Yehova mwaha Eliya y’akaghala

Yezebeli mwowa ekyahikira abaminyereri ba Baali, neryo mwahitana kutsibu. Mwatumira Eliya y’omulaghe ono: ‘Naghu omungya ukendibya kinda ng’abaminyereri ba Baali.’ Eliya mwasagha kutsibu, neryo mwatibitira omo mbwarara. Mwasaba ati: ‘Yehova, namabiluha. Leka nihole.’ Iniabiriluha kutsibu, Eliya mwaghotsera omo ndina y’omuti.

Omumalaika mwamubukya n’erimubwira ati: “Hangana, ulye.” Eliya mwalangira omukati w’omuviringo ow’abya oko mabwe awahuhire n’erilegha ry’amaghetse. Mwalya n’erinywa neryo amatasyaghotsera. Kandi omumalaika mwamubukya n’eribugha ati: ‘Ulye. Ulaghire oko kaghala busana n’olughendo lwaghu.’ Neryo kandi Eliya mwalya. Neryo mwaghenda omo biro 40 omo musibo n’omo kiro erihika oko Kitwa kye Horebu. Eyo, Eliya mwaya omo mwangalu, amaghotseramo. Aliwe Yehova mwakania naye. Mwabugha ati: “Eliya, ukayira hano ho ghuti?” Eliya mwasubirya ati: ‘Abaisraeli sibetasikya endaghane yaghu. Babirihimbula ebiherero byaghu kandi babiriita abamaminyereri baghu. Neryo naghe banemusonda eriniita.’

Yehova mwamubwira ati: ‘Ghenda uyimane oko kitwa.’ Eky’erimbere, erihunga rinene erikalire muryalaba ahali omwangalu. Enyuma w’aho, omusiki mwalaba, n’omuliro mwakwama. Oko nduli, Eliya mwowa omulenge muke owahehere. Mwaswika obusu bwiwe omo lukimba lwiwe, neryo amimana oko bwingiriro bw’omwangalu. Neryo aho Yehova mwamubulya ekiryaleka iniatibita. Eliya mwasubirya ati: “Ingye nikisiyaho.” Aliwe Yehova mwamubwira ati: ‘Sighuli iwuwene. Hakine Abaisraeli 7 000 abakinanyiramaya. Ghenda uyahire amaghuta oko Elisha atoke eribya muminyereri omo mwanya waghu.’ Aho n’aho, Eliya mwayakola ngoko Yehova anamubwira. Yehova anganakuwatikya wamabikola ebyo akakusaba erikola? Inga. Tulebaye oghundi mwatsi ow’akoleka oko mughulu w’ekipwa.