Paulo na Timoteo

Timoteo abya mughala wetu mulwana omo ndeko ye Listra. Tata wiwe abya Mugiriki, na mama wiwe abya Muyahudi. Mama wiwe, ye Onike, na mukaka wiwe ye Loisi, mubamukangirirya oko Yehova eritsuka omo bwana bwiwe.

Paulo mwahika e Listra omo lughendo lwiwe lwa kabiri lw’eriyatulira. Mwalangira ngoko, oko kwenene Timoteo abya anzire abalikyetu kandi ngoko abya ayiteghekire eribawatikya. Paulo mwasaba Timoteo erighenda haghuma naye. Lyolo-lyolo, Paulo mwabegherya Timoteo atoke eribya mutuliri mubuya kandi mukangirirya mubuya w’engulu mbuya.

Ekirimu kibuyirire mukyasondola Paulo na Timoteo ehosi eyo babya bakaya. Kiro kighuma, omo kiro, omo nzoli, omulume Mumakedonia mwabwira Paulo ati: ‘Wase, utuwatikaye.’ Neryo Paulo, Timoteo, Sila, na Luka mubayayo eriyatulira n’eritsukisya esyondeko.

E Makedonia, omuyi we Tesalonika, abalume n’abakali bangyi mubabya Bakristo. Aliwe abandi Bayahudi mubahitana oko Paulo n’oko ababya naye. Mubahamba abalikyetu aba n’eribatwala eyiri abatabali b’omuyi ibane mubugha bati: ‘Abalume aba ni nzighu sy’obutabali bwe Roma!’ Engebe ya Paulo na Timoteo yabya omo bwiko, neryo omo kiro mubatibita e Beroya.

Abandu be Beroya babya banzire kutsibu eriminya engulu mbuya. Kandi Abagiriki n’Abayahudi bangyi ab’omo muyi oyo mubikirirya. Aliwe omughulu abandi Bayahudi balua e Tesalonika n’erikuna abandu eribendererya, Paulo mwaluayo n’eriya e Atene. Timoteo na Sila mubasighala e Beroya busana n’erisikya mutima abaghala betu. Endambi muyahika, Paulo amatasyatuma Timoteo ye Tesalonika eriyasikya mutima abaghala betu bayo ababya bakendereribwa kutsibu. N’enyuma sy’aho, Paulo mwatuma Timoteo eriyalenderera esindi ndeko nyingyi busana n’erisikya abaghala betu b’omutima.

Paulo mwabwira Timoteo ati: ‘Abanzire erikolera Yehova bakendisyaghalibwa.’ Timoteo mwaghalibwa n’erihirwa omo ngomo busana n’erikirirya liwe. Aliwe mwatsema busana n’erikangania obutaleghula bwiwe oko Yehova.

Paulo mwabwira Abanya Filipi ati: ‘Ngabatumira Timoteo. Akendibakangirirya erilendera omo kwenene nga ni bugha ambuki, n’eribabegherya omw’itulira.’ Paulo mwaminya ngoko anganayiketera Timoteo. Babya bira kandi mubakolera oMungu yo haghuma omo myaka mingyi.