“Amalwa ni wa Yehova”

Oko 1999, Eleta ye France muyabugha yiti Ebeteli ye France yitolere iyalihira ebihembo by’esyofranga esyobabana eritsuka oko 1993 erihika oko 1996. Mutwaronda obuwatikya oko syotribinali sye France, aliwe mututabanabo. Twabere twataluka ngendo-ngendo, Eleta muyasaghula oko Beteli ye France kw’esyodolare 6 300 000. Amaha wetu w’omwiso abya oko Tribinali Ngulu ye Bulaya ey’Esyombangwa sy’Abandu. Aliwe embere sy’erituhulikirira, etribinali eyo muyatusaba erikania n’omutumwa wabo n’abaavoka b’Eleta ye France erilebya nga hanganabya erihulikirirana.

Mutwalengekania tuti omuavoka oyo anganatubwira ati tulighe eriha Eleta ye France y’esyofranga silebe olubanza olo luhwe. Aliwe, twabya twasi ngoko erihitya nibya n’edolare nguma itukendibya itwamaketa esyokanuni sy’eBiblia. Abaghala n’abali betu bo bateka esyofranga esyo busana n’eriwatikya omubiiri w’Obwami, neryo ebihembo byabo ebyo sitwangaherebyo Eleta. (Mat. 22:21) Aliwe mutwayayo busana n’erisikya Etribinali Ngulu ye Bulaya.

Mutwahindana omo kyumba kighuma ky’oko byumba ebyuwene by’Etribinali Ngulu eyo. Omukania mwatatsuka ndeke. Omo binywa biwe by’eritangirira, omuavoka mukali oyo mwabugha ati Abimiri ba Yehova batolere ibaliha ebitasi bilebe by’oko bitasi ebyo Eleta ye France yiryabasaba. Mutwalw’itwamubulya tuti, “Unasi ngoko Eleta ye France yabiritusaghulako esyodolare 89 000 000?”

Abere abyowa atya, mwahitana. N’abaavoka b’Eleta ye France babere baligha ngoko babirisaghulasyo, amalengekania wiwe mwalw’iniabinduka. Mwapurirabo n’erilw’iniatwirirya omuhindano w’aho. Yehova mwabindula omwatsi omo nzira eyo tutabya tulengekenie tutoke erisinga. Mutwalua omo kyumba ekyo itwabiritsema n’eriyira amaha ngoko tukendisinga.

Ekiro 30 Omwisi 6, 2011, Etribinali Ngulu ye Bulaya muyatwimira. Muyabugha yiti sitwendiliha ebitasi ebyo, kandi muyasaba Eleta ye France eritusubulirya esyofranga syetu esyo n’eryongeryako esindi! Eriyisogha eryo rikinateghaya eriramya ry’ekwenene omo France. Eribulyo righuma eryo, eryayileta omo bwenge bwetu muryabya ng’eribwe eryita Goliata, muryabindula emyatsi yosi. Mutwasinga busanaki? Ni busana ngoko Daudi abwira Goliata, “amalwa ni wa Yehova.”​—1 Sam. 17:45-47.

Olo silo lubanza lughuma lusa olo twabirisinga. Nomo amaguvernema n’ebisomo bikabya ibinemutwaghalya, esyotribinali ngulu-ngulu sy’omo bihugho 70 n’esyotribinali nyingyi esikasoha esyombanza omo kihugho kyosi syabiriwatikya Abimiri ba Yehova erisinga esyombanza 1 225. Erisinga eryo ryabirituwatikya omo syonzira mbiriri-mbiriri, ng’eribya ekisomo ekyasibwe n’Eleta, eribya bwiranda eritulira, eritendikola oko myatsi eyikakanganaya ngoko wanzire kutsibu ekihugho kyenyu, n’erighana omusasi.

Ingye mundu nabya ng’akolera oko Bwikalo Bukulu bw’Abimiri ba Yehova e New York omo Amerika, mukyabya kiti ingye eribya oko baavoka abatumawa oko Tribinali Ngulu ye Bulaya ey’Esyombangwa sy’Abandu?

