Unalue wasi?

Omo karne k’erimbere, ibakakolaki n’omusasi w’esyonyama esyabya sikakererwa oko kiherero?

OBULI mwaka, abahereri omo Israeli ibakaherera amaelfu w’esyonyama oko kiherero ky’omo hekalu. Erikwamana na Josephus omwanahistoria Muyahudi w’oko karne k’erimbere, omughulu w’Epasaka, esyombuli nene oko 250 000 isikahererawa. Neryo omusasi iniakutika munene. (Law. 1:10, 11; Emig. 28:16, 19) Ibakakolaki n’omusasi oyo?

Abakatakula eby’omo kitaka mubafumbula ekyuna ahabya ehekalu eyabya ikakolesibwa omughulu Yesu abya oko kihugho. Ekyuna ekyo kyo kyabya kikalabamo omusasi erilua omo hekalu.

Lebaya emyatsi ibiri eyabya ikaleka ekiherero ikyasighala ikinerire:

• Ebyuna eyikwa w’ekiherero: Ekitabu kighuma ekirimo emibere y’Abayahudi n’emitsye yabo, ekyahandikawa enyuma w’omwaka 200 oko mughulu wetu nakyo kirimo omwatsi mughumerera oyo. Kikabugha kiti: “Habya ebyuna bibiri oko kiherero. Omusasi w’amahere n’amaghetse awabya akakolesibwa eryerya ekiherero, ebyosi ibikalaba omo byuna ebyo n’eriyahwera omo musya we Kidroni.”

  Abakatakula eby’omo kitaka nabo bakalighirana n’ebiri omo kitabu kya kera ekyo. Ekitabu kighuma ekikakanaya oko historia y’Abayahudi kiti abakatakula eby’omo kitaka mubafumbula emighende hakuhi n’ahabya ehekalu, eyo alinga yo yabya ikalabamo omusasi w’amahere n’amaghetse erilua omo hekalu.

• Amaghetse: Abahereri ibakalagha oko maghetse manene eryerya ekiherero n’ekyuna ekyo omusasi alyalabamo. Amaghetse ayo iniakasira omo muyi. Babya ibabiritula emighende eyabya ikaleta amaghetse n’eritwalagho omo biriba ebyabya oko hekalu. Joseph Patrich, omughuma w’oko abakatakula eby’omo kitaka akabugha ati: “Kitokekene si habya eyindi hekalu eyabya n’enzira eyuwene ng’eyi y’eriletamo amaghetse oko hekalu n’ey’erilusya omo hekalu mw’awaterire.”