubasuba eyiri ebihangulo byabo, n’erisima Yehova busana n’ebyosi ebyo balangira n’eryowa.