ABABUTI BAGHE BABYA BAMISIONERE B’OMUHWA

Ababuti baghe babya bamisionere b’omuhwa. Ababuti baghe, ye George na Lucille, mubasoma oko kalasi k’Egileadi ake 12. Omughulu nabutawa oko mwaka 1956, babya ibanemukolera e Etiopia. Mubamba erina ry’omutuliri mughuma w’oko karne k’erimbere, ye Filipo. (Emib. 21:8) Omo mwaka owakwama Eleta muyaghania omubiiri wetu. Nomo nanabya kalwana, ngibuka ndeke-ndeke ngoko ekihanda kyetu ikikaramaya omo bubiso-biso. Kundi nabya mwana, ekyo ikikanitsemesaya! Eky’obulighe, oko 1960 abakulu mubatusaba erilua omo kihugho ekyo.

Ekihanda kyetu mukyahumira e Wichita, e Kansas, omo Amerika, aliwe Ababuti baghe mubalola embere n’omuhwa ogho babya nagho omughulu babya bamisionere. Babya banzire ekwenene, kandi mubatukangiriryayo itwe bosi, ingye, n’omukulu waghe musika, ye Judy, n’omulere waghe mulwana, ye Leslie, nabo mubabutirwa e Etiopia. Munabatisibwa n’emyaka 13. Enyuma sy’emyaka isatu, ekihanda kyaghe mukyahumira eyabya obwagha bunene bw’abatuliri, omo Arequipa, e Peru.

Oko 1974, iniwite emyaka 18, e Beteli ye Peru muyanyituma haghuma n’abandi baghala betu bani mo bapainia b’embaghane. Mubatutuma eriyakolera omo biharo ebyabya isibiribyatatulirwamo. Ebiharo ebyo byabya omo kati-kati k’Ebitwa bye Andes. Itukatulira abandu abakabugha omubughe we Kikechua n’owe Kiaymara. Omutoka ogho twabya tukaghendamo iwo tukakolesaya ng’enyumba yetu. Ngabya nibuka omughulu twabya tukabwira abandu ngoko Yehova akendibughaho lino-lino obwera, amakoni, n’oluholo, ngatsema kutsibu. (Erib. 21:3, 4) Abandu banene mubabya Bimiri.

MUNATUMWA ERIYAKOLERA OKO BWIKALO BUKULU

Oko 1977 mughala wetu Albert Schroeder, oyo wabya w’omo Kyaghanda Ekikasondola eky’Abimiri ba Yehova, mwalenderera e Peru. Mwanibwira ati nisulaye efomu y’eriyakolera oko Beteli y’oko bwikalo bukulu. Munakola nitya. Muhatalaba mughulu muli, kundi ekiro 17 Omwisi 6, 1977, munatsuka erikolera oko Beteli ye Brooklyn. Omo myaka ini eyakwama, munakolera omo Departema y’obuyonzo n’ey’erisugha ebindu.

Oko Mwisi 6, 1978, munasungana na Elizabeth Avallone oko muhindano munene w’ekimataifa omo Nouvelle-Orléans, e Louisiane. Naye nga ngye, mwakulibwa n’ababuti ababya bakakolera Yehova n’omuhwa wosi. Elizabeth abya iniamabibugha emyaka 4 ini mupainia w’omughulu wosi, abya anzire erisyakola omubiiri w’omughulu wosi omo ngebe yiwe. Neryo mutwatsuka eribya tukakania. N’ebiro bikalaba, mutwanzana kutsibu. Mutwalunga ekiro 20 Omwisi 10, 1979, neryo mutwatsuka erikolera itwe bosi oko Beteli.

Abaghala n’abali betu b’omo ndeko yetu y’erimbere y’Ekiespanyole, omo Brooklyn, babya n’olwanzo lunene. Twabirikolera omo sindi ndeko isatu esirimo abandu abali ng’abo ababirituwatikya erilola embere n’omubiiri wetu w’oko Beteli. Tukasimabo busana n’ekyo, kutya tukasima abandi bira betu n’ekihanda abatuwatikaya erisulubirira ababuti betu omughulu bakekeluha.

