Yohana amahabwa eribisulirwa

Omughulu omukwenda Yohana abya omo ngomo oko kisanga kye Patmosi, Yesu mwamukangania omo syonzoli ebindu 16 ebikendisyabya omo biro ebikasa. Esyonzoli esi musyabisula ngoko erina lya Yehova likendisyayirwa mo libuyirire, ngoko Obwami bwiwe bukendisyasa, kandi ngoko erisonda liwe likendisyabererera oko kihugho ngoko liri elubula.

Omo nzoli nguma, Yohana mwalangira Yehova inianikere oko kitumbi kiwe ky’olukengerwa n’abasyakulu 24 ibanamutimbireko, ibanambite esyokanzu nyeru-nyeru, n’esyombita sy’ehoro oko mitwe yabo. Ekyakakala ky’ehirabyo n’emilumo byabya bikalua omo kitumbi ekyo. Abasyakulu 24 mubunama embere sya Yehova n’erimuramya. Omo yindi nzoli, Yohana mwalangira endeko nene y’abandu abakaramaya Yehova erilua omo bihanda, omo bandu, n’omo mibughe yosi. Ekyana ky’Embuli, ni bugha ambu Yesu, abya mulisya wabo kandi abya akabatwala ahali amaghetse w’engebe. Enyuma sy’aho, omo yindi nzoli, Yohana mwalangira Yesu akatsuka eritabala elubula haghuma n’abasyakulu 24. N’omo nzoli eyakwama, Yohana mwalangira Yesu akalwa n’ekiyoka, ni bugha ambu Sitani, n’esyombinga siwe. Yesu mwabahigha elubula, amabaghusa oko kihugho.

Kandi Yohana mwalangira ekisosekanio ekyuwene ky’Ekyana ky’Embuli n’abandu 144 000 ibanimene oko Kitwa kye Sioni. Kutya mwalangira omumalaika akaghuluka omo kyanya inianemubwira abandu ati bubahe oMungu n’erimuha olukengerwa.

Omo nzoli eyakwama, Yohana mwalangira amalwa we Armagedoni. Omo malwa ayo, Yesu n’abasuda biwe mubakinda ekihugho kya Sitani. Omo nzoli y’enduli, Yohana mwalangira obughuma obuwene omo lubula n’oko kihugho. Sitani n’olubuto lwiwe bamatoghotibwa olosi. Obuli mundu omo lubula n’oko kihugho akalangira erina lya Yehova mo ribuyirire n’erimuramya iye musa.