Eriyilagha lya Yefta

Kandi Abaisraeli mubaleka eriramya Yehova, bamatsuka eriramya emiungu y’amabehi. Omughulu Abaamoni babambira Abaisraeli n’erilwa nabo, emiungu yabo y’amabehi muyitabawatikya. Abaisraeli mubaghalwa omo myaka mingyi. Oko nduli mubabwira Yehova bati: ‘Twabirikola erilolo. Kisi utusabule oko syonzighu syetu.’ Abaisraeli mubatsutsanga esyosanamu syabo n’eritasyatsuka eriramya Yehova. Yehova mwatanza bakalola embere iryaghalwa.

Omulwi oyukahulawa mo Yefta mwasombolwa erisondola Abaisraeli bakalwa n’Abaamoni. Yefta mwabwira Yehova ati: ‘Wamabituwatikya erisinga amalwa aya, ngakulagha niti omughulu nasyasubula, ngendisyakuha omundu w’erimbere oyukendisyahuluka omo nyumba yaghe akasyanikokya.’ Yehova mwahulikirira omusabe wa Yefta, neryo mwamuwatikya erisinga amalwa.

Yefta abere akasuba eka, omundu w’erimbere oyo wahuluka omo nyumba abya mwali wiwe, ekyusa kiwe. Abya inianemusata n’eriwata akaghoma. Yefta angakolireki? Mwibuka omulaghe wiwe neryo amabugha ati: ‘Iyoo, mwali waghe! Wamaleka omutima waghe inialuma. Munayilagha oko Yehova. Eriberererya eriyilagha lyaghe, nitolere erikutwala eyiri etabernakulo e Shilo eriyakolerayo.’ Aliwe mwali wiwe mwamusubirya ati: ‘Baba, wamabya imughukabwira Yehova y’omwatsi mulebe, utolere iwaberereryagho. Aliwe ekyo ngakusaba ry’erinilighira erighenda oko bitwa niyalabayeyo emisi ibiri n’abira baghe. Neryo enyuma w’aho ngendighenda eyiri etabernakulo.’ Mwali wa Yefta mwakolera Yehova yo butaleghula eyiri etabernakulo omo ngebe yiwe yosi. Obuli mwaka, abira biwe ibakaghenda e Shilo bakayamulebya.