ERITSUKA ERIKOLERA OMO DEPARTEMA EYIKALEBAYA EBY’EMIGHAMBO

Oko Mwisi 1, 1982 munatumwa omo Departema Eyikalebaya by’Emighambo. Si nabya niyilindirire okw’ekyo. Habere halaba emyaka isatu, mubanyituma eriyasoma akalasi k’emighambo nitoke eribya muavoka. Munalangira ngoko abandu b’omo Amerika n’ab’omo bindi bihugho babiribya bwiranda erikola emyatsi mingyi busana n’esyombanza esyo Abimiri ba Yehova babirisinga. Emyatsi eyo iyikakanibawako kangyi-kangyi omo kalasi.

Omughulu nayira emyaka 30 oko 1986, munayirwa mo mwimaniri w’Edepartema Eyikalebaya eby’Emighambo. Munatsema ngalangira e Beteli ikayiketera ingye nomo nabya mulwana, aliwe kandi munahangya-hangya kundi nabya isiniasi bingyi, kandi abya mubiiri owakalire.

Munabugha akalasi k’emighambo oko 1988, aliwe si nabya niasi ngoko akalasi ako kabiritula oko bunya-kirimu bwaghe. Akalasi kali-kali kanganaleka omundu iniayiheka n’eribya akalangira abandi abatasoma ng’iye mo bandu bule. Elizabeth mwanisabula. Mwaniwatikya eritasyasubira emibere yaghe y’obunya-kirimu eyo nabya nayo embere niyasome akalasi ako. Mukimya endambi, aliwe munatoka erisubira emibere yaghe y’obunya-kirimu. Ekyo kyabirinighisya ngoko eriminya bingyi si w’omwatsi w’omughaso munene omo ngebe. Omwatsi w’omughaso munene omo ngebe, ry’eribya n’obwira obuwene haghuma na Yehova, erimwanza kutsibu, n’eryanza abandu biwe.

ERIMIRA ENGULU MBUYA N’ERIMINYISYAYO EMBERE SY’ABAKULU B’ELETA

Nabere nabugha akalasi k’emighambo, munatsuka erimanira omubiiri ow’alebirye eby’emighambo eyo eBeteli yabya yilaghireko n’ey’erilwira oko mubiiri w’Obwami. Omubiiri waghe abya atsemisirye, aliwe kandi inialimo amaligho kundi endondeka yabya yikabinduka luba-luba. Ng’eky’erileberyako, abandu babya ibabiribeghera eribya bakateka esyofranga embere bahabawe ebitsapo byetu. Aliwe, oko 1991, Edepartema Eyikalebaya eby’Emighambo muyasabwa eriwatikya eribughaho omwatsi oyo. Neryo Abimiri ba Yehova mubatsuka eriha abandu b’ebitsapo butsir’iliha. Ekyo mukyolobya omubiiri w’oko Beteli n’omubiiri w’eritulira, n’erihika na munabwire kyabirituteya okw’itendiliha ebitasi bitya-bitya. Abandu balebe mubalengekania bati esyofranga syetu sikendikeha, neryo itwataluka eribya tukalusya ebitsapo ebitosire ebyanganawatikya abandu eriminya Yehova. Aliwe, emyatsi ko yatabya yitya. Emighanzo y’abandu ababya bakaramya Yehova erilua oko 1990, yabirikanyirira kulenga ngendo ibiri. Na munabwire abandu banganabana akalyo k’obunya-kirimu butsir’iliha. Nabiriyilangirira ngoko ekikaleka esyombinduka sy’endondeka isyabya sikatokekana ni busana n’obuwatikya bwa Yehova erilabira mughombe mutaleghula n’ow’amenge.​—Eril. 15:2; Mat. 24:45.

Si bugha ambu eriminya ndeke emyatsi y’emighambo kyo kikaleka itwabya tukasinga esyombanza oko syotribinali. Aliwe, kangyi-kangyi abakulu b’Eleta bakatwimira busana n’emighendere yetu eyuwene. Ekyo munayilangirirakyo oko 1998, omughulu abaghala betu basatu ab’omo Kyaghanda Ekikasondola n’abakali bobo basa oko muhindano munene w’embaghane omo Kiba. Ngoko babya bakayighendya mulyawatikya kutsibu kulenga ebinywa byetu. Emighendere yabo eyuwene muyawatikya kutsibu abakulu b’Eleta eriligha ngoko kwenene situliyingiraya omo myatsi y’epolitike.

