Paulo amatumwa e Roma

Olughendo lwa kasatu lwa Paulo olw’eriyatulira mulwahwera e Yerusalema. Eyo mwahambwa n’erihirwa omo ngomo. Omo kiro, Yesu mwamubwira omo nzoli ati: ‘Ukendighenda e Roma eriyatulirayo.’ Paulo mwalusibwa e Yerusalema n’eritwalwa e Kaisaria, eyo abugha emyaka ibiri iniane omo ngomo. Omughulu Omuguvernere Festo amutondesaya, Paulo mwabugha ati: ‘Muleke Kaisari we Roma yunyitswere.’ Festo mwabugha ati: ‘Wamasaba eriyatondera embere sya Kaisari, ukendiyatondera embere sya Kaisari.’ Mubahira Paulo y’omo bwato obukaya e Roma. Abaghala betu Bakristo babiri, ye Luka na Aristarko, mubaghenda haghuma naye.

Omo ngetse, mumwabya ekihunga kinene ekyabugha ebiro binene. Obuli mundu oyo wabya omo bwato mwalengekania ati bakendihola. Aliwe Paulo mwabugha ati: ‘Balume, omumalaika mwakanibwira omo nzoli ati, “Paulo, isiwasagha. Ukendihika e Roma, n’abosi abo ghuli nabo omo bwato bakendihika buholo.” Muhande emitima! Sitwendihola.’

Ekihunga kinene ekyo mukyabugha ebiro 14. Oko nduli, ekitaka mukyalangirikira hali. Kyabya kisanga kye Malta. Obwato mubwayihuma oko kitaka n’eritulangyika mo bihande-bihande, aliwe abandu bosi 276 ababya omo bwato obo mubahika buholo oko musike w’engetse. Abasi erighenda omo maghetse mubayighusa omo ngetse n’abandi bamamakirira ebihande-bihande by’obwato erihika oko musike w’engetse. Abandu be Malta mubabatsomana n’eribakirya omuliro w’eryota.

Enyuma sy’emisi isatu, abasuda mubahira Paulo omo bundi bwato erimutwala e Roma. Abere abihikayo, abalikyetu mubasyamubana. Paulo abere abalangira, mwasima Yehova, neryo amasika omo mutima. Nomo anabya abohirwe, Paulo mwalighirwa eribya omo nyumba y’eripangisya aliwe omusuda inianamuteghirye. Mwikalamo omo myaka ibiri. Abandu ibakasyamubana, neryo iniakabatulira oko Bwami bw’oMungu n’eribakangirirya oko Yesu. Kandi Paulo mwahandikira esyondeko sy’omo Azia Nge n’esy’omo Yudea sy’esyobaruha. Oko kwenene, Yehova mwakolesya Paulo eritula engulu mbuya oko bihanda.