Omughala w’omukwa-kali mwasuba

Oko mughulu w’omwisi munene, Yehova mwabwira Eliya ati: ‘Uye e Zarefati. Yine omukwa-kali akendikuha akalyo.’ Oko mulango w’omuyi, Eliya mwalangira omukwa-kali omwera akasenya. Mwamusaba amaghetse w’erinywa. Omukwa-kali abere akayenda amaghetse, Eliya mwamubirikira ati: “Kisi, uniletere n’omukati.” Aliwe omukwa-kali mwamusubirya ati: ‘Singwite oko mukati w’erikuha. Niwite oko hifarine hike n’otughuta otw’erihukamo omukati ogho tukendirya n’omughala waghe.’ Eliya mwamubwira ati: ‘Yehova abirilagha ati wamanihukira omukati, efarine yaghu n’amaghuta waghu isibyendisyahwa erihika aho embula yikendisyawira.’

Neryo omukwa-kali mwaya eka amayahukira omuminyereri wa Yehova y’omukati. Ngoko Yehova analagha, omukwa-kali n’omwana wiwe mubabya ibanawite eby’erirya omo mughulu wosi w’omwisi munene. Erilegha riwe ry’efarine n’amaghuta mubyabya ibinuswire.

Neryo omwatsi owakalire mwahuluka. Omwana w’omukwa-kali oyo mwalwala, neryo amahola. Mwasaba Eliya y’obuwatikya. Eliya mwamulusya kw’omwana n’erimutwala omo kyumba ekyabya omo lutwe lw’enyumba y’omukwa-kali. Mwamughotserya oko ngyingo, n’erisaba ati: ‘Kisi Yehova, subaya omwana oyu.’ Unasi nga ni busanaki Yehova erikola atya angabere mwatsi owakaswekaya? Kundi embere sy’aho, habya isihalihatabya n’omundu n’omughuma oyukasuba. N’ekindi, omukwa-kali oyo n’omwana wiwe sibabya Baisraeli.

Aliwe omulwana oyo mwasuba, amatsuka erihumula! Eliya mwabwira omukwa-kali ati: “Mughala waghu yono, amabisuba.” Mwatsema kutsibu n’eribwira Eliya ati: ‘Kwenene uli mundu w’oMungu. Namabugha nitya kundi ukabugha ebyo Yehova akakubwira ati ubughe.’