Gabrieli amalenderera Maria

Elizabeti abya awite omutunga oyo wabya akahulwa mo Maria, oyo wabya ikere omo muyi we Nazareti, e Galilaya. Maria abya iniabirilaghana na Yozefu, omuseremala ngoko bakendilunga. Elizabeti abere abibugha emisi 6 ini mukule, omumalaika Gabrieli mwahulukira Maria. Mwabugha ati: ‘Wahi kwe, Maria. Yehova abirikutsumula.’ Maria mwataminya omumalaika ng’abya akasonda eribugha atiki. Neryo omumalaika mwamubwira ati: ‘Ukendiheka obukule n’eributa omwana w’obulume. Ukendisyamwahula mo Yesu. Akendisyabya Mwami n’Obwami bwiwe bukendisyabyaho kera na kera.’

Maria mwabugha ati: ‘Sindinataghotsera n’omulume. Ngendibuta niti omwana?’ Gabrieli mwabugha ati: ‘Sihali ekikalema Yehova. Ekirimu kibuyirire kikendikuhikako, neryo ukendisyabuta omwana. N’omutunga waghu ye Elizabeti, naye abiribya mukule.’ Neryo Maria mwabugha ati: ‘Ingye indi mughombe wa Yehova. Kinyibyeko ngoko wamabugha.’

Maria mwaya omo muyi owabyamo ehitwa eriyalebya Elizabeti. Maria abere abimukerya, Elizabeti mwowa omwana akasata omo nda yiwe. Elizabeti musulibwa n’ekirimu kibuyirire n’eribugha ati: ‘Maria, Yehova abirikutsumula. Ni lusunzo eribya na mama w’Omukama waghe omo nyumba yaghe.’ Maria mwabugha ati: ‘Ngapipa Yehova n’omutima waghe wosi.’ Maria mwikala na Elizabeti emisi ng’isatu, neryo mwasuba e Nazareti.

Omughulu Yozefu aminya ngoko Maria ni mukule, mwasonda erimughana. Aliwe omumalaika mwamuhulukira omo nzoli n’erimubwira ati: ‘Isiwasagha eritahya Maria. Syetakola kibi.’ Neryo Yozefu mwaherukya Maria amamuleta ewiwe.