Aliwe omughulu esyombanza esilebirye emyatsi y’emighambo sisitasohwa ndeke, omwatsi mughuma musa ow’erikola, ‘ry’erimira engulu mbuya, n’eriminyisyayo embere sy’abakulu b’Eleta.’ (Filip. 1:7) Ng’eky’erileberyako, omo myaka mingyi abakulu b’omo Bulaya n’ab’omo Korea y’Endina, mubatatulighira eribya tukakola oko mibiiri eyo Eleta ikaha abandu, aliwe eyite y’ekisuda. Busana n’ekyo abaghala betu 18 000 omo Bulaya n’abanene oko 19 000 omo Korea y’Endina mubaghuswa omo ngomo kundi mubataligha eribya basuda.

Oko nduli, kiro 7, Omwisi 7, 2011, Etribinali Ngulu ye Bulaya y’Esyombangwa sy’Abandu muyibukya eriyisogha eryabya iryabirimibwa omo kati-kati ke Bayatyan na Armeni. Neryo muyabugha yiti omo Bulaya yosi omundu ali bwiranda erikola eyindi mibiiri eyo Eleta ikaha abandu omo mwanya w’eriya oko kisuda. N’ekiro 28, Omwisi 6, 2018 Etribinali Eyikalebaya eby’Emighambo omo Korea y’Endina, nayo muyaligha erikwama eriyisogha lighumerera eryo. Abaghala betu balwana, nibya nomo bangabere bake, nga mubayingirya omo myatsi y’epolitike, sitwendisinga olubanza olo.

Edepartema Eyikalebaya eby’Emighambo eyiri oko bwikalo bukulu, n’esindi Departema esiri omo syobeteli sy’omo kihugho kyosi, sikakola kutsibu busana n’erilwira oko mubiiri w’Obwami. Tuli n’olusunzo olw’eriwatikya abaghala n’abali betu abakabya ibanemwaghalibwa busana n’obwikirirya bwabo. Omughulu twamasinga n’omughulu bamaghana eritwimira tukabya itwamabiteka obwimiri oko batabali, oko bami, n’oko bihanda. (Mat. 10:18) Abatsweri, abakulu b’Eleta, ab’esyongulu, n’abandi bandu bakabya ibanemulengekania oko masako agho tukahira omo ebyo tulyahandika nagho tukabya itunemwahula tukatonda. Ekyo kikawatikaya abandu ab’emitima myolo eriminya Abimiri ba Yehova nga ni bahi, kandi ngoko ebyo bikirirye bikalua omo Biblia. Abaghuma ba kubo babiribya Bimiri ba Yehova.

WASINGYA, YEHOVA!

Omo myaka 40 eyamabilaba, nabiribana olusunzo lw’eriwatikya esyo Beteli omo kihugho kyosi omo myatsi eyilebirye emighambo, n’olw’eribya ngahika oko syotribinali ngulu-ngulu n’embere sy’abakulu bangyi. Nanzire kutsibu abo ngakola nabo omo Departema Eyikalebaya eby’Emighambo ey’oko bwikalo bukulu, n’abomo sindi Departema Esikalebaya eby’Emighambo omo kihugho kyosi. Nabiriyira oko ngebe eyuwene kutsibu.

Omo myaka 45, Elizabeth omwanzwa waghe abiriniwatikya kutsibu omo mighulu eyuwene n’eyikalire. Ngamusima kutsibu kundi abirikola atya nomo akwire obukoni obwabirikehya kutsibu akaghala kiwe.

Twabiriyilangirira ngoko situlibana akaghala kutse erisinga busana n’obutoki obo tuli nabo. Aliwe ngoko Daudi anabugha, “Yehova ni maka w’abandu biwe.” (Esy. 28:8) Oko kwenene, “amalwa ni wa Yehova.”