Hana amasaba erihabwa omwana w’obulume

Omuisraeli oyukahulawa mo Elkana abya awite abakali babiri, ye Hana na Penina, aliwe aby’anzire Hana yo kutsibu. Penina iniakabya inianemusekererya Hana kundi Hana syabya awite abana, aliwe Penina iniawite abana banene. Obuli mwaka, Elkana iniakatwala ekihanda kiwe kye Shilo, eyiri etabernakulo bakayaramya. Kiro kighuma ibane eyiri etabernakulo, Elkana mwalangira omwanzi wiwe ye Hana iniane omo bulighe bunene. Neryo mwabugha ati: ‘Hana, leka erilira, une naghe. Nikwanzire.’

Enyuma w’aho, Hana mwayasaba iyuwene. Mwasaba Yehova y’obuwatikya akalira. Mwalagha Yehova ati: ‘Yehova wamabimba omwana w’obulume, ingendisyakuhaye biro byosi ebyo akendisyabyaho.’

Eli, Omuhereri Mukulu, mwalangira Hana inianemulira. Neryo Eli mwalengekania ati Hana abiritamira. Hana mwamubwira ati: ‘Iyehe, mukama waghe, Sinditanywa. Ngaghalawa kutsibu. Aliwe ninemubwira Yehova ebyosi ebiri omo mutima waghe.’ Eli mwaminya ngoko amakosa, neryo mwabugha ati; ‘oMungu akuhe ekyo ulyamusaba.’ Hana mwayowa buholo neryo amayighendera. Enyuma w’aho, Hana mwabuta omwana n’erimwahula mo Samweli. Terilengekania Hana nga mwatsema kungahi!

Hana mwatibirirwa ebyo alagha Yehova. Abere abitsirisya Samweli y’amabere, mwamutwala eyiri etabernakulo atoke erikolerayo. Hana mwabwira Eli ati: “Omulwana ono yo nabya ngasaba niti oMungu ambe. Ngamubweka Yehova omo biro byosi.” Obuli mwaka, Elkana na Hana ibakayalebaya Samweli n’erimutwalira ekanzu nyihya-nyihya. Kandi Yehova mwaha Hana y’abandi bana b’obulume basatu n’abana babiri b’obukali.